ബ്രേക്ക്ഫാസ്റ്റിന് 'റവ അപ്പം' ആയാലോ? മാവ് രാവിലെ അരച്ചാൽ മതി, നിമിഷനേരം കൊണ്ട് തയ്യാറാക്കാം

രാവിലെ എഴുന്നേറ്റാൽ ഉടനെ എന്ത് ബ്രേക്ക്ഫാസ്റ്റ് തയ്യാറാക്കുമന്ന ചിന്തയാണ് പലരെയും അലട്ടുന്നത്. തലേന്ന് മാവ് തയ്യാറാക്കി വച്ചില്ലെങ്കിൽ രാവിലെ ആഹാരം ഉണ്ടാക്കുന്നത് വളരെ ബുദ്ധിമുട്ടുള്ള കാര്യമാണ്. തിരക്കിട്ട ജീവിതത്തിൽ ആരോഗ്യത്തിന് പ്രാധാന്യം നൽകുന്നത് പലപ്പോഴും പരിഗണിക്കാൻ കഴിയാറുമില്ല.

രാവിലെ എഴുന്നേറ്റതിന് ശേഷം എളുപ്പത്തിൽ മാവ് തയ്യാറാക്കി ഉണ്ടാക്കാൻ കഴിയുന്ന ഒരു ബ്രേക്ക്ഫാസ്റ്റ് റെസിപ്പിയാണ് റവ അപ്പം. വീട്ടിൽ തന്നെയുള്ള കുറഞ്ഞ ചേരുവകൾ കൊണ്ട് മാവ് തയ്യാറാക്കാൻ കഴിയുമെന്ന് മാത്രമല്ല,​ ഒരു മണിക്കൂറിനുള്ളിൽ തന്നെ ഇത് ചുട്ട് കഴിക്കാനും കഴിയും.

റവ അപ്പത്തിന് ആവശ്യമായ ചേരുവകൾ

റവ-രണ്ട് കപ്പ്

തേങ്ങ ചിരകിയത്- മുക്കാൽ മുതൽ ഒരു കപ്പ് വരെ

വെള്ള അവൽ- അരക്കപ്പ്

ഇൻസ്റ്റന്റ് യീസ്റ്റ്- കുറച്ച് മാത്രം

വെള്ളം-ആവശ്യത്തിന്

തയ്യാറാക്കുന്ന വിധം

• വെള്ള അവൽ 10–15 മിനിറ്റ് വെള്ളത്തിൽ കുതിർത്ത് വയ്ക്കുക.
• ഒരു മിക്സി ജാറിൽ റവ ചേർത്ത് ആവശ്യത്തിന് വെള്ളം ഒഴിച്ച ശേഷം നന്നായി അരച്ചെടുക്കുക
• ഇതിലേക്ക് കുതിർന്ന അവൽ, തേങ്ങ ചിരകിയത്, ആവശ്യത്തിന് വെള്ളം എന്നിവ ചേർത്ത് വീണ്ടും നന്നായി അരച്ചെടുക്കുക.
• മാവ് ഒരു പാത്രത്തിലേക്ക് മാറ്റി ഇൻസ്റ്റന്റ് യീസ്റ്റ് ചേർത്ത് നന്നായി ഇളക്കുക. ആവശ്യമെങ്കിൽ ഒരു ടീസ്പൂൺ പഞ്ചസാരയും ചേർക്കാം.
• പാത്രം മൂടിവെച്ച് 1- 2 മണിക്കൂർ വരെ, അല്ലെങ്കിൽ മാവ് നന്നായി പൊങ്ങിവരുന്നതുവരെ പുളിക്കാൻ വയ്ക്കുക.
• അപ്പം ചുടുന്നതിന് മുമ്പ് ആവശ്യത്തിന് ഉപ്പ് ചേർത്ത് പതുക്കെ ഇളക്കുക.