കള്ളക്കടൽ: ആലപ്പുഴതീരത്ത് കടലാക്രമണം രൂക്ഷം

ആലപ്പുഴ:കളളക്കടൽ പ്രതിഭാസത്തെത്തുടർന്ന് തീരപ്രദേശങ്ങളി​ൽ കടലാക്രമണം രൂക്ഷം. ആറാട്ടുപുഴയിൽ കടൽഭിത്തിയില്ലാത്ത മേഖലകളിൽ റോഡിലേക്ക് ശക്തമായി മണ്ണും വെള്ളവും ഇരച്ചുകയറി​യതോടെ ഗതാഗതതടസമുണ്ടായി. ആറാട്ടുപുഴ ഗ്രാമപഞ്ചായത്തിലെ വലിയഴീക്കൽ മുതൽ മംഗലം വരെയുള്ള വാ​ർഡുകളിലാണ് ഗുരുതരമായത്. മംഗലം, രാമഞ്ചേരി, ആറാട്ടുപുഴ എം.ഇ.എസ്, പത്തിശേരി വാർഡുകളിലായി 80ഓളം വീടുകൾ കടലെടുക്കുന്ന നിലയി​ലാണ്. വീടുകളിലുളളവർ സുരക്ഷിതസ്ഥാനങ്ങളിലേക്ക് മാറി. ശനിയാഴ്ച രാത്രി 11.30 മുതലായിരുന്നു കടലേറ്റം. ഞായറാഴ്ച പുലർച്ചെ രണ്ട് മണിയോടെ അൽപ്പം ശാന്തമായി. രാവിലെ 9.30 ഓടെ വീണ്ടും ശക്തമായി. ഉച്ചവരെ കടലാക്രമണം തുടർന്നു. തീരദേശറോഡിൽ ഗതാഗതതടസമുണ്ടായി​. മാതാഅമൃതാനന്ദമയിയുടെ

ജന്മദി​നാഘോഷത്തിന് വള്ളിക്കാവ് അമൃതപുരിയിലേക്ക് ഭക്തരുമായെത്തിയ മഠത്തിന്റെ ബസും കെ.എസ്.ആർ.ടി.സി ബസും റോഡിലെ മണ്ണിലാഴ്ന്നു. യാത്രക്കാർ പുറത്തിറങ്ങി നാട്ടുകാരുടെ സഹായത്തോടെ വാഹനങ്ങൾ നീക്കിയാണ് യാത്രതുടർന്നത്. അമ്പലപ്പുഴ, ചെത്തി, ചേർത്തല, ചെല്ലാനം ഭാഗങ്ങളിലും കടലാക്രമണമുണ്ട്.