സാമ്പത്തിക ക്രമക്കേട്: സപ്ലൈകോ മുൻ മാനേജർക്ക് 16 വർഷം തടവ്

തിരുവനന്തപുരം: സാമ്പത്തിക ക്രമക്കേടിന് പന്തളം സപ്ലൈകോ ലാഭം മാർക്ക​റ്റിലെ മുൻ മാനേജരും നിലവിൽ അടൂർ താലൂക്ക് സപ്ലൈ ഓഫീസിലെ എൽ.ഡി ക്ലാർക്കുമായ വി.എസ്.രമേശിന് 16വർഷം കഠിനതടവ്. 3,20,000 രൂപ പിഴയും അടയ്ക്കണം. തിരുവനന്തപുരം വിജിലൻസ് കോടതിയുടേതാണ് ഉത്തരവ്. 2006- 07 കാലഘട്ടത്തിൽ പന്തളം സപ്ലൈകോ ലാഭം മാർക്ക​റ്റിലെ മാനേജരായിരുന്ന രമേശൻ വിവിധ രജിസ്​റ്ററുകളിൽ തിരുത്തി പല ദിവസങ്ങളിലെ വി​റ്റുവരവ് തുകയിൽ നിന്നും 3,20,840രൂപയുടെ ക്രമക്കേട് നടത്തിയെന്നാണ് കേസ്. ചെക്ക് ലീഫുകൾ തിരുത്തി തുക പെരുപ്പിച്ച് കാട്ടി ക്രമക്കേട് മൂടിവച്ചു. തിരുവനന്തപുരം വിജിലൻസ് സ്‌പെഷ്യൽ ഇൻവെസ്​റ്റിഗേഷൻ ഒന്നാം യൂണി​റ്റാണ് കുറ്റപത്രം നൽകിയത്. രണ്ട് വർഷങ്ങളിലായി നടന്ന ക്രമക്കേടായതിനാൽ രണ്ട് കേസുസുകളിൽ വിവിധ വകുപ്പുകളിലാണ് ശിക്ഷയെന്ന് വിജിലൻസ് കോടതി ജഡ്ജി രാജകുമാര.എം.വിയുടെ ഉത്തരവിൽ പറയുന്നു. വിജിലൻസിന് വേണ്ടി പബ്ലിക് പ്രോസിക്യൂട്ടർ രഞ്ജിത് കുമാർ.എൽ.ആർ ഹാജരായി. പ്രതിയെ റിമാൻഡ് ചെയ്തു.