നവരാത്രി പൂജയുടെ നാലാം ദിനം, ഭക്തിയോടെ ആരാധിച്ചാൽ ആഗ്രഹങ്ങൾ നടപ്പിലാക്കുന്ന ദേവിയുടെ അനുഗ്രഹം തേടാം

റാംസാഗർ തമ്പുരാൻ, അസ്ട്രോ ന്യൂമറോളജിസ്റ്റ്, ഫോൺ : 91+83010 36352, വാട്സാപ്പ് : 91+7907244210, ഇമെയിൽ: samkhiyarathnam@gmail.com

നവരാത്രി പൂജ നാലാം ദിനം
2026 ഒക്ടോബർ 14 (1202 കന്നി 28) ബുധനാഴ്ച

മാതാ കൂഷ്മാണ്ഡ

ഹൈന്ദവ വിശ്വാസപ്രകാരം കാളികുല വിധി പ്രകാരം മഹാദേവിയുടെ നവദുർഗ രൂപങ്ങളിലെ നാലാമത്തെ ഭാവമാണ് കൂഷ്മാണ്ഡ. ഒമ്പത് ഭാവങ്ങളായ നവദുർഗമാരിൽ നാലാമത്തെ ദേവിയാണ് കൂഷ്മാണ്ഡ. നവരാത്രി ആഘോഷങ്ങളുടെ നാലാം ദിവസമാണ് ദേവിയെ പ്രത്യേകമായി ആരാധിക്കുന്നത്. പ്രപഞ്ചത്തിന്റെ സ്രഷ്ടാവായാണ് കൂഷ്മാണ്ഡ ദേവി അറിയപ്പെടുന്നത്.

പേരിന് പിന്നിലെ അർത്ഥം
കു എന്നാൽ 'ചെറിയ', ഉഷ്മ എന്നാൽ 'ഊർജ്ജം അല്ലെങ്കിൽ പുഞ്ചിരി', അണ്ഡ എന്നാൽ 'പ്രപഞ്ച മുട്ട' (കോസ്‌മിക് എഗ്ഗ്) എന്നിങ്ങനെയാണ് അർത്ഥം. പ്രപഞ്ചം മുഴുവൻ ഇരുളിൽ മുങ്ങിയിരുന്ന സമയത്ത് ദേവി തന്റെ ചെറിയൊരു മന്ദഹാസത്തിലൂടെ പ്രപഞ്ചത്തെയും പ്രകാശത്തെയും സൃഷ്ടിച്ചു എന്നാണ് പുരാണങ്ങൾ പറയുന്നത്. അതുകൊണ്ട് ദേവിയെ പ്രപഞ്ചത്തിന്റെ ആദിശക്തിയായി കണക്കാക്കുന്നു.

സങ്കൽപ്പിക്കാൻ പോലും കഴിയാത്തത്ര കാലം മുമ്പ്, മാതാ കൂഷ്മാണ്ഡ പ്രപഞ്ച മുട്ടയിൽ നിന്ന് പ്രപഞ്ചം സൃഷ്ടിച്ചുവെന്ന് പറയപ്പെടുന്നു. ആ സമയത്ത്, സമയം പോലും നിലവിലില്ലായിരുന്നു. ദേവി കൂഷ്മാണ്ഡ നേരിയ ഭക്തിയിലും സന്തുഷ്ടയാകുന്നു. ആരെങ്കിലും ശ്രദ്ധയോടെ (ഭക്തിയോടെ) ദേവിയെ ആരാധിച്ചാൽ, അമ്മ തീർച്ചയായും അയാൾക്ക് ആഗ്രഹിക്കുന്നതെല്ലാം നൽകി അനുഗ്രഹിക്കും. സംസ്കൃതത്തിൽ വെളുത്ത മത്തങ്ങയ്ക്ക് 'കൂഷ്മാണ്ഡം' എന്ന് പറയും. ദേവിക്ക് ഈ മത്തങ്ങ ബലി നൽകുന്നത് ഏറെ ഇഷ്ടമുള്ളകാര്യമായതിനാലും ഈ പേര് ലഭിച്ചു.

• അഷ്ടഭുജാ ദേവി: എട്ട് കൈകളുള്ള രൂപത്തിലാണ് ദേവിയെ ചിത്രീകരിക്കുന്നത്.
• ആയുധങ്ങളും ചിഹ്നങ്ങളും: ദേവിയുടെ കൈകളിൽ കമണ്ഡലു, വില്ല്, അമ്പ്, താമര, അമൃത് നിറഞ്ഞ കലശം, ചക്രം, ഗദ എന്നിവയുണ്ട്. എട്ടാമത്തെ കൈയിൽ എല്ലാ സിദ്ധികളും നിധികളും നൽകാൻ ശേഷിയുള്ള ജപമാലയുമുണ്ട്.
• വാഹനം- സിംഹം.
• വാസസ്ഥലം- കൈലാസം.

സൂര്യന്റെ അന്തർഭാഗത്ത് വസിക്കാൻ ശേഷിയുള്ള ഏക ശക്തി കൂഷ്മാണ്ഡ ദേവിയാണ്. സൂര്യന്റെ തിളക്കവും ഊർജ്ജവും നിയന്ത്രിക്കുന്നത് ഈ ദേവിയാണെന്നാണ് വിശ്വാസം.

മന്ത്രം: "സുരാസമ്പൂർണ്ണകലശം രുധിരാപ്ലുതമേവ ചദധാനാ ഹസ്തപദ്മാഭ്യാം കൂഷ്മാണ്ഡാ ശുഭദാസ്തു മേ"

കൂഷ്മാണ്ഡ ദേവിയെ ഭക്തിയോടെ ആരാധിച്ചാൽ രോഗങ്ങളിൽ നിന്നും ദുരിതങ്ങളിൽ നിന്നും മുക്തി ലഭിക്കും. ആയുസ്സ്, ആരോഗ്യം, യശസ്സ്, ഐശ്വര്യം എന്നിവ വർദ്ധിക്കുമെന്നാണ് ഭക്തരുടെ വിശ്വാസം. കുഷ്മാണ്ഡ ദേവിയെ ഭക്തിപൂർവ്വം ആരാധിക്കുന്നതിലൂടെ ആരോഗ്യം മെച്ചപ്പെടുത്തുകയും സമ്പത്തും ശക്തിയും നൽകുകയും ചെയ്യുമെന്ന് വിശ്വസിക്കപ്പെടുന്നു.

യോഗശാസ്ത്ര പ്രകാരം ഹൃദയഭാഗത്തുള്ള അനാഹത ചക്രത്തെയാണ് ദേവി നിയന്ത്രിക്കുന്നത്. സ്ഥിരമായ മനസോടെ ഒരു വ്യക്തി കൂഷ്മാണ്ഡയെ ധ്യാനിക്കുമ്പോൾ, അയാളുടെ അനാഹത ചക്രം സജീവമാവുകയും ദുഃഖങ്ങളും രോഗങ്ങളും അപ്രത്യക്ഷമാവുകയും, ആയുസ്സ്, പേര്, ശക്തി എന്നിവ വർദ്ധിക്കുകയും ചെയ്യുന്നു.

തുടരും......