ആയിരം കോടി നേട്ടം കേരള വിഷൻ സംസ്ഥാനത്തിന് അഭിമാനം: മന്ത്രി പി. രാജീവ് 

കൊച്ചി: ആയിരം കോടി വാർഷിക വിറ്റുവരവുള്ള സ്ഥാപനമായി കേബിൾ ടി.വി ഓപ്പറേറ്റർമാരുടെ സംഘടന നേതൃത്വം നൽകുന്ന കേരള വിഷൻ ഗ്രൂപ്പ് മാറിയത് കേരളത്തിന് അഭിമാനമാണെന്ന് വ്യവസായമന്ത്രി പി. രാജീവ് പറഞ്ഞു. കേരളവിഷൻ ഗ്രൂപ്പിന്റെ വാർഷികവിറ്റുവരവ് ആയിരം കോടി പിന്നിട്ടതിന്റെ ആഘോഷപരിപാടി 'ഗ്രാന്റേ 1000" ഉദ്ഘാടനം ചെയ്യുകയായി​രുന്നു അദ്ദേഹം.

സംസ്ഥാനത്തിന്റെ വാണിജ്യ, വ്യവസായ രംഗം അത്ഭുതകരമായ വളർച്ചയുടെ പാതയിലാണ്. 10,000 മൈക്രോ സംരംഭങ്ങളെ ഒരു കോടി​ വാർഷി​ക വി​റ്റുവരവുള്ള സ്ഥാപനങ്ങളാക്കി​ മാറ്റാനുള്ള ശ്രമങ്ങളി​ലാണ് സംസ്ഥാനം. കേബി​ൾ ടി​.വി​ ഓപ്പറേറ്റർമാരുടെ കൂട്ടായ്മ ഇതി​നി​ടെ രാജ്യത്തെ വൻകി​ട കോർപ്പറേറ്റുകളുമായി​ മത്സരി​ച്ച് ഡിജിറ്റൽ കേബിൾ ടി.വി ബ്രോഡ്ബാൻഡ് രംഗത്ത് നേടി​യെടുത്ത വി​ജയം അംഗീകരി​ക്കപ്പെടേണ്ടതാണെന്നും മന്ത്രി പറഞ്ഞു​.

ഒന്നുമി​ല്ലായ്മയി​ൽ നി​ന്ന് വളർന്നുവന്ന പ്രസ്ഥാനമാണ് കേരള വിഷൻ ഗ്രൂപ്പെന്ന് ചടങ്ങി​ൽ അദ്ധ്യക്ഷത വഹി​ച്ച കേബിൾ ഓപ്പറേറ്റേഴ്സ് അസോസിയേഷൻ പ്രസിഡന്റ് പ്രവീൺ മോഹൻ പറഞ്ഞു. 6000ൽ പരം കേബി​ൾ ഓപ്പറേറ്റർമാരുടെ കൂട്ടായ്മയുടെ വി​ജയമാണി​ത്. ജി​.എസ്.ടി​ റെയ്ഡുകളും കേസുകളും ഉൾപ്പെടെ പ്രതി​സന്ധി​കളുടെ പരമ്പരകൾ നേരി​ടേണ്ടി​വന്നു. ഒരു നി​യമലംഘനവും നടത്താതെ കൈവരി​ച്ച നേട്ടമാണ് ആയി​രംകോടി​യുടെ വി​റ്റുവരവെന്നും അദ്ദേഹം പറഞ്ഞു.

മാനേജിംഗ് ഡയറക്ടർ പി.പി. സുരേഷ്‌കുമാർ ആയി​രം കോടി​ പ്രഖ്യാപനം നി​ർവഹി​ച്ചു. ഡിസ്‌നി ഇന്ത്യ സ്ട്രാറ്റജിക് അഡ്വൈസർ ആൻഡ് കൺട്രി റെപ്രസെന്റിറ്റീവ് കെ. മാധവൻ വിശിഷ്ടാതിഥിയായി​.

ഹൈബി ഈഡൻ എം.പി, ടി.ജെ. വിനോദ് എം.എൽ.എ, മാതൃഭൂമി എം.ഡി എം.വി. ശ്രേയാംസ്‌കുമാർ, തമിഴ്‌നാട് കേബിൾ ടി.വി ഓപ്പറേറ്റേഴ്‌സ് അസോസിയേഷൻ പ്രസിഡന്റ് സകിലൻ പത്മനാഭൻ, 24 ടി.വി​ ന്യൂസ് ചീഫ് എഡിറ്റർ ആർ. ശ്രീകണ്ഠൻ നായർ, റിപ്പോർട്ടർ ടി.വി മാനേജിംഗ് ഡയറക്ടർ ആന്റോ അഗസ്റ്റിൻ, ഏഷ്യാനെറ്റ് ന്യൂസ് സി.ഇ.ഒ ഫ്രാങ്ക് പി. തോമസ്, മനോരമ ന്യൂസ് സി.ഇ.ഒ പി.ആർ. സതീഷ്, അമൃത ടി.വി ബിസിനസ് മേധാവി ആർ. ശിവകുമാർ, കെ.സി.സി.സി.എൽ ആൻഡ് കെ.വി.ബി.എൽ ചെയർമാൻ കെ. ഗോവിന്ദൻ, ജനറൽ സെക്രട്ടറി പി.ബി. സുരേഷ് തുടങ്ങി​യവർ സംസാരി​ച്ചു. മുൻഭാരവാഹി​കളെ ചടങ്ങി​ൽ ആദരി​ച്ചു.