കൊതുകിനെ അകറ്റാൻ ഒരൊറ്റ ചെടി മതി; ബാൽക്കണിയിലും ജനൽപ്പടിയിലും വരെ വളർത്താം, പരിചരണവും എളുപ്പം

വീട്ടിൽ കൊതുകുകളുടെ ശല്യം കൂടുമ്പോൾ പലരും പലവിധ മാർഗങ്ങളും പരീക്ഷിക്കാറുണ്ട്. കൊതുകുകളെ അകറ്റാൻ സഹായിക്കുമെന്ന് കരുതപ്പെടുന്ന കൊതുകുവിരട്ടി ചെടി വീട്ടിലും വളർത്താം. അധികം ബുദ്ധിമുട്ടില്ലാതെ പരിചരിക്കാനാകുന്നതിനാൽ ഹോം ഗാർഡനിംഗിൽ താൽപര്യമുള്ളവർക്ക് പരീക്ഷിക്കാവുന്ന ഒരു ചെടിയാണിത്.

നല്ല സൂര്യപ്രകാശം വേണം

കൊതുകുവിരട്ടി ചെടിയുടെ ആരോഗ്യകരമായ വളർച്ചയ്ക്ക് ആവശ്യത്തിന് സൂര്യപ്രകാശം ലഭിക്കണം. ദിവസവും കുറഞ്ഞത് ആറ് മണിക്കൂറെങ്കിലും നേരിട്ട് വെയിൽ ലഭിക്കുന്ന സ്ഥലത്ത് ചെടി സ്ഥാപിക്കുന്നതാണ് നല്ലത്. ബാൽക്കണിയിലോ വീടിന് പുറത്തോ നല്ല വെളിച്ചവും വായുസഞ്ചാരവും ലഭിക്കുന്ന ഇടങ്ങളിൽ വളർത്താം.

അമിതമായി വെള്ളം നൽകരുത്

മണ്ണിലെ ഈർപ്പം പൂർണമായും കുറഞ്ഞതിന് ശേഷം മാത്രം ചെടിക്ക് വെള്ളം നൽകുന്നതാണ് ഉചിതം. അമിതമായി വെള്ളം കെട്ടിക്കിടക്കുന്ന സാഹചര്യം ഒഴിവാക്കണം. വെള്ളം കെട്ടിനിൽക്കുന്നത് വേരുകൾ ചീഞ്ഞുപോകാൻ കാരണമാകാം. അതിനാൽ വെള്ളം പെട്ടെന്ന് ഒഴുകിപ്പോകുന്ന തരത്തിലുള്ള ചട്ടിയും മണ്ണുമാണ് ഉപയോഗിക്കേണ്ടത്.

ചെടിയുടെ വളർച്ചയ്ക്ക് ജൈവവളമോ നേർപ്പിച്ച ദ്രാവക വളമോ മാസത്തിലൊരിക്കൽ നൽകാം. ആവശ്യത്തിന് വളപ്രയോഗം നടത്തുന്നത് ചെടിയുടെ ആരോഗ്യകരമായ വളർച്ചയ്ക്ക് സഹായിക്കും.

വീട്ടിനകത്തും വളർത്താം

ജനൽപടികളിലും ബാൽക്കണിയിലും നല്ല വെളിച്ചവും വായുസഞ്ചാരവും ലഭിക്കുന്ന ജനലുകൾക്ക് സമീപവുമെല്ലാം ചെടി വളർത്താം. വീടിനകത്ത് വയ്ക്കുമ്പോൾ നേരിട്ട് സൂര്യപ്രകാശം ലഭിക്കുന്ന സ്ഥലം തിരഞ്ഞെടുക്കുന്നത് പ്രധാനമാണ്. സുഗന്ധമുള്ള ചെടികൾ വീട്ടിൽ വളർത്തുന്നത് ഹരിതാഭമായ അന്തരീക്ഷം ഒരുക്കുന്നതിനൊപ്പം കൊതുകിനെ അകറ്റാൻ സഹായിക്കുന്ന പ്രകൃതിദത്തമായ ഒരു മാർഗവും കൂടിയാണ്.