മഴക്കാലത്ത് ഇവ കഴിക്കുന്നത് വിഷത്തിന് തുല്യം? ആരോഗ്യം നിലനിർത്താൻ ഒഴിവാക്കേണ്ട അഞ്ച് പച്ചക്കറികൾ

മഴക്കാലത്ത് രോഗങ്ങൾ അകറ്റി നിർത്തി ആരോഗ്യം കാക്കാൻ ഭക്ഷണത്തിൽ ശ്രദ്ധ നൽകേണ്ടതുണ്ട്. അതിൽത്തന്നെ, ദിവസവും വാങ്ങുന്ന പച്ചക്കറികളുടെ കാര്യത്തിലാണ് പ്രധാനമായും ജാഗ്രത വേണ്ടത്. മഴക്കാലത്ത് അന്തരീക്ഷത്തിലുണ്ടാകുന്ന ഈർപ്പവും പ്രാണികളുടെയും ഈച്ചകളുടെയും പെരുപ്പവും കാരണം പച്ചക്കറികളിൽ ബാക്ടീരിയകളും ഫംഗസുകളും പെരുകാൻ സാദ്ധ്യതയേറെയാണ്. മഴക്കാലത്ത് നാം വാങ്ങുന്ന പച്ചക്കറികളിൽ ഏതൊക്കെയാണ് കൂടുതൽ ശ്രദ്ധിക്കേണ്ടതെന്നും, എന്തുകൊണ്ടാണ് അവ ഉപയോഗിക്കുമ്പോൾ ജാഗ്രത പാലിക്കേണ്ടതെന്നും നോക്കാം.
ഇലക്കറികൾ
ചീര, ഉലുവയില, മല്ലിയില, ലെറ്റൂസ് തുടങ്ങിയ ഇലക്കറികളിൽ മഴക്കാലത്ത് മണ്ണും ചെളിയും പ്രാണികളും എളുപ്പത്തിൽ പറ്റിപ്പിടിച്ചിരിക്കാൻ സാദ്ധ്യതയുണ്ട്. ഈർപ്പം കാരണം ബാക്ടീരിയ, ഫംഗസ് രോഗാണുക്കൾ ഇവയിൽ അതിവേഗം വളരുകയും വയറിളക്കം, അണുബാധ തുടങ്ങിയ പ്രശ്നങ്ങൾക്ക് കാരണമാകുകയും ചെയ്യും.

കാബേജ്
ഇലകൾ അടുത്തടുത്ത് അടുക്കിവച്ചിരിക്കുന്ന കാബേജിന്റെ പാളികൾക്കിടയിൽ ചെറിയ പുഴുക്കളോ പ്രാണികളോ ചെളിയോ ഒളിച്ചിരിക്കാൻ സാദ്ധ്യത കൂടുതലാണ്. ഉയർന്ന ഈർപ്പം കാരണം കാബേജിൽ ഫംഗസ് വളരാനും എളുപ്പമാണ്.

കോളിഫ്ളവർ
കാബേജ് പോലെത്തന്നെ കോളിഫ്ളവറിന്റെ പൂക്കൾക്കിടയിലും ചെറുപ്രാണികളും പുഴുക്കളും അതിവേഗം പെരുകും. പുറത്തുനിന്നു നോക്കിയാൽ കാണാൻ പ്രയാസമായതിനാൽ ഇവ വയറ്റിലെത്താൻ സാദ്ധ്യതയേറെയാണ്.

കൂൺ
ജലാംശം കൂടുതലായതിനാൽ കൂണുകൾ എളുപ്പത്തിൽ കേടുവരുന്നവയാണ്. മഴക്കാലത്തെ അന്തരീക്ഷത്തിലെ ഈർപ്പം കൂണുകളിൽ ബാക്ടീരിയ, ഫംഗസ് വളർച്ച വേഗത്തിലാക്കുകയും ഇവയുടെ ആയുസ് കുറയ്ക്കുകയും ചെയ്യുന്നു. വിശ്വസനീയമായ സ്ഥലങ്ങളിൽ നിന്ന് വാങ്ങുകയും ഉടൻതന്നെ പാകം ചെയ്ത് കഴിക്കുകയും ചെയ്തില്ലെങ്കിൽ മഴക്കാലത്ത് കൂൺ ഒഴിവാക്കുന്നതാണ് നല്ലത്.

വഴുതന
മഴക്കാലത്ത് വഴുതനങ്ങയിൽ പുഴുക്കുത്ത് ഉണ്ടാകാനുള്ള സാദ്ധ്യത വളരെ കൂടുതലാണ്. പുറന്തോൽ കണ്ടാൽ നല്ലതെന്ന് തോന്നിയാലും ഉള്ളിൽ ചെറിയ പുഴുക്കൾ ഉണ്ടാകാം. അതിനാൽ അരിയുമ്പോൾ ഉള്ളിൽ പുഴുക്കളില്ലെന്ന് ഉറപ്പുവരുത്തണം.

മഴക്കാലത്ത് ശ്രദ്ധിക്കേണ്ട മുൻകരുതലുകൾ

മഴക്കാലത്ത് പച്ചക്കറികൾ പൂർണമായും ഭക്ഷണത്തിൽ നിന്ന് ഒഴിവാക്കേണ്ടതില്ലെങ്കിലും ചില മുൻകരുതലുകൾ എടുക്കുന്നത് ആരോഗ്യം സംരക്ഷിക്കാൻ സഹായിക്കും. ഇതിനായി വൃത്തിയും വിശ്വാസ്യതയുമുള്ള കടകളിൽ നിന്ന് മാത്രം പച്ചക്കറികൾ വാങ്ങാൻ ശ്രദ്ധിക്കണം. വീട്ടിലെത്തിച്ച ശേഷം പൈപ്പിലെ ഒഴുകുന്ന വെള്ളത്തിൽ ഇവ നന്നായി കഴുകിയെടുക്കുക. അതിനുശേഷം പാകം ചെയ്യുന്നതിന് മുൻപ് 15-20 മിനിട്ട് ചെറുചൂടുള്ള ഉപ്പുവെള്ളത്തിലോ വിനാഗിരി വെള്ളത്തിലോ മുക്കിവയ്ക്കുന്നത് പ്രാണികളെയും വിഷാംശങ്ങളെയും അകറ്റാൻ സഹായിക്കും. പച്ചക്കറികൾ സാലഡ് രൂപത്തിൽ പച്ചയായി കഴിക്കുന്നത് പരമാവധി ഒഴിവാക്കി നന്നായി വേവിച്ചു മാത്രം ഉപയോഗിക്കുക. കൂടാതെ, ഈ സമയത്ത് കൂടുതൽ സുരക്ഷിതമായ ചുരയ്ക്ക, പീച്ചങ്ങ, മത്തങ്ങ, കുമ്പളങ്ങ തുടങ്ങിയ നാടൻ സീസണൽ പച്ചക്കറികൾ ധാരാളമായി ഭക്ഷണത്തിൽ ഉൾപ്പെടുത്തുന്നതാണ് അഭികാമ്യം.