ക്യാരറ്റ് ഇനി വേഗത്തിൽ അഴുകില്ല, ദിവസങ്ങളോളം കേടാകാതിരിക്കാൻ സൂത്രമുണ്ട്

മികച്ച പോഷകങ്ങൾ അടങ്ങിയ പച്ചക്കറിയാണ് ക്യാരറ്റ്. വിറ്റാമിൻ എയുടെ സമ്പൂർണ കലവറയാണിത്. തോരനുണ്ടാക്കാനും കുറുമ, കടല, വെജിറ്റബിൾ കറികൾ തയ്യാറാക്കാനും ക്യാരറ്റ് പ്രധാനമാണ്. മാത്രമല്ല കേക്കുണ്ടാക്കാനും മിക്കവരും ഉപയോഗിക്കാറുണ്ട്. എന്നാൽ ക്യാരറ്റ് അധികനാൾ സൂക്ഷിക്കാൻ കഴിയില്ലെന്നത് പലരും നേരിടുന്ന പ്രശ്നമാണ്. ഫ്രിഡ്‌ജിൽ സൂക്ഷിച്ചാലും പെട്ടെന്ന് കേടാകാനിടയുണ്ട്. ക്യാരറ്റ് അഴുകിപ്പോകാതെ ഏറെനാൾ സൂക്ഷിക്കാൻ ചില പൊടിക്കൈകൾ വീട്ടിൽതന്നെ പരീക്ഷിക്കാം.

• ഇലയോടൊപ്പമാണ് ക്യാരറ്റ് വാങ്ങുന്നതെങ്കിൽ ഫ്രിഡ്ജിൽ സൂക്ഷിക്കുന്നതിന് മുൻപ് ഇല മുറിച്ചുകളയണം. ഇല ക്യാരറ്റിൽ നിന്ന് ഈർപ്പം വലിച്ചെടുത്ത് ഉണങ്ങിപ്പോകുന്നതിന് ഇടയാക്കും.
• ക്യാരറ്റ് കഴുകി ഈർപ്പം തുടച്ച് കളഞ്ഞതിനുശേഷം വായു കടക്കാത്ത പാത്രത്തിലോ കവറിലോ സൂക്ഷിക്കാം. ഇത് മുങ്ങിനിൽക്കാൻ പാകത്തിന് വെള്ളം നിറച്ച് പാത്രത്തിൽ സൂക്ഷിക്കാം. ഇത് ഫ്രിഡ്‌ജിനുള്ളിൽ വയ്ക്കണം. മൂന്നോ നാലോ ദിവസം കൂടുമ്പോൾ വെള്ളം മാറ്റണം.
• പേപ്പറിൽ പൊതിഞ്ഞതിനുശേഷം സിപ് ലോക്ക് ബാഗിൽ വച്ച് ഫ്രിഡ്‌ജിനുള്ളിൽ സൂക്ഷിക്കാം.
• കഴുകി നനവ് മാറ്റിയതിനുശേഷം മാത്രമേ ഫ്രിഡ്‌ജിൽ സൂക്ഷിക്കാൻ പാടുള്ളൂ.
• ക്യാരറ്റ് കഷ്ണങ്ങളാക്കിയതിനുശേഷം രണ്ട് മിനിട്ട് തിളച്ച വെള്ളത്തിൽ മുക്കിവയ്ക്കണം. ശേഷം ഐസ് വെള്ളത്തിൽ മുക്കിവയ്ക്കണം. ഇനി നന്നായി തുടച്ച് ഉണക്കി ഫ്രീസറിൽ സൂക്ഷിക്കാം.
• ആപ്പിൾ, വാഴപ്പഴം എന്നിവയോടൊപ്പം ക്യാരറ്റ് സൂക്ഷിക്കരുത്. ഇവ പുറന്തള്ളുന്ന എഥിലീൻ ക്യാരറ്റ് വേഗത്തിൽ അഴുകുന്നതിന് കാരണമാകും.