വീട്ടിൽ ലക്ഷ്മീവിളക്കുണ്ടോ? ഈ രീതിയിൽ കൊളുത്തിയാൽ സമ്പത്തും ഐശ്വര്യവും ഉറപ്പ്

വീടുകളിൽ നിത്യേന നിലവിളക്ക് കൊളുത്തുന്നത് കുടുംബത്തിലെ ഐശ്വര്യത്തിനും സമാധാനത്തിനും നല്ലതാണെന്നാണ് വിശ്വാസം. എന്നാൽ വീട്ടിൽ ലക്ഷ്മീവിളക്ക് ഉണ്ടെങ്കിൽ വീട്ടിലെ ദാരിദ്ര്യവും കഷ്ടപ്പാടുകളും മാറി സമ്പത്തും സമൃദ്ധിയും ഉണ്ടാകുമെന്നാണ് ആചാര്യന്മാർ പറയുന്നത്.

സാധാരണ വീടുകളിൽ ദിവസവും നിലവിളക്ക് തന്നെയാണ് കൊളുത്തേണ്ടത്. എന്നാൽ വെള്ളിയാഴ്ച ദിവസം ലക്ഷ്മീവിളക്ക് പ്രത്യേകമായി ഒരുക്കി തെളിയിക്കുന്നത് വഴി സാക്ഷാൽ മാഹലക്ഷ്മിയുടെ അനുഗ്രഹം വീടിന് ലഭിക്കുമെന്നാണ് ആചാര്യന്മാർ പറയുന്നത്. എങ്ങനെയാണ് ലക്ഷ്മീവിളക്ക് കൊളുത്തേണ്ടത് നോക്കാം.

• വെള്ളിയഴ്ച ദിവസം ലക്ഷ്മീവിളക്ക് നന്നായി കഴുകി വൃത്തിയാക്കി അതിൽ എണ്ണയൊഴിക്കണം. ശേഷം എണ്ണയിലേയ്ക്ക് കർപ്പൂരം പൊടിച്ചത് വിതറണം. ഇത് വീടിനുള്ളിൽ പോസിറ്റീവ് ഊർജവും സുഗന്ധവും നിറയ്ക്കും.

• ലക്ഷ്മീവിളക്ക് വയ്ക്കുന്ന താലവും അല്ലെങ്കിൽ പീഠവും ചുവന്ന പൂക്കൾ (ചെമ്പരത്തി, തെച്ചിപ്പൂവ്) അല്ലെങ്കിൽ സുഗന്ധമുള്ള മുല്ലപ്പൂക്കൾ എന്നിവ ഉപയോഗിച്ച് മനോഹരമായി അലങ്കരിക്കേണ്ടതുണ്ട്.

• വിളക്കിന് മുന്നിലായി ഒരു പൂജാതാലത്തിൽ ഒരു വെറ്റിലവച്ച് അതിൽ അൽപ്പം കുങ്കുമം വിതറി സമർപ്പിക്കണം. വെറ്റില വയ്ക്കുമ്പോൾ അതിന്റെ തുമ്പ് കിഴക്ക് അല്ലെങ്കിൽ വടക്ക് ദിശയിലേയ്ക്ക് ആയിരിക്കാൻ പ്രത്യേകം ശ്രദ്ധിക്കണം.

• ലക്ഷ്മീവിളക്ക് കൊളുത്തിയ ശേഷം കുടുംബനാഥ കൈകൾ കൂപ്പി "ഓം ശ്രീം ഹ്രീം ശ്രീം കമലേ കമലാലയേ പ്രസീദ പ്രസീദ ഓം ശ്രീം ഹ്രീം ശ്രീം മഹാലക്ഷ്മിയെ നമഃ" എന്ന മന്ത്രം ജപിച്ച് പ്രാർത്ഥിക്കണം.

• പ്രാർത്ഥിച്ച ശേഷം കുങ്കുമം സ്ത്രീകൾ നെറ്റിയിൽ അണിയുന്നത് ദീർഘസുമംഗലി യോഗത്തിനും ഭർത്താവിന്റെയും കുടുംബത്തിന്റെയും അഭിവൃദ്ധിക്കും സഹായിക്കുമെന്നാണ് വിശ്വാസം.