ഇഡ്ഡലി കഴിച്ച് തടി കുറച്ചാലോ? രുചിയും പോഷകഗുണവും ഒരുമിച്ച്; എളുപ്പത്തിൽ തയ്യാറാക്കാം

പ്രഭാത ഭക്ഷണത്തിന് ഏറെ പ്രാധാന്യമാണുള്ളത്. രാവിലെ കഴിക്കുന്ന ഭക്ഷണം രുചിയുളളതും പോഷകഗുണങ്ങൾ ഉള്ളതുമായിരിക്കണം. ഒരു ദിവസത്തെ മുഴുവൻ ഊർജം ഇതിനെ അടിസ്ഥാനമാക്കിയായിരിക്കും. ഇഡ്ഡലി,​ ദോശ,​ പുട്ട് ഇതൊക്കെയാണ് മലയാളികളുടെ സ്ഥിരം പ്രഭാത ഭക്ഷണങ്ങൾ.

സാധാരണ ഇഡ്ഡലിയിൽ നിന്ന് അല്പം വ്യത്യസ്തമായി കുറച്ചുകൂടി ആരോഗ്യകരമായൊരു വിഭവം തയ്യാറാക്കിയാലോ?​ പ്രഭാതഭക്ഷണത്തിന് ഏറെ അനുയോജ്യമായ ചെറുപയർ ഇഡ്ഡലി തയ്യാറാക്കാൻ വളരെ എളുപ്പമാണ്. ചെറുപയറിനൊപ്പം ഉഴുന്ന് പരിപ്പും അവലും ചേർത്താണ് ഈ ഇഡ്ഡലി തയ്യാറാക്കുന്നത്.

ചേരുവകൾ

• ചെറുപയർ – 1 കപ്പ്

• ഉഴുന്ന് – ½ കപ്പ്

• അവൽ – ¼ കപ്പ്

• ഉലുവ – ½ ടീസ്പൂൺ

• ഉപ്പ് – ആവശ്യത്തിന്

• വെള്ളം – ആവശ്യത്തിന്

തയ്യാറാക്കുന്ന വിധം

ആദ്യം ചെറുപയർ നന്നായി കഴുകിയ ശേഷം 5–6 മണിക്കൂർ വെള്ളത്തിൽ കുതിർത്ത് വയ്ക്കുക. ഉഴുന്നും ഉലുവയും വേറെ പാത്രത്തിൽ കുതിർക്കണം. അവൽ 15 മിനിറ്റോളം വെള്ളത്തിൽ കുതിർത്ത് വയ്ക്കാം. ശേഷം കുതിർന്ന ഉഴുന്ന് പരിപ്പും ഉലുവയും ചേർത്ത് മൃദുവായി അരച്ചെടുക്കുക. പിന്നാലെ ചെറുപയറും അവലും ചേർത്ത് അല്പം തരിയുള്ള രീതിയിൽ അരച്ചെടുക്കാം.

രണ്ട് മാവുകളും ഒരുമിച്ച് ചേർത്ത് ആവശ്യത്തിന് ഉപ്പ് ചേർത്ത് നന്നായി ഇളക്കുക. മാവ് 6–8 മണിക്കൂർ പുളിക്കാൻ വയ്ക്കണം. പുളിച്ച ശേഷം ഇഡ്ഡലി തട്ടിൽ അൽപ്പം എണ്ണ പുരട്ടി മാവ് ഒഴിക്കുക. 10–12 മിനിറ്റ് ആവിയിൽ വേവിച്ചാൽ മൃദുവായ ചെറുപയർ ഇഡ്ഡലി തയ്യാറാകും. ചൂടോടെ ചമ്മന്തിക്കും സാമ്പാറിനുമൊപ്പം വിളമ്പാം. രുചിയിൽ വ്യത്യസ്തത തേടുന്നവർക്കും പതിവ് പ്രഭാതഭക്ഷണത്തിൽ മാറ്റം ആഗ്രഹിക്കുന്നവർക്കും പരീക്ഷിക്കാവുന്ന ലളിതമായൊരു വിഭവമാണിത്.