കാലിന് പരിക്കേറ്റ അമ്മയ്‌ക്ക് താങ്ങ്; സ്‌നേഹത്തണലായി കുരുന്നുബാലൻ

കുഞ്ഞുങ്ങൾ ഏറ്റവും കൂടുതൽ സമയം ചെലവഴിക്കുന്നത് അവരുടെ അമ്മയോടൊപ്പമാകും. അതുകൊണ്ടുതന്നെ മറ്റാരെക്കാളും അധികമായി അവർ സ്‌നേഹിക്കുന്നതും അമ്മയെയാകും. അമ്മമാരെ സഹായിക്കാൻ അവർക്ക് ഒരു പ്രത്യേക ഉത്സാഹമായിരിക്കും. അടുക്കളയിലും അലക്കുകല്ലിലുമെല്ലാം അമ്മയ്‌ക്കുപിന്നാലെ കൂടുന്നവരാകും പലരും. ഇപ്പോഴിതാ കാലിൽ പരിക്കേറ്റതിനാൽ നടക്കാൻ ബുദ്ധിമുട്ടുന്ന അമ്മയെ താങ്ങിപിടിക്കുന്ന ഒരു കുരുന്നിന്റെ ദൃശ്യങ്ങളാണ് സോഷ്യൽ മീഡിയയിൽ വൈറലാകുന്നത്. ഡയപ്പർ ധരിച്ച് അമ്മയെ താങ്ങിപ്പിടിക്കാൻ തിരക്കുകൂട്ടുകയാണ് ആ കുരുന്ന്. സംഭവം നടക്കുന്ന സ്ഥലമോ സമയമോ വ്യക്തമല്ല. ദൃശ്യങ്ങൾക്കൊപ്പം മനോഹരമായൊരു കുറിപ്പും പോസ്റ്റിനൊപ്പം പങ്കുവച്ചിട്ടുണ്ട്.

കുറിപ്പ്

'ലോകത്തിലെ ഏറ്റവും വലിയ ഹീറോകൾ വരുന്നത് തലപ്പാവോ ചിറകുകളോ വെച്ചല്ല. മറിച്ച് കുഞ്ഞുടുപ്പും ഡയപ്പറും ധരിച്ചാണ്. ഈ വീഡിയോയിൽ, കാലിന് പരിക്കേറ്റ ഒരമ്മ വീട്ടിലൂടെ നടക്കാൻ ശ്രമിക്കുകയാണ്. ഓരോ ചുവടും അവർക്ക് വേദന നിറഞ്ഞതും കഠിനവുമാണ്. ഓരോ ചുവടുവയ്ക്കുമ്പോഴും അവർ വല്ലാതെ കഷ്ടപ്പെടുന്നുണ്ട്. എന്നാൽ, ആ കാഴ്ചയെയാകെ മാറ്റിമറിക്കുന്ന ഒരു നിമിഷം അവിടെ സംഭവിക്കുന്നു. ആ അമ്മയുടെ ബുദ്ധിമുട്ട് കണ്ടുനിന്ന അവരുടെ പിഞ്ചുമകൻ ആരും ആവശ്യപ്പെടാതെ തന്നെ അമ്മയുടെ കാലുകൾക്ക് താങ്ങായി താഴെ ചെന്ന് നിൽക്കുന്നു.

തന്റെ കുഞ്ഞുശരീരം കൊണ്ട് അമ്മയ്ക്ക് ഒരു തുണയാകാൻ അവൻ ശ്രമിക്കുകയാണ്. അതൊരു ലളിതമായ പ്രവൃത്തിയാണ്. പക്ഷേ, അതിൽ ലോകത്തിലെ ഏറ്റവും വലിയ സ്നേഹമുണ്ട്. ആ നിമിഷം അവിടെ നടക്കുന്നത് വെറുമൊരു സഹായമല്ല. നമ്മളെ എന്നും കരുതലോടെ വളർത്തിയവരെ തിരികെ സംരക്ഷിക്കാൻ സ്നേഹം എത്ര നേരത്തെയാണ് പഠിക്കുന്നത് എന്നതിന്റെ മനോഹരമായ ഓർമ്മപ്പെടുത്തലാണത്. ആ നിമിഷനേരം കൊണ്ട്, ആ കൊച്ചു ബാലൻ തന്റെ അമ്മയുടെ വലിയ ഹീറോ ആയി മാറി. വാക്കുകൾക്കും അപ്പുറം കരുതലുളള ഒരു ഹൃദയത്തെയാണ് താൻ വളർത്തിയതെന്ന് ആ അമ്മ തിരിച്ചറിഞ്ഞ നിമിഷം'.