ഹൃദയാരോഗ്യത്തിൽ ഫിസിയോതെറാപ്പിയുടെ പങ്ക്

ആരോഗ്യകരമായ ജീവിതത്തിന് ചലനം അനിവാര്യമാണ്. ശരീരത്തിന്റെ ചലനശേഷിയും ശാരീരിക പ്രവര്‍ത്തനക്ഷമതയും പുനഃസ്ഥാപിക്കാനും നിലനിര്‍ത്താനും മെച്ചപ്പെടുത്താനും സഹായിക്കുന്ന ആരോഗ്യപരിചരണ ശാഖയാണ് ഫിസിയോതെറാപ്പി. രോഗം വന്നതിനുശേഷമുള്ള ചികിത്സയില്‍ മാത്രം ഒതുങ്ങുന്നതല്ല ഇതിന്റെ പ്രാധാന്യം. രോഗപ്രതിരോധം, ദീര്‍ഘകാല രോഗനിയന്ത്രണം, പുനരധിവാസം എന്നിവയിലും ഫിസിയോതെറാപ്പിക്ക് നിര്‍ണായക പങ്കുണ്ട്.

എല്ലാ വര്‍ഷവും സെപ്തംബര്‍ 8 ലോക ഫിസിയോതെറാപ്പി ദിനമായി ആചരിക്കുന്നു. 1951-ല്‍ വേള്‍ഡ് ഫിസിയോതെറാപ്പി സ്ഥാപിതമായതിന്റെ സ്മരണയ്ക്കായാണ് ഈ ദിനം ആചരിക്കുന്നത്. 1996-ലാണ് സെപ്തംബര്‍ 8 ലോക ഫിസിയോതെറാപ്പി ദിനമായി പ്രഖ്യാപിച്ചത്. 2026-ലെ പ്രമേയം ഹൃദയ-രക്തക്കുഴല്‍ രോഗങ്ങളും പക്ഷാഘാതവും തടയുന്നതിലും ചികിത്സയിലും പുനരധിവാസത്തിലും ഫിസിയോതെറാപ്പിയുടെയും ശാരീരിക പ്രവര്‍ത്തനത്തിന്റെയും പങ്കിനെ കേന്ദ്രീകരിച്ചുള്ളതാണ്.

ഹൃദയ-രക്തക്കുഴല്‍ രോഗങ്ങള്‍ ലോകത്തിലെ പ്രധാന മരണകാരണങ്ങളിലൊന്നാണ്. ശാരീരിക പ്രവര്‍ത്തനങ്ങളുടെ കുറവ്, അമിതവണ്ണം, അനാരോഗ്യകരമായ ഭക്ഷണശീലം, പുകവലി, ദീര്‍ഘനേരം ഇരുന്നുള്ള ജീവിതശൈലി എന്നിവ രോഗസാധ്യത വര്‍ധിപ്പിക്കാം. അതിനാല്‍ ക്രമമായ ശാരീരിക പ്രവര്‍ത്തനവും അനുയോജ്യമായ വ്യായാമവും ആരോഗ്യകരമായ ജീവിതത്തിന്റെ ഭാഗമാക്കേണ്ടത് പ്രധാനമാണ്.

ഓരോ വ്യക്തിയുടെയും പ്രായം, ആരോഗ്യസ്ഥിതി, ശാരീരിക ശേഷി, നിലവിലുള്ള രോഗങ്ങള്‍ എന്നിവ വിലയിരുത്തി സുരക്ഷിതമായ വ്യായാമക്രമം നിര്‍ദ്ദേശിക്കുന്നതില്‍ ഫിസിയോതെറാപ്പിസ്റ്റുകള്‍ക്ക് പ്രത്യേക വൈദഗ്ധ്യമുണ്ട്. പ്രമേഹം, അമിതവണ്ണം, ഉയര്‍ന്ന രക്തസമ്മര്‍ദ്ദം തുടങ്ങിയ ജീവിതശൈലി രോഗങ്ങളുള്ളവരിലും ശാരീരിക പ്രവര്‍ത്തനങ്ങള്‍ ക്രമീകരിക്കുന്നതില്‍ ഫിസിയോതെറാപ്പിസ്റ്റിന്റെ മാര്‍ഗ്ഗനിര്‍ദ്ദേശം പ്രയോജനകരമാണ്.

പക്ഷാഘാതത്തിന് ശേഷമുള്ള പുനരധിവാസത്തിലും ഫിസിയോതെറാപ്പി നിര്‍ണ്ണായകമാണ്. പേശികളുടെ ശക്തി, ബാലന്‍സ്, ഏകോപനം, നടക്കാനുള്ള കഴിവ്, കൈകാലുകളുടെ പ്രവര്‍ത്തനം, ദൈനംദിന പ്രവര്‍ത്തനങ്ങളിലെ സ്വാതന്ത്ര്യം എന്നിവ മെച്ചപ്പെടുത്താന്‍ വ്യക്തിഗത ചികിത്സാ പദ്ധതികള്‍ സഹായിക്കുന്നു. രോഗിയുടെ കുടുംബാംഗങ്ങള്‍ക്ക് പരിശീലനവും നല്‍കുന്നത് പുനരധിവാസത്തിന്റെ ഭാഗമാണ്.

സ്‌ട്രെച്ചിംഗ്, പേശിശക്തി വര്‍ധിപ്പിക്കുന്ന വ്യായാമങ്ങള്‍, ഫ്‌ലെക്‌സിബിലിറ്റി പരിശീലനം, ബാലന്‍സ്-കോ-ഓര്‍ഡിനേഷന്‍ വ്യായാമങ്ങള്‍, ഗെയ്റ്റ് ട്രെയിനിംഗ്, ഫങ്ഷണല്‍ എക്‌സര്‍സൈസുകള്‍ എന്നിവ ഫിസിയോതെറാപ്പിയിലെ പ്രധാന ചികിത്സാരീതികളാണ്. ആവശ്യാനുസരണം ചൂട്, തണുപ്പ്, വൈദ്യുത ഉത്തേജനം, അള്‍ട്രാസൗണ്ട്, ലേസര്‍/ഫോട്ടോ ബയോമോഡുലേഷന്‍ തുടങ്ങിയ ഫിസിക്കല്‍ മൊഡാലിറ്റികളും ഉപയോഗിക്കുന്നു.

പ്രായാധിക്യത്തോടനുബന്ധിച്ചുള്ള പേശീബലക്കുറവ്, ബാലന്‍സ് പ്രശ്‌നങ്ങള്‍, വീഴ്ചയ്ക്കുള്ള സാധ്യത എന്നിവ കുറയ്ക്കുന്നതിലും ഫിസിയോതെറാപ്പിക്ക് പങ്കുണ്ട്. ശരിയായ വ്യായാമത്തിലൂടെ പേശികളുടെ ശക്തിയും ശരീരത്തിന്റെ സന്തുലിതാവസ്ഥയും നിലനിര്‍ത്താന്‍ കഴിയും.ഹൃദയാഘാതം, ഹൃദയ ശസ്ത്രക്രിയ, ആന്‍ജിയോപ്ലാസ്റ്റി തുടങ്ങിയ ചികിത്സകള്‍ക്ക് ശേഷമുള്ള പുനരധിവാസത്തിലും ഫിസിയോതെറാപ്പി പ്രധാനമാണ്. രോഗിയുടെ സഹനശേഷി ക്രമേണ വര്‍ധിപ്പിക്കുക, സുരക്ഷിതമായി നടക്കാനും ദൈനംദിന പ്രവര്‍ത്തനങ്ങള്‍ ചെയ്യാനും പരിശീലിപ്പിക്കുക, വ്യായാമത്തോടുള്ള ശരീരത്തിന്റെ പ്രതികരണം നിരീക്ഷിക്കുക എന്നിവ ഇതിന്റെ ഭാഗമാണ്. ആശുപത്രിവാസത്തിന് ശേഷം വീട്ടിലും സമൂഹത്തിലും സജീവമായി തുടരാന്‍ ആവശ്യമായ ആത്മവിശ്വാസം വളര്‍ത്താനും ഫിസിയോതെറാപ്പിസ്റ്റിന് കഴിയും.

കുട്ടികള്‍ മുതല്‍ മുതിര്‍ന്നവര്‍ വരെ എല്ലാവര്‍ക്കും ഫിസിയോതെറാപ്പിയുടെ ഗുണം ലഭിക്കും. എന്നാല്‍ വ്യായാമത്തിന്റെ തീവ്രതയും ദൈര്‍ഘ്യവും വ്യക്തിയുടെ ആരോഗ്യനിലയ്ക്ക് അനുസരിച്ചായിരിക്കണം. നെഞ്ചുവേദന, അസാധാരണമായ ശ്വാസതടസ്സം, തലകറക്കം, അമിതമായ ക്ഷീണം തുടങ്ങിയ ലക്ഷണങ്ങള്‍ അനുഭവപ്പെടുകയാണെങ്കില്‍ വ്യായാമം നിര്‍ത്തി ഉടന്‍ വൈദ്യസഹായം തേടണം. രോഗമുള്ളവര്‍ സ്വയം കഠിനമായ വ്യായാമങ്ങള്‍ ആരംഭിക്കുന്നതിന് പകരം ഡോക്ടറുടെയും ഫിസിയോതെറാപ്പിസ്റ്റിന്റെയും നിര്‍ദ്ദേശം സ്വീകരിക്കുന്നതാണ് സുരക്ഷിതം.

ആധുനിക ഫിസിയോതെറാപ്പി ശാസ്ത്രീയ തെളിവുകള്‍, ക്ലിനിക്കല്‍ പരിചയം, രോഗിയുടെ വ്യക്തിഗത ആവശ്യങ്ങള്‍ എന്നിവ സംയോജിപ്പിച്ചുള്ള എവിഡന്‍സ്-ബേസ്ഡ് പ്രാക്ടീസിലാണ് അധിഷ്ഠിതമായിരിക്കുന്നത്. അതുകൊണ്ട് ഓരോ രോഗിക്കും ഒരേ ചികിത്സാരീതി നല്‍കുന്നതിനു പകരം ചികിത്സാ പദ്ധതി തയ്യാറാക്കുകയാണ് ഉചിതം. രോഗിയും കുടുംബവും ചികിത്സയില്‍ സജീവമായി പങ്കാളികളാകുമ്പോഴാണ് പുനരധിവാസത്തിന്റെ ഫലം കൂടുതല്‍ ഫലപ്രദമാകുന്നത്.

ഇന്നത്തെ തിരക്കേറിയ ജീവിതത്തില്‍ ദിവസവും കുറച്ച് സമയം ശരീരത്തിനായി മാറ്റിവയ്ക്കുക എന്നത് വലിയ നിക്ഷേപമാണ്. ദീര്‍ഘനേരം ഇരിക്കുന്നത് ഒഴിവാക്കി ഇടയ്ക്കിടെ എഴുന്നേറ്റ് നടക്കുക, ശാരീരിക പ്രവര്‍ത്തനങ്ങളില്‍ ഏര്‍പ്പെടുക, ആരോഗ്യകരമായ ഭക്ഷണം കഴിക്കുക, ശരീരഭാരം നിയന്ത്രിക്കുക എന്നിവ ഹൃദയാരോഗ്യത്തിനും ക്ഷേമത്തിനും സഹായിക്കും.ഈ ലോക ഫിസിയോതെറാപ്പി ദിനത്തില്‍ രോഗചികിത്സയ്ക്കപ്പുറം രോഗപ്രതിരോധത്തിനും ആരോഗ്യസംരക്ഷണത്തിനും ഫിസിയോതെറാപ്പിയുടെ പ്രാധാന്യം സമൂഹം തിരിച്ചറിയണം. ആരോഗ്യകരമായ ശരീരം സജീവമായ ജീവിതത്തിനും സ്വാതന്ത്ര്യത്തിനും ആത്മവിശ്വാസത്തിനും വഴിയൊരുക്കുന്നു.

Mrs. Sreedevi
HOD, Department of Physiotherapy
SUT Hospital, Pattom,TVM