അഞ്ഞൂറ് രൂപ നോട്ട് കയ്യിലുണ്ടോ?​ എന്നാൽ ഇനി ജയിലിൽ കിടക്കാം

ഹൈദരാബാദ്: അഞ്ഞൂറ് രൂപ കയ്യിലുണ്ടെങ്കിൽ ഒരു ദിവസം ജയിലിൽ കഴിയാനൊരു അവസരം ഉണ്ട്. എവിടെയാണെന്നല്ലേ?​ ​ ഹൈദരാബാദ് ചഞ്ചൽ​ഗുഡയിലെ സ്റ്റേറ്റ് ഇൻസ്റ്റിറ്റ്യൂട്ട് ഓഫ് കറക്ഷൻ അഡ്മിനിസ്ട്രേഷനാണ് ഒരു ജയിൽ മ്യൂസിയം തുറന്നത്. ജയിൽ ജീവിതം, ദിനചര്യകൾ, ഭക്ഷണം എന്നിവയക്കുറിച്ച് സന്ദർശകർക്ക് ധാരണ നൽകുന്നതിനാണ് ഇങ്ങനെ ഒരു സംരംഭം ആരംഭിച്ചിരിക്കുന്നത്. ഏപ്രിൽ 28 മുതൽ 'ഫീൽ ദ ജയിലെന്ന' ഈ അവസരം വിനിയോ​ഗിക്കാൻ പൊതുജനങ്ങൾക്ക് അനുമതി നൽകി തുടങ്ങി.

'ഫീൽ ദ ജയിൽ' എന്ന സംരഭത്തിൽ 'വൺ ഡേ ജയിൽ എക്സ്പീരിയൻസ്' എന്ന പാക്കേജ് ഉൾപ്പെടുന്നു. ഈ ജയിൽ മ്യൂസിയത്തിൽ ഒരു ദിവസം ചെലവഴിക്കാൻ ഫീസായി അഞ്ഞൂറ് രൂപ മുൻകൂട്ടി അടച്ചാൽ മതിയാവും. ഫീസടക്കുന്ന ആളുകൾക്ക് യൂണിഫോമും പാത്രവും ഉൾപ്പെടെ ജയിലിലെ അന്തേവാസികൾ ഉപയോ​ഗിക്കുന്ന എല്ലാ സേവനങ്ങളും നൽകും. ജയിലിനകത്ത് പ്രവേശിക്കുന്നതിന് മുമ്പ് തങ്ങളുടെ ഫോൺ ഉൾപ്പെടെയുള്ള വസ്തുക്കൾ ജയിൽ അതോറിറ്റിയെ ഏൽപ്പിക്കണമെന്ന കർശന നിബന്ധനയുമുണ്ട്. വിനോദത്തേക്കാൾ കൂടുതൽ അവബോധമാണ് ഈ പദ്ധതിയിലൂടെ ലക്ഷ്യമിടുന്നത്.