പഞ്ചാബിനെതിരായ രഞ്ജി ട്രോഫി മത്സരം നാളെമുതൽ

തിരുവനന്തപുരം : രഞ്ജി ട്രോഫി പുതിയ സീസണിലെ ആദ്യ മത്സരത്തിൽ നാളെ കേരളം പഞ്ചാബിനെ നേരിടും.തുമ്പ സെന്റ് സേവ്യേഴ്സ് കോളേജ് ഗ്രൗണ്ടിലാണ് മത്സരം.

മധ്യപ്രദേശ്, കർണാടക, ഹരിയാന, പശ്ചിമബംഗാൾ, ഉത്തർപ്രദേശ്, പഞ്ചാബ്, ബിഹാർ എന്നിവരുൾപ്പെട്ട എലൈറ്റ് ഗ്രൂപ്പ് സി-യിലാണ് കേരളം. കെ.സി.എൽ ഫൈനലിൽ ഉൾപ്പടെ സെഞ്ച്വറിനേടി മികച്ച ഫോമിലുള്ള സച്ചിൻ ബേബി തന്നെയാണ് ഈ സീസണിലും കേരളത്തെ നയിക്കുന്നത്.മുൻ ഇന്ത്യൻ താരം അമേയ് ഖുറേസ്യയാണ് പരിശീലകൻ. നിലവിൽ ഇന്ത്യൻ ടീമിനുവേണ്ടി കളിക്കുന്നതിനാൽ സഞ്ജു സാംസണിനെ ടീമിൽ ഉൾപ്പെടുത്തിയിട്ടില്ല.

മുൻ ഇന്ത്യൻ താരം വസിം ജാഫർ പരിശീലിപ്പിക്കുന്ന പഞ്ചാബ് ടീം മത്സരത്തിനായി തിരുവനന്തപുരത്തെത്തി. ഇന്ന് ടീം പരിശീലനം നടത്തും.