വർഷങ്ങൾ പഴക്കമുള്ള ജീൻസും പുത്തനായി തോന്നണോ? ഈ അഞ്ച് മാർഗങ്ങൾ അറിഞ്ഞിരുന്നാൽ മാത്രം മതി

സ്‌ത്രീ, പുരുഷ വ്യത്യാസമില്ലാതെ, പ്രായഭേദമില്ലാതെ എല്ലാവരും ധരിക്കുന്ന വസ്‌ത്രമാണ് ജീൻസ്. ഡെനിം തുണിത്തരങ്ങൾ ഉപയോഗിച്ചാണ് ജീൻസ് നിർമിക്കുന്നത്. അതിനാൽത്തന്നെ ഇതിന് കട്ടികൂടുതലാണ്. പലരും ഒന്നോ രണ്ടോ തവണ ഉപയോഗിച്ച ശേഷമാണ് ജീൻസ് അലക്കാറുള്ളത്. അലക്കാനുള്ള ബുദ്ധിമുട്ട് തന്നെയാണ് ഇതിന് കാരണം. മറ്റുചിലരാകട്ടെ ഇത് ദിവസേന അലക്കാറുണ്ട്.

എന്നാൽ, സ്ഥിരമായി സോപ്പ് വെള്ളത്തിൽ വീഴുന്നത് ജീൻസിന്റെ നിറം മങ്ങുന്നതിന് കാരണമാകും. തുണിയുടെ പുതുമയും നഷ്‌ടപ്പെടും. ഈ പ്രശ്‌നങ്ങളൊന്നുമില്ലാതെ ജീൻസ് ശരിയായ രീതിയിൽ വൃത്തിയാക്കി എടുക്കേണ്ടത് എങ്ങനെയെന്നറിയാം.

• ചില ജീൻസുകളിൽ എംബ്രോയിഡറി വർക്ക് ഉണ്ടാവും. ഇത്തരം ജീൻസ് കൈകൊണ്ട് മാത്രം കഴുകുക. ഇവ കല്ലിൽ ഉരയ്‌ക്കുന്നതോ വാഷിംഗ് മെഷീനിൽ ഇടുന്നതോ നല്ലതല്ല.
• പുതിയ ജീൻസ് ആദ്യമായി കഴുകുമ്പോൾ നിറം പോകാതിരിക്കാൻ തണുത്ത വെള്ളത്തിൽ കുറച്ച് ഉപ്പ് കലർത്തി അതിൽ മുക്കിവയ്‌ക്കുക. ഉണങ്ങാനിടുമ്പോൾ സൂര്യപ്രകാശം നേരിട്ട് ഏൽക്കാതിരിക്കാൻ ശ്രദ്ധിക്കുക.
• എന്നും ജീൻസ് അലക്കരുത്. നല്ല രീതിയിൽ മുഷിഞ്ഞെന്ന് തോന്നുമ്പോൾ മാത്രം അലക്കുക. അല്ലെങ്കിൽ വിയർപ്പ് മാറാനായി കാറ്റുകൊള്ളിച്ചശേഷം മടക്കിവയ്‌ക്കാവുന്നതാണ്.
• എപ്പോഴും ജീൻസിന്റെ ഉൾഭാഗം പുറത്തിട്ട് വേണം കഴുകാൻ. വില കൂടിയ ജീൻസുകൾ ഡ്രൈ ക്ലീൻ ചെയ്യുക. വ്യത്യസ്‌ത നിറത്തിലുള്ള ജീൻസുകൾ ഒരുമിച്ചിട്ട് അലക്കരുത്. നിറം മാറുന്നതിന് ഇത് കാരണമാകും.
• കുറഞ്ഞത് പത്ത് പ്രാവശ്യമെങ്കിലും ഇട്ടശേഷം ജീൻസ് കഴുകുന്നതാണ് നല്ലത്. അല്ലെങ്കിൽ മാസത്തിൽ ഒരിക്കൽ കഴുകുക.