പ്ലസ് ടു പാസായവർക്ക് കേന്ദ്ര സർവകലാശാലയിൽ അഡ്‌മിഷൻ നേടാം; പ്രവേശന പരീക്ഷയ്‌ക്കായി ഓഗസ്റ്റ് ഏഴ് മുതൽ അപേക്ഷിക്കൂ

ഡൽഹി ദേശീയ നിയമ സർവകലാശാലയിലെ ബിഎ എൽഎൽബി (അഞ്ച് വർഷം), എൽഎൽഎം (ഒരു വർഷം) കോഴ്‌സുകളിലേക്കുള്ള പ്രവേശനത്തിനായി നടത്തുന്ന ഓൾ ഇന്ത്യ ലോ എൻട്രൻസ് പരീക്ഷ ഡിസംബർ 13ന് നടക്കും. ഇതിനായി ഈ മാസം ഏഴാം തീയതി മുതൽ സർവകലാശാലയുടെ ഔദ്യോഗിക വെബ്‌സൈറ്റിലൂടെ (nationallawuniversitydelhi.in) അപേക്ഷിക്കാവുന്നതാണ്. 3,000 രൂപയാണ് അപേക്ഷാ ഫീസ്. എസ്‌സി/എസ്‌ടി, ഭിന്നശേഷി വിഭാഗക്കാർക്ക് 1000 രൂപയാണ് ഫീസ്. ദാരിദ്ര്യരേഖയ്‌ക്ക് താഴെയുള്ള പട്ടിക വിഭാഗക്കാർക്കും വനിതകൾക്കും അപേക്ഷാ ഫീസ് ഇല്ല.

45 ശതമാനം മാർക്കോടെ പ്ലസ് ടു പാസായവ‌ർക്ക് എൽഎൽബിക്ക് അപേക്ഷിക്കാം. എസ്‌സി/എസ്‌ടി, ഭിന്നശേഷി വിഭാഗക്കാർക്ക് 40 ശതമാനവും ഒബിസി വിഭാഗക്കാർക്ക് 42 ശതമാനവും മാർക്ക് ഉണ്ടായിരുന്നാൽ മതി. 2027ൽ പ്ലസ് ടു പരീക്ഷ എഴുതുന്നവർക്കും അപേക്ഷിക്കാം. എൽഎൽബി 50 ശതമാനം മാർക്കോടെ ജയിച്ചവർക്ക് എൽഎൽഎമ്മിന് അപേക്ഷിക്കാം. എസ്‌സി/എസ്‌ടി, ഭിന്നശേഷി വിഭാഗക്കാർക്ക് 45 ശതമാനം മാർക്ക് ഉണ്ടായിരുന്നാൽ മതി. കോഴ്‌സിന്റെ അവസാന വർഷ വിദ്യാർത്ഥികൾക്കും അപേക്ഷിക്കാം. എൽഎൽബിക്ക് 120 സീറ്റും എൽഎൽഎമ്മിന് 81 സീറ്റുകളുമാണുള്ളത്. രണ്ട് കോഴ്‌സുകൾക്കും 1.56 ലക്ഷം രൂപയാണ് വാർഷിക ഫീസ്.