വേറിട്ട കീഴ്‌‌വഴക്കം,​ ലോകകപ്പ് നേടിയ സ്പാനിഷ് താരങ്ങൾക്ക് സമ്മാനമായി കിട്ടിയത് കിലോക്കണക്കിന് തക്കാളി

മാഡ്രിഡ്: ഫിഫ ലോകകപ്പ് ജേതാക്കളായ സ്പാനിഷ് ടീമിലെ താരങ്ങൾക്ക് സ്വന്തം നാട് നൽകിയ വേറിട്ട ആദരം സമൂഹമാദ്ധ്യമങ്ങളിൽ വൈറലാണ്. വിജയികൾക്ക് കോടിക്കണക്കിന് രൂപ സമ്മാനമായി ലഭിച്ചതിന് പുറമെ ലോകകപ്പ് നേടാൻ നിർണായക പങ്കുവഹിച്ച ഫാബിയൻ റൂയിസിനും ഗാവിക്കും മറ്റൊരു സമ്മാനം കൂടി ലഭിച്ചു. ഇരുവരുടെയും ശരീരഭാരത്തിന് തുല്യമായ തക്കാളിയാണ് നാട്ടുകാർ ചേർന്ന് സമ്മാനമായി നൽകിയത്.

സ്പെയിനിലെ ആൻഡലൂസിയ മേഖലയിലെ ലോസ് പാലാസിയോസ് വൈ വില്ലാഫ്രോങ്ക എന്ന സ്ഥലത്ത് വർഷങ്ങളായി തുടരുന്ന പ്രത്യേക പാരമ്പര്യത്തിന്റെ ഭാഗമായാണ് ഈ അപൂർവ ആദരം താരങ്ങൾക്ക് നൽകിയത്. ഫാബിയൻ റൂയിസ് തന്റെ ഫുട്ബോൾ ജീവിതത്തിന് തുടക്കം കുറിച്ചത് ലോസ് പാലാസിയോസ് സിഎഫ് ക്ളബിലൂടെയാണ്.

ലോകകപ്പ് നേട്ടത്തിന് പിന്നാലെ ഇരുവർക്കും നാട്ടുകാർ വൻ സ്വീകരണമാണ് നൽകിയത്. ഇരുവരുടെയും പേരുകൾ അവരുടെ നാട്ടിലെ സ്റ്റേഡിയങ്ങൾക്ക് നൽകുകയും ചെയ്തു. 2010ൽ സ്പെയിൻ ലോകകപ്പ് നേടിയപ്പോൾ ഇതേ രീതിയിൽ മുൻ സ്പാനിഷ് താരം ജീസസ് നവാസിനും ശരീരഭാരത്തിന് തുല്യമായ തക്കാളി സമ്മാനിച്ചിരുന്നു. ടീമംഗങ്ങൾക്കൊപ്പം മാഡ്രിഡിൽ നടന്ന വിജയാഘോഷത്തിന് ശേഷമാണ് ഇരുവരും നാട്ടിലെത്തിയത്. ലക്ഷക്കണക്കിന് ആളുകളാണ് മാഡ്രിഡിലെ തെരുവുകളിൽ താരങ്ങളെ കാത്തുനിന്നത്. ഇതുകൂടാതെ സ്പാനിഷ് രാജാവ് ഫിലിപ്പെ ആറാമാൻ ടീമിന് സ്വീകരണവും ഒരുക്കിയിരുന്നു.