എ.എസ്.ഐ മുൻ ഡയറക്ടർ ജനറൽ സി.ബാബു രാജീവ് നിര്യാതനായി

കൊച്ചി: റിട്ട. ഐ.എ.എസ് ഉദ്യോഗസ്ഥനും ആർക്കിയോളജിക്കൽ സർവേ ഒഫ് ഇന്ത്യ (എ.എസ്.ഐ) ഡയറക്ടർ ജനറലുമായിരുന്ന തേവര ശാന്തിനഗർ മീനാക്ഷിയിൽ സി. ബാബു രാജീവ് (79)​ നിര്യാതനായി. കൊച്ചി പോർട്ട് ട്രസ്റ്റ് മുൻ ചെയർമാനും കൊച്ചി അന്താരാഷ്ട്ര വിമാനത്താവളം (സിയാൽ) മുൻ മാനേജിംഗ് ഡയറക്ടറുമായിരുന്നു. സംസ്‌കാരം ഇന്ന് വൈകിട്ട് നാലിന് രവിപുരം ശ്മശാനത്തിൽ. ഭാര്യ: ശ്രീദേവി. മക്കൾ: ലക്ഷ്മി (യു.എസ്.എ), കല്യാണി (മുംബയ്), പരേതയായ മീനാക്ഷി. ആലുവ യു.സി കോളേജിലെ അദ്ധ്യാപകനായാണ് ഔദ്യോഗികജീവിതം ആരംഭിച്ചത്. പിന്നീട് എഫ്.എ.സി.ടിയിൽ എക്‌സിക്യുട്ടീവ് ട്രെയിനിയായി. 1971ൽ ഐ.പി.എസും പിന്നാലെ ഐ.എ.എസും നേടി. 1993-1999ൽ കൊച്ചി പോർട്ട് ട്രസ്റ്റ് ചെയർമാനായും 2000-2003ൽ സിയാൽ മാനേജിംഗ് ഡയറക്ടറായും സേവനമനുഷ്ഠിച്ചു. അസാം അഡീഷണൽ ചീഫ് സെക്രട്ടറിയുമായിരുന്നു. 2007ൽ കേന്ദ്ര സെക്രട്ടറിയായി വിരമിച്ചു. തുടർന്ന് ആർക്കിയോളജിക്കൽ സർവേ ഒഫ് ഇന്ത്യ ഡയറക്ടർ ജനറലായി നിയമിതനായി. മുംബയിലെ സ്വകാര്യ ലോജിസ്റ്റിക് ആൻഡ് പോർട്ട് കമ്പനിയുടെ സി.ഇ.ഒ ആയും പ്രവർത്തിച്ചിട്ടുണ്ട്.