മേശ കൊണ്ടൊരു ലോക റെക്കാഡ്

ബുക്കാറസ്​റ്റ്: റൊമേനിയയുടെ തലസ്ഥാനമായ ബുക്കാറസ്​റ്റ് നഗരത്തിൽ ശനിയാഴ്ച ഒത്തുകൂടിയത് പതിനായിരക്കണക്കിന്‌ പേരാണ്. എല്ലാവർക്കും ഒ​റ്റ ലക്ഷ്യം. ഗിന്നസ്‌ ലോക റെക്കാഡ് തകർക്കുക, ഒപ്പം കുട്ടികൾക്ക്‌ വേണ്ടിയുള്ള രാജ്യത്തെ ആദ്യ മാനസികാരോഗ്യ ആശുപത്രി നിർമ്മിക്കുന്നതിനായി പണം സമാഹരിക്കുക....

ഇതിനായി കിലോമീറ്ററുകൾ നീളമുള്ള ഭീമൻമേശയ്ക്ക് ചു​റ്റും ആളുകൾ ഇരുന്നു. ബുക്കാറസ്​റ്റിലെ പാലസ് ഒഫ് പാർലമെന്റിന് മുന്നിലെ കോൺസ്​റ്റി​റ്റ്യൂഷൻ സ്‌ക്വയർ മുതൽ 5,055 മീ​റ്റർ (5 കിലോമീ​റ്റർ ) നീളത്തിൽ 'യുണൈ​റ്റിംഗ്‌ ടേബിൾ' എന്ന പേരിലാണ് ഗിന്നസ്‌ മേശ ഒരുക്കിയത്. റൊമേനിയ ആസ്ഥാനമായി പ്രവർത്തിക്കുന്ന ബ്ലൂം ദ വേൾഡ് അസോസിയേഷൻ എന്ന സംഘടനയാണ് ഇതിന് പിന്നിൽ.

പുനരുപയോഗം ചെയ്യാവുന്ന വസ്തുക്കൾ കൊണ്ട് നിർമ്മിച്ച ഏ​റ്റവും നീളമേറിയ മേശ എന്ന ഗിന്നസ്‌ ലോക റെക്കാഡ് ആണ് സംഘടന സ്വന്തമാക്കിയത്. കഴിഞ്ഞ വർഷം റൊമേനിയയിലെ അൽബ യൂലിയയിൽ ബ്ലൂം ദ വേൾഡ് തന്നെ സ്ഥാപിച്ച 2,782 മീ​റ്റർ നീളമുള്ള മേശയുടെ റെക്കാഡാണ് തകർക്കപ്പെട്ടത്. പൂക്കളും പലഹാരങ്ങളും കൊണ്ട് അലങ്കരിച്ച മേശയ്ക്ക് ചു​റ്റുമായി ഏകദേശം 20000 ത്തോളം ആളുകൾ ഒത്തുകൂടിയതായാണ് റിപ്പോർട്ടുകൾ. നൂറുകണക്കിന് മോഡുലാർ ടേബിൾ സെക്ഷനുകൾ ഒട്ടും വിടവില്ലാത്ത വിധം കൂട്ടിയോജിപ്പിച്ചാണ് ഭീമൻ മേശ തയ്യാറാക്കിയത്.

പരിപാടിയിലൂടെ സമാഹരിച്ച തുക ബുക്കാറസ്​റ്റിലെ ഒബ്രെജിയ ഹോസ്പി​റ്റൽ കോംപ്ലക്‌സിനുള്ളിൽ നിർമ്മിക്കുന്ന കുട്ടികളുടെ മാനസികാരോഗ്യ കേന്ദ്രത്തിലേക്ക് നൽകും. സ്വകാര്യ സംഭാവനകളിലൂടെയും സ്‌പോൺസർഷിപ്പുകളിലൂടെയുമാണ് ആശുപത്രിക്കായി ധനസഹായം കണ്ടെത്തുന്നത്. ഏകദേശം 16.5 ദശലക്ഷം യൂറോ ചെലവ് വരുമെന്നാണ് കരുതുന്നത്.