ഡൽഹിയിൽ വോട്ടുപിടിക്കാൻ നായ്‌ക്കളും; നഗരത്തിലെ ഏറ്റവും തടിച്ച നായയെ ഇന്ന് കണ്ടെത്തും

ന്യൂഡൽഹി: രാഷ്‌ട്രീയപ്പോരുകൾക്ക് പേരുകേട്ട രാജ്യതലസ്ഥാനത്ത് ഇന്ന് നടക്കുന്നത് അൽപം വ്യത്യസ്‌തമായൊരു തിരഞ്ഞെടുപ്പാണ്. നഗരത്തിലെ ഏറ്റവും തടിച്ച നായയെ കണ്ടെത്തുന്നതിനുള്ള വൈറൽ മത്സരമായ 'ഫാറ്റ് ഡോഗ്‌സ് ഒഫ് ഡൽഹി' യുടെ ഗ്രാൻഡ് ഫിനാലെയാണ് ഇന്ന് നടക്കുന്നത്. ആഴ്‌ചകളോളം നീണ്ടുനിന്ന മത്സരത്തിലെ അവസാനഘട്ട വിജയിയെ ഇന്നറിയാം.

ഇൻസ്റ്റഗ്രാം പേജായ ഫാറ്റ് ഡോഗ്‌സ് ഒഫ് ഡൽഹിയാണ് മത്സരം സംഘടിപ്പിച്ചത്. ഡൽഹിനഗരത്തിന്റെ വിവിധ ഭാഗങ്ങളിൽനിന്നുള്ള 64 നായ്‌ക്കളാണ് മത്സരത്തിൽ പങ്കെടുത്തത്. ഇൻസ്റ്റഗ്രാം സ്റ്റോറികളിലൂടെയായിരുന്നു നോക്കൗട്ട് രീതിയിലുള്ള മത്സരം. ഇതോടെ വിവിധ പ്രദേശങ്ങളിലെ നായ്‌ക്കൾ സോഷ്യൽമീഡിയ താരങ്ങളായി മാറി. ഫാൻ ക്ലബുകൾ പ്രചാരണ പോസ്റ്ററുകളും വോട്ട് അഭ്യർത്ഥനകളുമായെത്തിയതോടെ മത്സരത്തിന് തിരഞ്ഞെടുപ്പ് ചൂടിന്റെ പ്രതീതി തന്നെയുണ്ടായി.