'സെക്രട്ടറിയേറ്റിൽ മന്ത്രിയോഫീസിൽ ചെന്നുകയറാനാകില്ല', മലബാറുകാർക്കെതിരെ അധിക്ഷേപ പരാമർശവുമായി സിപിഎം നേതാവ്‌

കൊല്ലം: പൊതുയോഗത്തിലെ പ്രസംഗത്തിനിടെ മലബാറിലെ ജനങ്ങളെ അധിക്ഷേപിച്ച് സിപിഎം നേതാവ്. സിപിഎം കൊട്ടാരക്കര ഏരിയ സെക്രട്ടറി പി കെ ജോൺസണാണ് ഇത്തരത്തിൽ പ്രസംഗിച്ചത്. വടക്കൻ കേരളത്തിൽ നിന്നുള്ളവർ കാരണം സെക്രട്ടറിയേറ്റിൽ മന്ത്രിയോഫീസിൽ ചെന്നുകയറാനാകില്ലെന്നാണ് പി കെ ജോൺസൺ പ്രസംഗിച്ചത്.

മലപ്പുറം,​ കാസർകോട് പോലെ മലബാർ ഭാഗത്തുനിന്നുള്ളവർ തിരുവനന്തപുരത്തെത്തി തിന്നുകുടിച്ച് മുടിച്ച് മടങ്ങുകയാണെന്ന് അദ്ദേഹം പറഞ്ഞു. 'മലപ്പുറം,​ കാസർകോട് മലബാർ സൈഡിൽ നിന്നൊക്കെ ബസ് പിടിച്ച് അവിടെനിന്ന് വന്നിറങ്ങുകയാണ്. ഇറങ്ങിക്കഴിഞ്ഞാൽ ഒന്നുരണ്ടാഴ്‌ച ഇവിടെ താമസിച്ച് കാര്യങ്ങളൊക്കെ സാധിച്ച്,​ തിന്നു കുളിച്ച് മുടിച്ച്..ബാക്കി ഞാൻ പറയുന്നില്ല. പൊതുമരാമത്ത് വകുപ്പിലിട്ട് അലക്കുകയാണ്. 10 ലക്ഷവും 15 ലക്ഷവുമാണ് ഈ എഇയുടെ കച്ചവടം. എഇയ്‌ക്ക് 25 ലക്ഷത്തിലേക്ക് വരികയാണ്. ഇങ്ങനെ ഓരോ വകുപ്പിലും ലേലം വിളിച്ചുകൊണ്ട് നിർത്തി കോൺഗ്രസുകാർക്ക് 10 വർഷം നഷ്‌ടപ്പെട്ട പണം തിരിച്ചുപിടിക്കാൻ വേണ്ടി കേരളത്തെ അഴിമതിയുടെ ലാവണമാക്കി മാറ്റുകയാണ്.'-പി എ ജോൺസൺ പ്രസംഗത്തിൽ പറഞ്ഞു.

ഖദറുകാരെക്കൊണ്ട് വലിയ വിഷമമാണെന്നും ഒരു മന്ത്രിയുടെ ഓഫീസിലും ചെന്നുകയറാനാകുന്നില്ലെന്നും സെക്രട്ടറിയേറ്റിൽ ഒട്ടും പറ്റുന്നില്ലെന്നും ജോൺസൺ പറഞ്ഞു. പണ്ട് ത്രീസ്റ്റാർ,​ ഫോർ സ്റ്റാർ,​ ഫൈവ് സ്റ്റാർ ഹോട്ടലിലൊന്നും അവിടെ ആൾ വരില്ലായിരുന്നെന്നും എന്നാലിപ്പോൾ ആറ് മാസം മുൻപുതന്നെ ബുക്ക് ചെയ്യണമെന്നും ജോൺസൺ പരിഹസിച്ചു. പഞ്ചായത്തിലെ എൽഡിഎഫ് യോഗത്തിൽ മുൻമന്ത്രി കെ ബി ഗണേശ് കുമാറടക്കം സന്നിഹിതരായിരിക്കെയാണ് ജോൺസൺ ഇത്തരത്തിൽ പറഞ്ഞത്.