നേന്ത്രപ്പഴം വീട്ടിലുണ്ടോ? ഈ ഓണത്തിന് പുളിശ്ശേരിയിൽ ഒരു കിടിലൻ വെറൈറ്റി പരീക്ഷിക്കാം

മധുരവും പുളിയും ഒരുപോലെ നിറഞ്ഞ മലയാളികളുടെ പ്രിയപ്പെട്ട വിഭവമാണ് പുളിശ്ശേരി. സദ്യയിലും പ്രധാന വിഭവങ്ങളിൽ ഒന്നാണ് ഇത്. വളരെ എളുപ്പത്തിൽ ഇവ തയ്യാറാക്കാമെന്നതാണ് മറ്റൊരു പ്രത്യേകത. കൈതച്ചക്ക പുളിശ്ശേരി, വെള്ളരിക്ക പുളിശ്ശേരി എന്നിങ്ങനെ പലതരം പുളിശ്ശേരികളുണ്ട്. എന്നാൽ നിങ്ങൾ പഴം പുളിശ്ശേരിയെക്കുറിച്ച് കേട്ടിട്ടുണ്ടോ? ഒരു പുളിശ്ശേരി പ്രേമിയാണെങ്കിൽ നിങ്ങൾ അറിഞ്ഞിരിക്കേണ്ട പ്രധാന വിഭവമാണിത്. എങ്ങനെ ഇത് തയ്യാറാക്കാമെന്ന് നോക്കിയാലോ?

ആവശ്യമായ ചേരുവകൾ

1. നേന്ത്രപ്പഴം - രണ്ട്
2. തേങ്ങ - അരകപ്പ്
3. ജീരകം - അര ടീസ്‌പൂൺ
4. പച്ചമുളക് - ഒന്ന് അല്ലെങ്കിൽ രണ്ട്
5. തൈര് - ഒന്നര കപ്പ്
6. മഞ്ഞൾപ്പൊടി -ഒരു നുള്ള്
7. ശർക്കര - ആവശ്യത്തിന്
8. ഉപ്പ് - ആവശ്യത്തിന്

തയ്യാറാക്കുന്ന വിധം

ആദ്യം പഴം കഷ്ണങ്ങളാക്കി ശർക്കരയും അൽപം വെള്ളവും ചേർത്ത് വേവിക്കുക. ഈ സമയത്ത് തേങ്ങ,​ ജീരകം പച്ചമുളക് എന്നിവ അരച്ച് ചേർത്ത് ചെറുതായി തിളപ്പിക്കണം. ഇതിൽ നേരത്തെ വേവിച്ച് വച്ച മിശ്രിതം ചേർത്ത് തീ കുറച്ച ശേഷം തൈര് ചേർത്ത് ഇളക്കി വാങ്ങുക. ഇനി കടുക്,​ വറ്റൽ മുളക്,​ കറിവേപ്പില എന്നിവ താളിച്ച് ചേർക്കാം. ശേഷം എല്ലാം നല്ല പോലെ യോജിപ്പിക്കുക. നല്ല കിടിലൻ പഴം പുളിശ്ശേരി റെഡി. ഇനി ചൂട് ചോറിനൊപ്പം വിളമ്പാം.