ആരോഗ്യവും രുചിയും ഒത്തിണങ്ങിയത്; സ്റ്റഫ്‌ഡ്  പാലക്  ഇഡ്ഡലി തയ്യാറാക്കാം

ആരോഗ്യവും രുചിയും ഒരുപോലെ ഒത്തിണങ്ങിയ ഒരടിപൊളി ഇഡ്ഡലി റെസിപ്പി പരിചയപ്പെടാം. സ്റ്റഫ്‌ഡ് പാലക് ഇഡ്ഡലിയെന്നാണ് ഇതിന്റെ പേര്. ചീരയുടെയും പനീറിന്റെ ഗുണങ്ങളടങ്ങിയ ഈ ഇഡ്ഡലിയിൽ പ്രോട്ടീനും ഫൈബറും ധാരാളമായി അടങ്ങിയിട്ടുണ്ട്. കുട്ടികൾക്കും മുതിർന്നവർക്കും ഒരുപോലെ ഇഷ്ടപ്പെടുന്ന ഈ ഇഡ്ഡലി നാലുമണി പലഹാരമായും കഴിക്കാവുന്നതാണ്.

ആവശ്യമായ ചേരുവകൾ

• ഇഡ്ഡലി അരി - ഒരു കപ്പ്
• ഉഴുന്ന് - അര കപ്പ്
• ഉലുവ - അര ടീസ്‌പൂൺ
• പാലക് - അര കപ്പ്
• പനീർ - ഒന്നര കപ്പ്
• സവാള - ഒന്ന്
• പച്ചമുളക് - ഒന്ന്
• ഇഞ്ചി - അര ടീസ്‌പൂൺ
• എണ്ണ - ആവശ്യത്തിന്

തയ്യാറാക്കുന്ന വിധം

• പച്ചരിയും ഉഴുന്നും ഉലുവയും കഴുകിയെടുത്തതിനുശേഷം കുതിർന്നുവരാനായി വെള്ളത്തിലിടണം. ശേഷം അരച്ചെടുത്ത് ഇഡ്ഡലി മാവ് തയ്യാറാക്കാം. ഇതിൽ ആവശ്യത്തിന് ഉപ്പുചേർത്ത് മാറ്റിവയ്ക്കാം.
• ഒരു പാൻ അടുപ്പിൽവച്ച് ചൂടാക്കണം. ശേഷം എണ്ണ ഒഴിച്ച് ജീരകം പൊട്ടിക്കണം. ഇതിലേയ്ക്ക് ചെറുതായി അരിഞ്ഞ സവാള ചേർത്ത് വഴറ്റണം.
• സവാള നന്നായി വഴണ്ട് വരുമ്പോൾ പാലക് ചീര, പനീർ, ഇഞ്ചി കഷ്ണങ്ങളാക്കിയത്, പച്ചമുളക് എന്നിവ ചേർത്ത് വേവിക്കണം. ആവശ്യത്തിന് ഉപ്പും ചേർക്കാം.
• വെന്തതിനുശേഷം മാറ്റിവയ്ക്കണം.
• അടുത്തതായി ഇഡ്ഡലി തട്ടിൽ മാവ് ഒഴിച്ചതിനുശേഷം അതിനുമുകളിലായി പാലക് മിശ്രിതം വയ്ക്കണം. ശേഷം പാത്രം അടച്ച് അഞ്ചുമിനിട്ട് ആവിയിൽ വേവിച്ചെടുക്കണം. ചൂടോടെ സാമ്പാർ, ചട്ട്‌ണി എന്നിവക്കൊപ്പം വിളമ്പാം.