ടെറസിൽ കൃഷി ചെയ്‌ത് മാസം നല്ലൊരു തുക സമ്പാദിക്കാം; ശ്രദ്ധിക്കേണ്ട ആറ് കാര്യങ്ങളിതാ

പണ്ടുകാലത്ത് വലിയ പറമ്പുകളിലും പാടങ്ങളിലുമാണ് കൃഷി ചെയ്‌തിരുന്നത്. എന്നാൽ, കാലം മാറിയതോടെ സ്ഥലപരിമിതി കാരണം പലരും ടെറസിലും ചെറിയ മുറ്റങ്ങളിലും മതിലിന് മുകളിലുമെല്ലാം കൃഷി ചെയ്യാൻ തുടങ്ങി. ഇങ്ങനെ കൃഷി ചെയ്‌ത് വിജയിച്ചവരും ലാഭം കൊയ്‌തവരും ഏറെയാണ്. അടുക്കള തോട്ടം തുടങ്ങി പരാജയപ്പെട്ടവരുടെ എണ്ണവും കുറവല്ല. അതിന് കാരണം ശരിയായ രീതിയിൽ പരിപാലനം നൽകാത്തതാണ്.

1. ചെടികൾ നടാനായി എപ്പോഴും ഭാരം കുറഞ്ഞ ഗ്രോ ബാഗുകളോ പ്ലാസ്റ്റിക് ചട്ടികളോ ഉപയോഗിക്കുക. ഇത് ചെടിയുടെ കൃത്യമായ വളർച്ചയ്‌ക്ക് നല്ലതാണ്. കൂടാതെ ടെറസിന് അധിക ഭാരം നൽകാതിരിക്കാനും ഇത് സഹായിക്കും.
2. ചട്ടികളിലും ഗ്രോ ബാഗുകളിലും അധികമുള്ള വെള്ളം കെട്ടിക്കിടക്കാതിരിക്കാൻ അടിയിൽ ചെറിയ ദ്വാരങ്ങളുണ്ടെന്ന് ഉറപ്പുവരുത്തുക.
3. ചകിരിച്ചോറ്, മേൽമണ്ണ്, ഉണങ്ങിയ ചാണകപ്പൊടി എന്നിവ സമമായി കലർത്തി പോട്ടിംഗ് മിശ്രിതം തയ്യാറാക്കുക.
4. ദിവസവും കുറഞ്ഞത് ആറ് മണിക്കൂറെങ്കിലും വെയിൽ കിട്ടുന്ന സ്ഥലം കൃഷിക്കായി തിരഞ്ഞെടുക്കുക.
5. രാവിലെയും വൈകിട്ടും ചെടിക്ക് വെള്ലമൊഴിക്കുക. അമിതമാകരുത്. ചെടിയിൽ വെള്ളം കെട്ടിക്കിടക്കാനും പാടില്ല.
6. അടുക്കളത്തോട്ടത്തെ നശിപ്പിക്കുന്ന പച്ചത്തുള്ളൻ, മുഞ്ഞ എന്നിവയെ നശിപ്പിക്കാൻ വേപ്പെണ്ണ എമൽഷൻ ആഴ്‌യിലൊരിക്കൽ തളിക്കാം.