വികൃതമുഖക്കാരായി പോകുന്ന ഇരട്ടമുഖക്കാർ!

''എന്താണ് ഭാഷയിലെ 'രൂപക പ്രയോഗ'മെന്നറിയാമോ? അത്, ഭാഷയെ കൂടുതൽ മനോഹരവും, ശക്തവും ഹൃദയസ്പർശിയുമാക്കുന്നു! അപ്പോൾ എന്തായിരിക്കും 'രൂപകപ്രയോഗം': 'രൂപകപ്രയോഗ'മെന്നാൽ, ഒരു വസ്തുവിനേയോ, വ്യക്തിയേയോ മറ്റൊന്നായി സങ്കല്പിച്ചു പറയുന്ന പ്രയോഗമാണ്. ഉദാഹരണമായി: 'അവൻ ഒരു സിംഹമാണ്' ഇത് രൂപകം. എന്നാൽ, 'അവൻ ഒരു സിംഹത്തെപ്പോലെയാണ്. 'ഇത് ഉപമ. 'ഇരട്ടമുഖം' എന്നത് മലയാളത്തിലെ ഒരു രൂപകപ്രയോഗമാണ്. ഇതിന്റെ അർത്ഥം: പുറമേ ഒരു സ്വഭാവം കാണിക്കുകയും, ഉള്ളിൽ മറ്റൊരു ഉദ്ദേശമോ, നിലപാടോ സൂക്ഷിക്കുകയും ചെയ്യുന്ന വ്യക്തിയെന്നാണ്. കാപട്യമുള്ള പെരുമാറ്റം, ഒരാളുടെ മുന്നിൽ സ്‌നേഹവും പിന്തുണയും പ്രകടിപ്പിച്ച്, പിന്നിൽ അവരെ വിമർശിക്കുകയോ ഉപദ്രവിക്കുകയോ ചെയ്യുക. വാക്കും പ്രവൃത്തിയും തമ്മിൽ പൊരുത്തമില്ലാത്ത അവസ്ഥ. ഉദാഹരണങ്ങൾ: അയാൾ എല്ലാവരോടും പുഞ്ചിരിച്ചാണ് സംസാരിക്കുന്നത്, പക്ഷേ പിന്നിൽ അവരെക്കുറിച്ച് അപവാദം പ്രചരിപ്പിക്കുന്നു. അത് ഇരട്ടമുഖത്തിന്റെ ലക്ഷണമാണ്. ഇപ്പോൾ നിങ്ങൾ കണ്ടിട്ടുള്ള എത്രമുഖങ്ങൾ ഓർമ്മവന്നു! പുറമെ സൗഹൃദം, ഉള്ളിൽ വൈരം. കാപട്യം. ഇരട്ടമുഖം: കുറച്ചുകാലം ആളുകളെ വഞ്ചിക്കാൻ കഴിഞ്ഞേക്കാം; എന്നാൽ സത്യം വൈകിയാലും വെളിച്ചത്ത് വരും. വിശ്വാസം ഒരിക്കൽ നഷ്ടപ്പെട്ടാൽ അത് വീണ്ടെടുക്കുക സാധ്യമല്ലല്ലോ!' ഇത്രയും പറഞ്ഞുകൊണ്ട് പ്രഭാഷകൻ, സദസ്യരെ നോക്കിയപ്പോൾ മിക്കവരും ഏതോ മുഖങ്ങളെ തേടുന്ന ഭാവത്തിലായിരുന്നു. പുഞ്ചിരിയോടെ പ്രഭാഷകൻ ഇപ്രകാരം തുടർന്നു:

''ഇരട്ട വ്യക്തിത്വം സമൂഹത്തിലെ നിശ്ശബ്ദ വെല്ലുവിളിയാണ്. മനുഷ്യനെ വിലയിരുത്തുന്നത് അവന്റെ വാക്കുകളിലൂടെയല്ല, പ്രവൃത്തികളിലൂടെയാണ്. എന്നാൽ, ഇന്നത്തെ സമൂഹത്തിൽ ചിലർ ഒരു മുഖം ലോകത്തിനും മറ്റൊരു മുഖം സ്വകാര്യജീവിതത്തിനുമായി സൂക്ഷിക്കുന്നു. ഈ അവസ്ഥയെ സാധാരണ ഭാഷയിൽ 'ഇരട്ടവ്യക്തിത്വം' അല്ലെങ്കിൽ 'ഇരട്ട മുഖം' എന്ന് വിശേഷിപ്പിക്കാറുണ്ട്. ഇത്തരം ആളുകൾ മറ്റുള്ളവരുടെ മുന്നിൽ സ്‌നേഹവും കരുണയും സത്യസന്ധതയും പ്രകടിപ്പിക്കും. എന്നാൽ, അതേ ആളുകളെ പിന്നിൽ നിന്ന് വിമർശിക്കുകയോ, അവരുടെ വിശ്വാസത്തെ വഞ്ചിക്കുകയോ ചെയ്‌തേക്കാം. അവരുടെ വാക്കും പ്രവൃത്തിയും തമ്മിൽ പൊരുത്തക്കേട് കാണാം. ഇത്തരത്തിലുള്ള പെരുമാറ്റം കുടുംബബന്ധങ്ങളെയും സൗഹൃദങ്ങളെയും തൊഴിൽബന്ധങ്ങളെയും ദുർബലമാക്കുന്നു.

അതേസമയം, ഓരോരുത്തരും ജീവിതത്തിൽ പല വേഷങ്ങൾ കൈകാര്യം ചെയ്യുന്നു. വീട്ടിൽ മാതാവോ, പിതാവോ മകനോ, മകളോ, ജോലിസ്ഥലത്ത് ജീവനക്കാരനോ ഉദ്യോഗസ്ഥനോ, സമൂഹത്തിൽ ഒരു പൗരനോ. ഈ വ്യത്യസ്ത വേഷങ്ങൾക്കനുസരിച്ച് പെരുമാറ്റത്തിൽ മാറ്റം വരുന്നത് സ്വാഭാവികമാണ്. അത് ഇരട്ട വ്യക്തിത്വമല്ല. യഥാർത്ഥ പ്രശ്‌നം, ഒരാൾ മനപ്പൂർവ്വം മറ്റുള്ളവരെ തെറ്റിദ്ധരിപ്പിക്കുകയോ സ്വന്തം ലാഭത്തിനായി മുഖംമൂടി മാറിമാറി ധരിക്കുകയോ ചെയ്യുമ്പോഴാണ്. വിശ്വാസമാണ് മനുഷ്യബന്ധങ്ങളുടെ അടിത്തറ. ഒരിക്കൽ വിശ്വാസം നഷ്ടപ്പെട്ടാൽ അത് വീണ്ടെടുക്കുക പ്രയാസമാണ്. അതുകൊണ്ട് ജീവിതത്തിൽ വാക്കിലും പ്രവൃത്തിയിലും ആത്മാർത്ഥതയും സത്യസന്ധതയും പുലർത്താൻ ശ്രമിക്കണം. ഇരട്ടമുഖം താത്ക്കാലികമായി ചില നേട്ടങ്ങൾ നൽകുമെങ്കിലും, ദീർഘകാലത്ത് അത് വിശ്വാസവും, ബന്ധങ്ങളും നഷ്ടപ്പെടുത്തും. ആത്മാർത്ഥതയും, സത്യസന്ധതയുമുള്ള വ്യക്തിത്വമാണ് മനുഷ്യന്റെ ഏറ്റവും വലിയ സമ്പത്ത്." ഇപ്രകാരം പ്രഭാഷകൻ നിർത്തിയപ്പോൾ, സദസ്യരിൽ മിക്കവരുടെയുള്ളിലും വെറുക്കപ്പെടേണ്ട ചില വികൃത വ്യക്തിത്വങ്ങൾ മിന്നിമറയുന്നുണ്ടായിരുന്നു!