കേന്ദ്രസർക്കാർ ജീവനക്കാർക്ക് 3 ശതമാനം ഡി.എ വർദ്ധന

ന്യൂഡൽഹി: കേന്ദ്ര സർക്കാർ ജീവനക്കാരുടെ ക്ഷാമബത്തയും പെൻഷൻകാരുടെ ക്ഷേമ ആനുകൂല്യവും മൂന്നു ശതമാനം വർദ്ധിപ്പിക്കാൻ കേന്ദ്ര മന്ത്രിസഭായോഗം തീരുമാനിച്ചു. 2025 ജൂലായ് ഒന്നുമുതൽ മുൻകാല പ്രാബല്യമുണ്ടാകും. നിലവിൽ അടിസ്ഥാന ശമ്പളത്തിന്റെ 55 ശതമാനമാണ് ഡി.എ. ഇത് 58 ആയി വർദ്ധിക്കും. 49.19 ലക്ഷം ജീവനക്കാർക്കും 68.72 ലക്ഷം പെൻഷൻകാർക്കും പ്രയോജനം ലഭിക്കും. വർദ്ധനയിലൂടെ ഖജനാവിന് പ്രതിവർഷം 10,​083.96 കോടിയുടെ അധിക ബാദ്ധ്യതയുണ്ടാകും. ഏഴാം കേന്ദ്ര ശമ്പള കമ്മിഷന്റെ ശുപാർശകളെ അടിസ്ഥാനമാക്കിയാണ് വർദ്ധനവ്.