മനസുതുറന്ന് വനിതാ നേതാക്കൾ  'അടുക്കളകൾ സ്ത്രീകളെ ഇപ്പോഴും വേട്ടയാടുന്നു...'

കൊല്ലം: സി.പി.എം സംസ്ഥാന സമ്മേളനത്തിനിടെയാണ് വനിതാ ദിനവും കടന്നുവന്നത്. ഇന്നലെ രാവിലെ കൊല്ലം ബീച്ചിലെ പ്രഭാത സവാരിക്കിടെ പാർട്ടിയിലെ മുതിർന്ന വനിതകളായ പി.കെ.ശ്രീമതി, കെ.കെ.ശൈലജ, പി.സതീദേവി, സി.എസ്.സുജാത, പി.കെ.ശ്യാമള, ഇളമുറക്കാരി ചിന്താജെറോം എന്നിവർ വനിതാ മുന്നേറ്റത്തെക്കുറിച്ച് സംസാരിച്ചു.

വലിയ മുന്നേറ്റം: പി.കെ.ശ്രീമതി

കേരളത്തിലെ പാർട്ടിയിൽ വനിതകളുടെ വലിയ മുന്നേറ്റമാണ്. സമ്മേളന പ്രതിനിധികളിൽ 75പേർ വനിതകളാണ്. ബ്രാഞ്ച് സെക്രട്ടറി മുതൽ ഏരിയാ സെക്രട്ടറിമാർവരെ വനിതകളുണ്ട്. മറ്റൊരു പാർട്ടിയിലും ഈ സവിശേഷതയില്ല. എങ്കിലും പൊതുരംഗത്തേക്കുള്ള വനിതകളുടെ വരവ് കൂടേണ്ടതുണ്ട്.

ഇടിച്ചു കയറിവരണം: കെ.കെ.ശൈലജ

വനിതകളുടെ മുന്നേറ്റം അവർതന്നെ തീരുമാനിക്കേണ്ടതാണ്. ഇടിച്ചു കയറിവരണം. അതിന് ഉദാഹരണമാണ് സി.പി.എം. ഇവിടെ ആരും ആരെയും തടയുന്നില്ല.

സാമൂഹിക അന്തരീക്ഷം

മാറണം: പി.സതീദേവി

കേരളം ഒരുപാട് മാറി. പക്ഷേ രാജ്യത്ത് സാമൂഹിക അന്തരീക്ഷം ഇനിയും ഒരുപാട് മാറേണ്ടതുണ്ട്. ഇപ്പോഴും സ്ത്രീകൾക്കെതിരായ പീഡനങ്ങളും ആത്മഹത്യയും കൂടുന്നു. സ്ത്രീകളുടെ ഭാഗത്തു നിന്ന് നല്ല ചെറുത്തുനിൽപ്പുകളുണ്ടാകണം. സ്ത്രീധനം കൊടുത്ത് വിവാഹം വേണ്ടെന്ന നിലപാടെടുക്കണം.

അടുക്കളകൾ സ്ത്രീകളെ

വേട്ടയാടുന്നു: സുജാത

പൊതുപ്രവർത്തകർ എന്നവകാശപ്പെടുമ്പോഴും അടുക്കളകൾ സ്ത്രീകളെ വേട്ടയാടുന്നുണ്ട്. കേരളത്തിൽ ഒരുപാട് മാറ്റങ്ങളുണ്ടായെങ്കിലും രാജ്യത്താകമാനം പരിശോധിക്കുമ്പോൾ അടുക്കളയും കുട്ടികളും ഭർതൃപരിചരണവും കഴിഞ്ഞേ സ്ത്രീകൾക്ക് പുറത്തിറങ്ങാനാവുന്നുള്ളൂ. അതുമാറണം.

ഇപ്പോഴും ഗോവിന്ദൻ മാഷിന്റെ

ഭാര്യയാക്കുന്നു: പി.കെ.ശ്യാമള

കാലവും പാർട്ടിയും സമൂഹവുമെല്ലാം മാറുന്നുണ്ട്. പക്ഷേ ഈ സമ്മേളന നഗരിയിലെത്തുമ്പോഴും തന്നെ ആളുകൾ സംബോധന ചെയ്യുന്നത് ഗോവിന്ദൻ മാഷിന്റെ ഭാര്യയെന്നാണ്. അത് തെറ്റാണെന്നല്ല പറയുന്നത്. പക്ഷേ സ്ത്രീക്ക് അവളുടേതായ ഐഡന്റിറ്റിയുണ്ട്. വർഷങ്ങളായി താനും ഈ പാർട്ടിയിൽ പ്രവർത്തിക്കുന്നു. എന്നിട്ടും സമൂഹത്തിന്റെ മനോഭാവം മാറുന്നില്ല.

സൈബർ ആക്രമണം ചെറുതല്ല: ചിന്താ ജെറോം

പൊതുരംഗത്തേക്കിറങ്ങുന്ന ഒരു പെൺകുട്ടി പുതിയകാലത്ത് നേരിടുന്ന ഏറ്റവും വലിയ പ്രശ്‌നം സൈബർ ആക്രമണമാണ്. അവളുടെ നിൽപ്പും നടപ്പും വാക്കുകളുമൊക്കെ അനാവശ്യമായി വലിച്ചിഴക്കപ്പെടുന്നു. ദുരുദ്ദേശ്യപരമായ ചിത്രങ്ങൾ കൊടുക്കുന്നു. വീട്ടിൽ കുടുംബത്തെ നോക്കിക്കിടക്കേണ്ടവളാണ് സ്ത്രീയെന്ന സങ്കല്പത്തിന് ഇപ്പോഴും വലിയ മാറ്റമുണ്ടായിട്ടില്ല.