മഴക്കാലത്ത് കുടിക്കാൻ 'ഈസി സൂപ്പ്': രുചി മാത്രമല്ല ജലദോഷമകറ്റാനും ഇത് ബെസ്റ്റ്

കേരളത്തിൽ കാലവർഷം സജീവമായതോടെ തണുപ്പ് കൂടിയതിനൊപ്പം ആരോഗ്യപ്രശ്നങ്ങളും കൂടിയിട്ടുണ്ട്. പനിയും ജലദോഷവും മഴയുടെ തണുപ്പ് ആസ്വദിക്കുന്നതിന് വില്ലനായി മാറുന്ന സാഹചര്യമാണ് നിലവിലുള്ളത്. അതുകൊണ്ട് തന്നെ മഴക്കാലത്ത് ഭക്ഷണകാര്യത്തിൽ കൂടുതൽ ശ്രദ്ധ പുലർത്തേണ്ടത് അത്യാവശ്യമാണ്. എണ്ണയിൽ പൊരിച്ച പലഹാരങ്ങൾക്ക് പകരം ശരീരത്തിന് ചൂടും പോഷകങ്ങളും നൽകുന്ന ഭക്ഷണങ്ങൾ തിരഞ്ഞെടുക്കുന്നതാണ് നല്ലത്. ഇത്തരത്തിലുള്ള ഭക്ഷണ രീതി മഴക്കാലത്തെ ആരോഗ്യപ്രശ്നങ്ങളെ അകറ്റാൻ സഹായകരമാകുമെന്നാണ് ആരോഗ്യ വിദഗ്ധർ ചൂണ്ടിക്കാണിക്കുന്നത്.

മഴക്കാലത്ത് ജലദോഷം, പനി, തൊണ്ടവേദന, ദഹനസംബന്ധമായ അസ്വസ്ഥതകൾ എന്നിവ അകറ്റുന്നതിനും ഏറെ സ്വാദിഷ്ടമായി ഭക്ഷണം കഴിക്കുന്നതിനുമുളള എളുപ്പമാർഗമാണ് സൂപ്പുകൾ. മഴക്കാലത്തെ തണുപ്പിൽ നിന്നും ആരോഗ്യപ്രശ്നങ്ങളിൽ നിന്നും രക്ഷനേടാനും പ്രതിരോധശേഷി വർദ്ധിപ്പിക്കാനും ചൂടുള്ള സൂപ്പുകൾ ഭക്ഷണക്രമത്തിൽ ഉൾപ്പെടുത്തുന്നത് വളരെ നല്ലതാണ്.

ശരീരത്തിൽ ചൂട് നിലനിർത്തുന്നതിനൊപ്പം പോഷക സമൃദ്ധവുമായ സൂപ്പുകളാണ് ചോളം-പച്ചക്കറി സൂപ്പ്,​ചിക്കൻ-മഞ്ഞൾ സൂപ്പ് എന്നിവ. കുറഞ്ഞ ചേരുവകൾ കൊണ്ട് എളുപ്പത്തിൽ വീട്ടിൽ തയ്യാറാക്കാവുന്നവയാണ് ഇവ. സ്വാദിനൊപ്പം ദഹിക്കാൻ എളുപ്പവുമായ ഈ സൂപ്പുകൾ മഴക്കാലത്ത് കുട്ടികളിലും മുതിർന്നവരിലും ഉണ്ടാകുന്ന കഫക്കെട്ട്,​ ചുമ എന്നീ രോഗങ്ങൾ എളുപ്പത്തിൽ മാറ്റും.

ചോളം-പച്ചക്കറി സൂപ്പ് - ആവശ്യമായ ചേരുവകൾ

സ്വീറ്റ് കോൺ (ചോളം): 1.5 കപ്പ് (പകുതി അരച്ചതും പകുതി മുഴുവനായും)

കാരറ്റ്, ബീൻസ്: അര കപ്പ് വീതം (പൊടിയായി അരിഞ്ഞത്)

ഇഞ്ചി, വെളുത്തുള്ളി: 1 ടീസ്പൂൺ വീതം (പൊടിയായി അരിഞ്ഞത്)

പച്ചമുളക്: 1 എണ്ണം (ചെറിയ കഷ്ണങ്ങളാക്കിയത്)

കോൺസ്റ്റാർച്ച് (കോൺഫ്ലോർ): 1.5 ടേബിൾസ്പൂൺ (കുറച്ചു വെള്ളത്തിൽ കലക്കിയത്)

കുരുമുളക് പൊടി: 1 ടീസ്പൂൺ

സവാള അല്ലെങ്കിൽ സ്പ്രിംഗ് ഒനിയൻ: 2 ടേബിൾസ്പൂൺ

ഉപ്പ്, എണ്ണ അല്ലെങ്കിൽ വെണ്ണ: ആവശ്യത്തിന്

വെള്ളം അല്ലെങ്കിൽ പച്ചക്കറി വേവിച്ച വെള്ളം (സ്റ്റോക്ക്): 4 കപ്പ്

തയ്യാറാക്കുന്ന വിധം

ഒരു കപ്പ് ചോളം മിക്സിയിൽ അല്പം വെള്ളം ചേർത്ത് പേസ്റ്റ് രൂപത്തിൽ അരച്ചെടുക്കുക. ഒരു പാത്രത്തിൽ എണ്ണ ചൂടാക്കി ഇഞ്ചി, വെളുത്തുള്ളി, പച്ചമുളക് എന്നിവ വഴറ്റുക. ഇതിലേക്ക് സവാളയും പച്ചക്കറികളും (കാരറ്റ്, ബീൻസ്) ചേർത്ത് 2 മിനിറ്റ് വേവിക്കുക. ബാക്കിവച്ച ചോളവും അരച്ചുവച്ച ചോളവും ചേർക്കുക. ശേഷം 4 കപ്പ് വെള്ളവും ആവശ്യത്തിന് ഉപ്പും ചേർത്ത് 5 മിനിറ്റ് തിളപ്പിക്കുക. തിളച്ചുവരുമ്പോൾ കോൺഫ്ലോർ കലക്കിയത് ഒഴിച്ച് സൂപ്പ് കട്ടിയാകുന്നതുവരെ ഇളക്കുക. ഒടുവിൽ കുരുമുളക് പൊടിയും സ്പ്രിംഗ് ഒനിയനും ചേർത്ത് ചൂടോടെ വിളമ്പാം.

ചിക്കൻ-മഞ്ഞൾ സൂപ്പ് - ആവശ്യമായ ചേരുവകൾ

• ആവശ്യമായവ: ചിക്കൻ, മഞ്ഞൾപ്പൊടി, ഉള്ളി, വെളുത്തുള്ളി, കുരുമുളക്.
• തയ്യാറാക്കുന്ന വിധം: ചിക്കൻ വേവിച്ച വെള്ളത്തിലേക്ക്(സ്റ്റോക്ക്)​ പാകമായ ചിക്കൻ ഉടച്ചതും മഞ്ഞൾപ്പൊടിയും വെളുത്തുള്ളിയും കുരുമുളകും ചേർത്ത് തിളപ്പിക്കുക.

ഇത് തൊണ്ടവേദനയ്ക്ക് പെട്ടെന്ന് ആശ്വാസം നൽകും.

മഴക്കാലത്ത് കഴിക്കാൻ അനുയോജ്യമായ മറ്റ് സൂപ്പുകൾ

പച്ചക്കറി സൂപ്പ്: കാരറ്റ്, ബീൻസ്, മത്തങ്ങ തുടങ്ങിയ പച്ചക്കറികൾ ഉപയോഗിച്ച് തയ്യാറാക്കുന്ന സൂപ്പുകൾ പോഷകസമൃദ്ധവും ദഹിക്കാൻ എളുപ്പവുമാണ്.

തക്കാളി സൂപ്പ്: ആന്റിഓക്‌സിഡന്റുകളാൽ സമ്പന്നമായ തക്കാളി സൂപ്പ്, മഴക്കാലത്തെ തണുപ്പകറ്റി ഊർജ്ജം നൽകാൻ സഹായിക്കുന്നു.

മുരിങ്ങയില സൂപ്പ്: വിറ്റാമിനുകളും ധാതുക്കളും അടങ്ങിയ മുരിങ്ങയില സൂപ്പ് രോഗപ്രതിരോധ ശേഷി വർദ്ധിപ്പിക്കാൻ വളരെ ഉത്തമമാണ്.