പെർഫ്യൂം ചറപറാ അടിച്ചിട്ടും മണം നിൽക്കുന്നില്ലേ?​ ഇനിമുതൽ ഇങ്ങനെ ചെയ്യൂ,​ മണിക്കൂറുകൾ കഴിഞ്ഞാലും സുഗന്ധം നഷ്ടമാകില്ല​

നല്ലൊരു പെർഫ്യൂം ഉപയോഗിക്കുന്നതിലൂടെ വിയർപ്പിന്റെ ഗന്ധം ഒഴിവാക്കാമെന്നത് മാത്രമല്ല,​ ആത്മവിശ്വാസം വർദ്ധിപ്പിക്കാനും സാധിക്കും. ഈ സുഗന്ധം തലച്ചോറിനെ ഉത്തേജിപ്പിച്ച് ഉന്മേഷം നൽകുകയും സമ്മർദ്ദം കുറച്ച് മനസിന് ശാന്തത നൽകാനും സഹായിക്കുന്നു. ചെറിയ കുട്ടികൾ മുതൽ മുതിർന്നവർ വരെ പെർഫ്യൂം ഉപയോഗിക്കാത്തവരായി ആരുമില്ല എന്നതാണ് യാഥാർത്ഥ്യം.

ദീർഘനേരം പെർഫ്യൂമിന്റെ മണം നിലനിൽക്കാൻ എന്തുചെയ്യണം?​

എത്രതവണ സ്പ്രേ ചെയ്താലും ഉപയോഗിച്ച് കുറച്ചു കഴിഞ്ഞാൽ പെർഫ്യൂമിന്റെ സുഗന്ധം നഷ്ടമാകാറുണ്ടോ?​ ഒരു ദിവസം മുഴുവനുള്ള ജോലിക്കിടയിൽ വിയർപ്പിന്റെ ഗന്ധം ചിലരെ അലോസരപ്പെടുത്തുന്നുണ്ടാകും. എത്ര വില കൂടിയ പെർഫ്യൂം ഉപയോഗിച്ചിട്ടും ഈ അവസ്ഥയ്ക്ക് മാറ്റമില്ലെന്ന് വിഷമിക്കുന്നർക്ക് ഒരു എളുപ്പവഴിയുണ്ട്. നമ്മൾ ഉപയോഗിക്കുന്ന പെർഫ്യൂമിന്റെ മണം രാവിലെ മുതൽ രാത്രി വരെ ഫ്രഷ് ആയിത്തന്നെ നിലനിൽക്കാൻ ഇങ്ങനെ ചെയ്താൽ മതി.

• പെർഫ്യൂം അടിക്കുന്നതിനു മുൻപ് പെട്രോളിയം ജെല്ലി പുരട്ടുന്നത് ഏറെ നേരം മണം നിലനിർത്തുന്നതിന് സഹായിക്കും.
• കഴുത്തിനു പിന്നിൽ, കൈമുട്ടിന്റെ ഉൾവശം, റിസ്റ്റ് (കൈത്തണ്ട)​, ചെവിയുടെ പിൻവശം എന്നിങ്ങനെ ശരീരത്തിന്റെ പൾസ് പോയിന്റുകളിൽ പെർഫ്യൂം സ്പ്രേ ചെയ്യുക.
• പെർഫ്യൂം അടിച്ചശേഷം തിരുമ്മാൻ പാടില്ല.
• തലമുടി ചീകുന്നതിനു മുൻപ് അൽപം ഹെയർ മിസ്റ്റ് മുടിയിൽ സ്പ്രേ ചെയ്താൽ മുടി കേടുവരുത്താതെ നല്ല മണം നൽകാൻ സഹായിക്കും.