ഇതുകൊണ്ട് ഇങ്ങനെയും ഗുണമുണ്ടായിരുന്നോ? വൈ ഫൈ സ്പീഡ് കൂട്ടാൻ ഒരൊറ്റ അലുമിനിയം ഫോയിൽ പേപ്പർ മതി

ഡാറ്റ ഉപഭോഗം വർദ്ധിക്കുന്ന ഈ കാലത്ത് പലരും ഏറ്റവും കൂടുതൽ ആശ്രയിക്കുന്ന ഒന്നാണ് 'വൈഫൈ'. സ്‌മാർട്ട്‌ഫോൺ, ടാബ്‌ലെറ്റ്, കമ്പ്യൂട്ട‌ർ, ലാപ്ടോപ്പ് തുടങ്ങിയ ഉപകരണങ്ങൾ ഇന്റർനെറ്റുമായി ബന്ധിപ്പിക്കുന്നതിനുള്ള മികച്ച മാർഗങ്ങളിലൊന്നാണ് വൈഫൈ.

വീട്ടിൽ വൈ-ഫൈ ഉണ്ടെങ്കിലും മികച്ച സിഗ്നൽ ലഭിക്കുന്നില്ല എന്ന പ്രശ്‍നം പലർക്കും അനുഭവപ്പെടാറുണ്ട്. ജോലി സംബന്ധമായുള്ള മീറ്റിംഗുകൾക്കിടയിൽ സിഗ്നൽ ലഭിക്കാതെ വരുന്നത് പലരെയും പ്രതിസന്ധിയിലാക്കാറുണ്ട്. ഇത്തരം സാഹചര്യങ്ങളിൽ എന്ത് ചെയ്യണമെന്നറിയാതെ നിൽക്കേണ്ടിവരും. എന്നാൽ ഇനി ഇത്തരം പ്രശ്നങ്ങൾ ഉണ്ടാകില്ല. അഥവാ ഉണ്ടായാൽ കയ്യിൽ അലുമിനിയം ഫോയിൽ മാത്രം മതി, വളരെ എളുപ്പത്തിൽ ഈ പ്രശ്നം പരിഹരിക്കാൻ സാധിക്കും.

കേൾക്കുമ്പോൾ അത്ഭുതം തോന്നുമെങ്കിലും സംഭവം സിമ്പിളാണ്. ആദ്യം ഒരു കാർഡ്ബോർഡ് റോളിൽ അലുമിനിയം ഫോയിൽ പേപ്പർ നന്നായി ചുറ്റണം. ശേഷം ഇത് റൂട്ടറിന്റെ ആന്റിനയിൽ ഘടിപ്പിക്കണം. ഇത് റേഡിയോ തരംഗങ്ങളെ പ്രതിഫലിപ്പിച്ച് സിഗ്നൽ വർദ്ധിപ്പിക്കുന്നു. ഇതുവഴി നിങ്ങൾക്ക് വൈഫൈ സ്പീഡ് കൂട്ടാനാകും. കുറഞ്ഞ ചിലവിലുള്ള ഇത്തരം റിഫ്ലക്ടറുകൾ വയർലെസ് കവറേജ് വർദ്ധിപ്പിക്കുമെന്ന് ഡാർട്ട്മൗത്ത് വൈപ്രിന്റ് ഗവേഷണം സ്ഥിരീകരിച്ചിട്ടുണ്ട്.