ജൂവലറി ഉടമയെ കാറിടിച്ചു വീഴ്ത്തി കവർച്ച.......സജീറിന്റെ 'കാമറാ പരിധി'യിൽ 5 മാസം മുമ്പ് നടന്ന കവർച്ചയും സംശയ നിഴലിൽ

ചേർത്തല: പൊന്നാംവെളിയിൽ ജൂവലറി ഉടമയെ കാറിടിച്ചു വീഴ്ത്തി കവർച്ച നടന്ന കേസിൽ കൂടുതൽ പരാതികൾ. കേസിൽ പ്രധാന പ്രതിയായി പൊലീസ് അറസ്റ്റു ചെയ്ത പ്രാദേശിക കോൺഗ്രസ് നേതാവ് സജീറിനെതിരെയാണ് പരാതി ഉയർന്നിരിക്കുന്നത്. സജീറിന്റെ കടയുടെ സമീപത്തുള്ള വീട്ടിൽ അഞ്ചുമാസം മുമ്പു നടന്ന കവർച്ചയി​ലും സംശയമുണ്ട്. സജീർ സി.സി.ടി.വി കാമറകൾ വഴിയാണ് ജൂവലറി ഉടമയെ നിരീക്ഷിച്ചിരുന്നത്. ഇത്തരത്തിൽ കാമറാ പരിധിയിലുള്ള വയോധികർ മാത്രമുള്ള വീട്ടിലാണ് അഞ്ചുമാസം മുമ്പ് കവർച്ച നടന്നത്.
ഈ സംഭവത്തിൽ പ്രതികളെ ഇതുവരെ പിടികൂടാനാട്ടില്ല. കവർച്ചയിൽ ആദ്യം പണം മാത്രമാണ് വീട്ടിൽ നിന്നും നഷ്ടപ്പെട്ടതെന്നായിരുന്നു വീട്ടുകാരുടെ പരാതി. എന്നാൽ പിന്നീട് സ്വർണമടക്കം നഷ്ടപ്പെട്ടതായും പരാതിയുണ്ടായി. ഇപ്പോൾ ജൂവലറി ഉടമക്കുനേരേ നടന്ന അക്രമത്തോടെയാണ് വിഷയം വീണ്ടും ഉയർന്നത്. സജീർ ഈ വിട്ടിലും നിരീക്ഷണം നടത്തിയിരുന്നതടക്കമുള്ള ആരോപണങ്ങളാണ് ഉയർന്നിരിക്കുന്നത്.
തുടരന്വേഷണത്തിനായി റിമാൻഡിലായ പ്രതികളെ കസ്റ്റഡിയിൽ വാങ്ങാൻ പൊലീസ് നടപടി തുടങ്ങിയിട്ടുണ്ട്. സജീർ(45) നെ കൂടാതെ അരീപ്പറമ്പു സ്വദേശി ശ്രീകുമാർ, തിരുവനന്തപുരം സ്വദേശികളായ അജയഘോഷ്, ബിബിൻ എന്നിവരാണ് റിമാൻഡിലുളളത്.