നിലവിളക്ക് അണച്ച ശേഷം കിണ്ടിയിലെ ജലം ഇങ്ങനെ ചെയ്യൂ: വീട്ടിൽ ഐശ്വര്യവും സമ്പൽസമൃദ്ധിയും നിറയും

വീടുകളിൽ നിലവിളക്ക് കൊളുത്തുമ്പോൾ അതിനടുത്തായി കിണ്ടിയിൽ വെള്ളം വയ്ക്കാറുണ്ട്. ആകാശം, വായു, അഗ്നി, ഭൂമി, ജലം എന്നീ പഞ്ചഭൂതങ്ങളെ സമന്വയിപ്പിച്ച് സകല ദേവീദേവന്മാരുടെയും സാന്നിദ്ധ്യം ഉറപ്പിക്കാനാണ് ഇങ്ങനെ ചെയ്യുന്നതെന്നാണ് വിശ്വാസം. എന്നാൽ വിളക്ക് അണച്ചശേഷം കിണ്ടിയിലെ ജലം പലരും ഒഴിച്ചുകളയാറാണ് പതിവ്. എന്നാൽ ഈ പുണ്യജലം തെറ്റായ രീതിയിൽ കൈകാര്യം ചെയ്താൽ വലിയ ദോഷങ്ങൾക്ക് കാരണമാകുമെന്നാണ് ആചാര്യന്മാർ പറയുന്നത്. കിണ്ടിയിലെ വെള്ളം എങ്ങനെയാണ് ശരിയായ രീതിയിൽ ഉപയോഗിക്കേണ്ടതെന്നും ഉപയോഗിക്കാൻ പാടില്ലാത്തതെന്നും നോക്കാം.

വെള്ളം എന്ത് ചെയ്യണം?

• വിളക്ക് അണച്ച ശേഷം കിണ്ടിയിലെ വെള്ളം ഒരു തീർത്ഥമായി കുടിക്കാവുന്നതാണ്.ഇത് വീട്ടിൽ ഐശ്വര്യമുണ്ടാകാൻ ഏറ്റവും ഉത്തമമാണെന്നാണ് ആചാര്യന്മാർ പറയുന്നത്. മാത്രമല്ല തുളസിയില മാത്രമേ കിണ്ടിയിലെ ജലത്തിൽ ഇടാൻ പാടുള്ളൂ.

• കിണ്ടിയിലെ വെള്ളം അടുത്ത ദിവസം രാവിലെ തുളസിത്തറയിൽ ഒഴിക്കുന്നത് ഉത്തമമാണ്. എന്നാൽ വിളക്ക് അണച്ചയുടൻ സന്ധ്യയ്ക്കോ രാത്രിയിലോ ഒരു കാരണവശാലും തുളസിത്തറയിൽ ഈ ജലം ഒഴിക്കാൻ പാടില്ല.

• കിണ്ടിയിലെ വെള്ളത്തിൽ അൽപ്പം മഞ്ഞൾപ്പൊടി ചേർത്ത് ഇളക്കിയതിന് ശേഷം വീടിനകത്തും പുറത്തും തളിക്കുന്നത് നെഗറ്റീവ് ശക്തിയെ അകറ്റി പോസിറ്റീവ് അന്തരീക്ഷവും ഒപ്പം സാമ്പത്തിക ഉയർച്ചയും നൽകും.

ഈ തെറ്റുകൾ ചെയ്യരുത്

• രാവിലെ നിലവിളക്ക് കൊളുത്തുന്നവരുണ്ടാകും. എന്നാൽ രാവിലെ കിണ്ടിയിൽവച്ച അതേ വെള്ളം വൈകുന്നേരവും ഉപയോഗിക്കുന്നത് വലിയ ദോഷമാണെന്നാണ് വിശ്വാസം. കാരണം ഭഗവാന് സമ‌ർപ്പിച്ച വെള്ളം പിന്നീട് പുണ്യജലമാണ്.

• കിണ്ടിയിലെ തീർത്ഥജലം സിങ്ക്, ഓടകൾ അല്ലെങ്കിൽ മാലിന്യങ്ങൾ നിറഞ്ഞ സ്ഥലം എന്നിവിടങ്ങളിൽ ഒഴിക്കരുത്.

• ആളുകൾ ചവിട്ടുന്ന സ്ഥലങ്ങളിലോ മുട്ടത്തോട് പോലുള്ള വേസ്റ്റുകളുള്ള ചെടികളുടെ ചുവട്ടിലോ ഈ വെള്ളം ഒഴിക്കാൻ പാടില്ല.

കിണ്ടി വയ്ക്കുമ്പോൾ ശ്രദ്ധിക്കേണ്ട കാര്യങ്ങൾ

കിണ്ടി വയ്ക്കുമ്പോൾ അതിന്റെ വാൽവ് എപ്പോഴും കിഴക്കോട്ട് തന്നെയായിരിക്കണമെന്നാണ് ആചാര്യന്മാർ പറയുന്നത്. മാത്രമല്ല വിളക്ക് തൊഴാൻ നിൽക്കുമ്പോൾ നമ്മുടെ വലതുഭാഗത്ത് കിണ്ടിയും ഇടതുഭാഗത്ത് വിളക്കും വരുന്ന രീതിയിലായിരിക്കണം ക്രമീകരണം. കിണ്ടിയിൽ ഒരിക്കലും വീട്ടിൽ നേരത്തെ എടുത്തുവച്ചിരുന്ന വെള്ളം ഉപയോഗിക്കരുത്. പകരം ശുദ്ധവും കിണറ്റിൽ നിന്ന് നേരിട്ട് കോരിയ വെള്ളമോ ആകണം ഉപയോഗിക്കേണ്ടത്.