ലക്ഷ്യം, മൂന്നാം എൽ.ഡി.എഫ് സർക്കാർ

കൊല്ലത്ത് ആദ്യം സി.പി.എം സംസ്ഥാന സമ്മേളനം നടന്നത് 1971ലാണ്. പിന്നീട് 95ൽ നടന്നു. 71ൽ നടക്കുമ്പോൾ,മൂന്നിൽ രണ്ട് ഭൂരിപക്ഷത്തോടെ അധികാരത്തിൽ വന്ന ഇന്ദിരാഗാന്ധി സർക്കാർ സേച്ഛാധിപത്യപരമായ നടപടികളിലൂടെ നീങ്ങുന്ന കാലമായിരുന്നു. 95ൽ നരസിംഹ റാവുവിന്റെ നേതൃത്വത്തിലുള്ള കോൺഗ്രസ് സർക്കാരായിരുന്നു. എന്നാൽ ഇപ്പോൾ ബി.ജെ.പി തുടർച്ചയായി കേന്ദ്രത്തിൽ അധികാരത്തിൽ ഇരിക്കുമ്പോഴാണ് കൊല്ലത്ത് സംസ്ഥാന സമ്മേളനം നടക്കുന്നത്.

സി.പി.എമ്മിനെ ഒറ്റപ്പെടുത്തി കോൺഗ്രസും സി.പി.ഐയും ലീഗുമെല്ലാം ചേർന്ന മുന്നണിയാണ് 71ൽ കേരളം ഭരിച്ചിരുന്നത്. 95ലും കേരളത്തിൽ യു.ഡി.എഫ് ഭരണമായിരുന്നു. 95ലെ സി.പി.എം സംസ്ഥാന സമ്മേളനം ഇടതുപക്ഷ ജനാധിപത്യ മുന്നണിയിലേക്ക് കൂടുതൽ ജനങ്ങളെ അണിനിരത്താൻ തീരുമാനിച്ചു. 96ൽ നടന്ന തിരഞ്ഞെടുപ്പിൽ എൽ.ഡി.എഫ് ഭൂരിപക്ഷം നേടി ഒരുവർഷത്തിനുള്ളിൽ നായനാർ സർക്കാർ അധികാരത്തിൽ വന്നു. ഇപ്പോൾ സംസ്ഥാന സമ്മേളനം നടക്കുന്നത് നിയമസഭ തിരഞ്ഞെടുപ്പിന് ഒരുവർഷം മാത്രം ശേഷിക്കെയും. എന്നാൽ 95ൽ നിന്നും വ്യത്യസ്തമായി എൽ.ഡി.എഫ് തുടർഭരണം നേടിയെടുത്ത പശ്ചാത്തലമാണ്. ഒരു വർഷത്തിനുള്ളിൽ നടക്കുന്ന നിയമസഭ തിരഞ്ഞെടുപ്പിൽ എൽ.ഡി.എഫിന് മൂന്നാമൂഴത്തിനുള്ള സാദ്ധ്യതയും രൂപ്പെട്ടുവരുന്നു. പ്രധാന കാരണം ഒന്നും രണ്ടും എൽ.ഡി.എഫ് സർക്കാരുകൾ പശ്ചാത്തല സൗകര്യം വികസനത്തിൽ സൃഷ്ടിച്ച കുതിച്ചുച്ചാട്ടമാണ്.

ഉമ്മൻചാണ്ടി സർക്കാർ ദേശീയപാത വികസനത്തിന് സ്ഥലമേറ്റെടുപ്പ് സാദ്ധ്യമല്ലെന്ന് സ്വയം സമ്മതിച്ചു. മുഖ്യമന്ത്രി പിണറായി വിജയന്റെ നേതൃത്വത്തിൽ ഏകോപിതമായി പ്രവർത്തിച്ചാണ് ഇത് സാദ്ധ്യമായത്. ഇതാണ് ഭരണം. അപ്പോൾ അവിടെയും ഇവിടെ ആളുകളെ പിടിച്ച് രണ്ട് മാസത്തെ ക്ഷേമ പെൻഷൻ കുടിശിക വന്നുവെന്ന് പറഞ്ഞ് പ്രശ്നമുണ്ടാക്കുകയാണ്. 18 മാസം കുടിശിക വന്നപ്പോൾ അനങ്ങാത്തവരാണ് ഇപ്പോൾ ബഹളമുണ്ടാക്കുന്നത്. കനഗോലുമാരെ കൊണ്ടുവന്ന് സി.പി.എമ്മിനെയും എൽ.ഡി.എഫിനെയും ജനങ്ങൾക്കിടയിൽ മോശമാക്കാൻ ശ്രമിക്കുന്നു. ഇതിനെയെല്ലാം എങ്ങനെ നേരിടണമന്ന് ഗൗരവമായി ചർച്ച ചെയ്യും.

95ലെ സംസ്ഥാന സമ്മേളനത്തിന് പിന്നാലെ യു.ഡി.എഫിനെ തറപറ്റിച്ച് എൽ.ഡി.എഫ് അധികാരത്തിൽ വന്നു. അതുപോലെ ഒരിക്കൽക്കൂടി തുടർഭരണം ഉറപ്പാക്കാനുള്ള കാഴ്ചപ്പാട് പാർട്ടിയും തുടർന്ന് എൽ.ഡി.എഫും ചർച്ച ചെയ്യുന്നതിൽ കൊല്ലം സംസ്ഥാന സമ്മേളനം പ്രധാനപ്പെട്ട പങ്കുവഹിക്കും. പുതിയ കേരളം സൃഷ്ടിക്കാൻ കഴിഞ്ഞ സംസ്ഥാന സമ്മേളനത്തിൽ മുഖ്യമന്ത്രി പിണറായി വിജയൻ നവകേരള രേഖ അവതരിപ്പിച്ചിരുന്നു. അതിനെ കാലോചിതമാക്കുന്ന ചർച്ച ഈ സമ്മേളനത്തിൽ നടക്കും. ഇങ്ങനെ കേരളത്തിന്റെ സാമൂഹിക രാഷ്ട്രീയ ചരിത്രത്തിൽ വലിയ സ്വാധീനം ചെലുത്തുന്ന സമ്മേളനമാണ് കൊല്ലത്ത് നടക്കുന്നത്.