ഇന്ത്യക്ക് വേണ്ടത് ആറ് വിക്കറ്റുകൾ കൂടി; കൂറ്റൻ വിജയലക്ഷ്യത്തിന് മുന്നിൽ തകർന്ന് ലങ്ക

ഗോൾ: ശ്രീലങ്കയ്ക്കെതിരായ ആദ്യ ടെസ്റ്റിൽ ഇന്ത്യയ്ക്ക് ജയത്തിലേക്ക് 6 വിക്കറ്റുകൾ കൂടി. നാലാം ദിനം കളി അവസാനിക്കുമ്പോൾ ശ്രീലങ്ക രണ്ടാം ഇന്നിംഗ്‌സിൽ 4 വിക്കറ്റ് നഷ്ടത്തിൽ 84 റൺസ് എന്ന നിലയിലാണ്. നിലവിൽ ക്യാ‌പ്ടൻ ധനഞ്ജയ ഡി സിൽവയും (31), സോനൽ ദിനുശയുമാണ് ക്രീസിൽ (25) . അതേസമയം, നിസാൻ മധുശക (6), ലഹിരു ഉദാര (16), പസിന്ദു സൂര്യബണ്ടാര (0), കമിന്ദു മെൻഡിസ് (2) എന്നിവരുടെ വിക്കറ്റുകളാണ് ലങ്കയ്ക്ക് ഇതിനകം നഷ്ടമായത്.വിജയത്തിലേക്ക് ലങ്കയ്ക്ക് ഇനിയും 288 റൺസ് കൂട്ടിച്ചേർക്കണം. മുഹമ്മദ് സിറാജ്,​ പ്രസീദ്ധ് കൃഷ്ണ എന്നിവർ ഓരോ വിക്കറ്റും മാനവ് സുത്താർ രണ്ടു വിക്കറ്റുകളും വീഴ്‌ത്തി.

രണ്ടാം ഇന്നിംഗ്‌സിൽ 193 റൺസിന് പുറത്തായതോടെ 371 റൺസാണ് ഇന്ത്യയുടെ ആകെ ലീഡ്. സ്പിന്നർമാരെ തുണയ്ക്കുന്ന പിച്ചിൽ പേസർ അഷിത ഫെർണാണ്ടോയും സ്പിന്നർ പ്രഭാത് ജയസൂര്യയുമാണ് ഇന്ത്യൻ ബാറ്റിംഗ് നിരയെ തകർത്തത്. 69 പന്തിൽ 66 റൺസ് എടുത്ത ഋഷഭ് പന്താണ് ഇന്ത്യയുടെ ടോപ് സ്‌കോറർ. അതേസമയം, ആദ്യ ഇന്നിംഗ്‌സിൽ സോനൽ ദിനുശയുടെ സെഞ്ച്വറിയുടെയും (100) നിരോഷൻ ഡിക്‌വെല്ലയുടെ അർദ്ധസെഞ്ച്വറിയുടെയും (80) കരുത്തിൽ ശ്രീലങ്ക 284 റൺസ് എടുത്തു. മാനവ് സുതാർ നാല് വിക്കറ്റുകൾ വീഴ്ത്തി ഇന്ത്യൻ ബൗളിംഗ് നിരയിൽ തിളങ്ങി.

രണ്ടാം ഇന്നിംഗ്‌സിൽ ബാറ്റിംഗിനിറങ്ങിയ ഇന്ത്യയ്ക്ക് തുടക്കത്തിൽ തന്നെ തിരിച്ചടിയേറ്റു. ഓപ്പണർ യശസ്വി ജയ്സ്വാൾ (0) ആദ്യ ഓവറിൽ തന്നെ പുറത്തായി. രാഹുലും (35) ദേവ്‌ദത്ത് പടിക്കലും (44) ചേർന്ന് ഭേദപ്പെട്ട കൂട്ടുകെട്ട് പടുത്തുയർത്തിയെങ്കിലും സ്പിൻ ആക്രമണത്തിൽ വിക്കറ്റുകൾ വീണു. ക്യാപ്ടൻ ശുഭ്മാൻ ഗിൽ (8) വീണ്ടും നിരാശപ്പെടുത്തി.

പിന്നീട് ക്രീസിലെത്തിയ ഋഷഭ് പന്ത് ഏകദിന ശൈലിയിൽ തകർത്തടിച്ച് (2 സിക്സും 8 ഫോറും സഹിതം) ഇന്ത്യയുടെ ലീഡ് 350 കടത്തി. എന്നാൽ പന്ത് പുറത്തായതോടെ ഇന്ത്യൻ ചെറുത്തുനിൽപ്പ് അവസാനിച്ചു. ആദ്യ ഇന്നിംഗ്‌സിൽ ഇന്ത്യയുടെ 462 റൺസിനെതിരെ ബാറ്റിംഗിനിറങ്ങിയ ലങ്കയെ മാനവ് സുതാർ (4 വിക്കറ്റ്), രവീന്ദ്ര ജഡേജ (3 വിക്കറ്റ്) എന്നിവരുടെ നേതൃത്വത്തിലുള്ള സ്പിൻ നിര 284 റൺസിന് പുറത്താക്കുകയായിരുന്നു.