ബാക്കിവന്ന ചോറ് വെറുതെ കളയല്ലേ, എണ്ണയൊട്ടും ഉപയോഗിക്കാതെ സ്വാദേറിയ നാലുമണി പലഹാരമുണ്ടാക്കാം

ചോറ് ബാക്കി വന്നാൽ അത് വീട്ടിലെ മൃഗങ്ങൾക്ക് കൊടുക്കുകയോ വെറുതെ കളയുകയോ ആവും മിക്കവരും ചെയ്യുന്നത്. എന്നാൽ ബാക്കിയാവുന്ന ഈ ചോറ് ഒട്ടും പാഴാക്കാതെ തന്നെ വീട്ടിലെ കുട്ടികൾക്കും മുതിർന്നവർക്കും ഇഷ്ടപ്പെടുന്ന ഒരു സ്വാദേറിയ പലഹാരം ഉണ്ടാക്കാം. എണ്ണ ഒട്ടുംതന്നെ ഉപയോഗിക്കാത്തതിനാൽ കൊളസ്‌ട്രോൾ, ഡയബറ്റീസ് തുടങ്ങിയ രോഗങ്ങളുള്ളവർക്കും ഡയറ്റ് നോക്കുന്നവർക്കും ഭയക്കാതെ ഈ പലഹാരം രുചിക്കാം.

ആവശ്യമായ ചേരുവകൾ

• ചോറ്
• നെയ്യ്
• തേങ്ങ ചിരകിയത്
• ശർക്കര പൊടിച്ചത്
• കശുവണ്ടി പൊടിച്ചത്
• ഏലയ്ക്ക പൊടിച്ചത്

തയ്യാറാക്കുന്ന വിധം

ആദ്യം രണ്ട് കപ്പ് ചോറ് ഒരു മിക്‌സി ജാറിൽ അരച്ചെടുക്കണം. ഒരു പാനിൽ രണ്ട് ടേബിൾ സ്‌പൂൺ നെയ്യൊഴിച്ച് അതിൽ അരക്കപ്പ് തേങ്ങ ചിരകിയത് ചേർത്ത് മൂപ്പിക്കണം. ഇനി നേരത്തെ അരച്ചുവച്ച ചോറും മുക്കാൽ കപ്പ് ശർക്കര പൊടിച്ചതും ചേർത്ത് നന്നായി ഇളക്കണം. അൽപം കശുവണ്ടി പൊടിച്ചതും ഏലയ്ക്ക പൊടിച്ചതും ചേർത്തിളക്കി ഉരുട്ടിയെടുത്താൻ ചോറുണ്ട റെഡിയായി. നാലുമണി പലഹാരമായി ചായക്കൊപ്പം ആസ്വദിക്കാം.