സഞ്ജുവിന്റെ അർദ്ധസെഞ്ച്വറി, അജ്നാസിന് ഹാട്രിക്,ഇമ്രാന്റെ തിരിച്ചടി ടൈറ്റ് മാച്ചിൽ ടൈറ്റാൻസ്

കൊച്ചി ബ്ളൂ ടൈഗേഴ്സിനെ അഞ്ചുവിക്കറ്റിന് തോൽപ്പിച്ച് തൃശൂർ ടൈറ്റാൻസ്

കൊച്ചി 188/7,തൃശൂർ 189/5

സഞ്ജു സാംസൺ 46 പന്തുകളിൽ 89 റൺസ്

അജ്നാസിന് ഹാട്രിക് ഉൾപ്പടെ അഞ്ചുവിക്കറ്റ്

അഹമ്മദ് ഇമ്രാന്റെ 40 പന്തുകളിൽ 72 റൺസ്

തിരുവനന്തപുരം : ആദ്യം സഞ്ജു സാംസണിന്റെ ബാറ്റിംഗ് വെടിക്കെട്ട്. പിന്നാലെ ഹാട്രിക്കും സഞ്ജുവിന്റേത് ഉൾപ്പടെ അഞ്ചുവിക്കറ്റുമായി അജ്നാസിന്റെ ബൗളിംഗ് വിസ്മയം. തീർന്നില്ല ചേസിംഗിൽ ആരവം തീർത്ത അർദ്ധസെഞ്ച്വറിയുമായി അഹമ്മദ് ഇമ്രാൻ(72). ഇഞ്ചോടിഞ്ച് പോരാട്ടത്തിൽ ആറാം വിക്കറ്റിൽ 71 റൺസ് കൂട്ടിച്ചേർത്ത സിജോമോൻ ജോസഫിന്റേയും (42*), എ.കെ അർജുന്റേയും (31*) വിജയഇന്നിംഗ്സ്. മത്സരത്തിന്റെ അവസാന പന്ത് സ്ട്രെയ്റ്റ് ബൗണ്ടറിയിലേക്ക് പറത്തി തൃശൂരിന്റെ തലൈവൻ സിജോമോൻ ജോസഫാണ് വിജയറൺ നേടിയത്.

ആദ്യം ബാറ്റുചെയ്ത കൊച്ചി ബ്ളൂ ടൈഗേഴ്സ് 46 പന്തുകളിൽ നാലുഫോറും ഒൻപത് സിക്സുമടക്കം പായിച്ച സഞ്ജുവിന്റെ മികവിൽ 188/7 എന്ന സ്കോറിലേക്കെത്തി. കഴിഞ്ഞദിവസം കൊല്ലം സെയ്‌ലേഴ്സിനെതിരെ സെഞ്ച്വറി നേടിയതിന്റെ തുടർച്ചയെന്നോണം ഓപ്പണറായിറങ്ങി ബാറ്റുവീശിയ സഞ്ജു 18-ാം ഓവർ വരെ ക്രീസിലുണ്ടായിരുന്നു. രണ്ടാം ഓവറിൽ വിനൂപ് മനോഹരനും (5),11-ാം ഓവറിൽ ഷാനുവും (24),14-ാം ഓവറിൽ നിഖിലും (14),16-ാം ഓവറിൽ സലിയും (16) പുറത്തായെങ്കിലും സഞ്ജു ടീമിനെ മുന്നോട്ടുനയിച്ചു. ഷാനുവിനെയും സലിയേയും പുറത്താക്കിയിരുന്ന അജ്നാസ് 18-ാംഓവറിലെ അടുത്തടുത്ത പന്തുകളിൽ സഞ്ജു ജെറിൻ മുഹമ്മദ് ആഷിഖ് എന്നിവരെ പുറത്താക്കി ഹാട്രിക് തികച്ചത്.അജ്നാസാണ് പ്ളേയർ ഒഫ് ദ മാച്ചും.

മറുപടിക്കിറങ്ങിയ തൃശൂരിനായി അഹമ്മദ് ഇമ്രാൻ തുടക്കം മുതൽ അടി തുടങ്ങിയെങ്കിലും മറുവശത്ത് ആനന്ദ് കൃഷ്ണൻ(7), ഷോൺ റോജർ (8),വിഷ്ണു മേനോൻ(3) എന്നിവർ മടങ്ങിയിരുന്നു. നാലാംവിക്കറ്റിൽ അക്ഷയ് മനോഹറിനൊപ്പം 51 റൺസ് കൂട്ടിച്ചേർത്ത ഇമ്രാൻ 14-ാം ഓവറിൽ ടീമിനെ 117/5ലെത്തിച്ച ശേഷമാണ് മടങ്ങിയത്.40 പന്തുകളിൽ ഏഴു ഫോറും നാലു സിക്സുമടക്കമായിരുന്നു ഇമ്രാന്റെ അർദ്ധസെഞ്ച്വറി. തുടർന്ന് ക്രീസിലൊരുമിച്ച സിജോയും അർജുനും ചേർന്ന് വിജയിക്കാൻ 72 റൺസാണ് കൂട്ടിച്ചേർത്തത്.

ഈ സീസണിലെ കൊച്ചി ബ്ളൂ ടൈഗേഴ്സിന്റെ ആദ്യ തോൽവിയാണിത്.കൊച്ചിക്കും തൃശൂരിനും ആറ് പോയിന്റ് വീതമായി.കൊച്ചി ഇന്ന് കാലിക്കറ്റിനേയും തൃശൂർ ട്രിവാൻഡ്രത്തേയും നേരിടും.

ഇന്നത്തെ മത്സരങ്ങൾ

കാലിക്കറ്റ് Vs കൊച്ചി

2.30 pm മുതൽ

തൃശൂർ Vs ട്രിവാൻഡ്രം

6.45 pm മുതൽ