49.36 കോടിയുടെ ഇടക്കുളങ്ങര മേൽപ്പാലം യാഥാർത്ഥ്യത്തിലേക്ക്

തൊടിയൂർ: ഇടക്കുളങ്ങരയിൽ നിർമ്മിക്കാൻ ഉദ്ദേശിക്കുന്ന റെയിൽവേ മേൽപ്പാലത്തിന്റെ ടെൻഡർ നടപടികൾ ഓപ്പൺ ആയതായി സി.ആർ. മഹേഷ് എം.എൽ.എ അറിയിച്ചു. പൂർണമായും റെയിൽവേയുടെ ഫണ്ട് വിനിയോഗിച്ചാണ് ഈ ബൃഹദ് പദ്ധതി യാഥാർത്ഥ്യമാക്കുന്നത്. ഇതിന്റെ മുന്നോടിയായി മണ്ണു പരിശോധനയ്ക്കുള്ള പൈലിംഗ് ജോലികൾ നിലവിൽ പ്രദേശത്ത് പുരോഗമിക്കുകയാണ്.

 പദ്ധതിച്ചെലവ് 49.36 കോടി; 750 മീറ്റർ നീളം

ആകെ 49.36 കോടി രൂപ ചെലവഴിച്ചാണ് മേൽപ്പാലം നിർമ്മിക്കുന്നത്. ഇരുവശങ്ങളിലേക്കുമായി ആകെ 750 മീറ്റർ നീളത്തിലാണ് മേൽപ്പാലത്തിന്റെ ഘടന വിഭാവനം ചെയ്തിരിക്കുന്നത്. ഇതിൽ റെയിൽവേ ലൈനിന് മുകളിലൂടെ കടന്നുപോകുന്ന പ്രധാന ഭാഗത്തിന്റെ നിർമ്മാണം റെയിൽവേ നേരിട്ടാണ് നിർവഹിക്കുക.

 ഭൂമി ഏറ്റെടുക്കാൻ 16 കോടി കൈമാറി

മേൽപ്പാല നിർമ്മാണത്തിനായി ഭൂമി വിട്ടുനൽകുന്ന വസ്തു ഉടമകൾക്ക് നഷ്ടപരിഹാരം നൽകുന്നതിനായി 16 കോടി രൂപ ബന്ധപ്പെട്ട റവന്യൂ അധികൃതർക്ക് കൈമാറിക്കഴിഞ്ഞു. സ്ഥലമേറ്റെടുക്കൽ ഉൾപ്പെടെയുള്ള മറ്റ് സാങ്കേതിക നടപടിക്രമങ്ങൾ വരും മാസങ്ങളിൽ പൂർത്തിയാകും.



അടുത്ത രണ്ടു മാസത്തിനുള്ളിൽ ബാക്കി ഔദ്യോഗിക നടപടികൾ കൂടി പൂർത്തിയാക്കി പാലത്തിന്റെ നിർമ്മാണ ജോലികൾ നേരിട്ട് ആരംഭിക്കാൻ കഴിയും.പാലം യാഥാർത്ഥ്യമാകുന്നതോടെ പ്രദേശത്തെ ദീർഘകാലത്തെ യാത്രാക്ലേശത്തിന് ശാശ്വത പരിഹാരമാകും.

സി.ആ‌ർ.മഹേഷ് എം.എൽ.എ