ഇംഗ്ളണ്ടിൽ ലിവർ അല്ലാതെയാര്?

നോർവിച്ച് സിറ്റിയെ 1-0 ത്തിന് കീഴടക്കി പ്രിമിയർ ലീഗിൽ ലിവർപൂൾ ഒന്നാം സ്ഥാനത്ത് തുടരുന്നു.

ലണ്ടൻ : ഇംഗ്ളീഷ് പ്രിമിയർ ലീഗ് കിരീടം ഇക്കുറി മറ്റാരും സ്വപ്നം കാണേണ്ടെന്ന് വ്യക്തമാക്കി ലിവർപൂൾ കുതിപ്പ് തുടരുന്നു. കഴിഞ്ഞ രാത്രി നടന്ന മത്സരത്തിൽ ലിവർപൂൾ ഏകപക്ഷീയമായ ഒരു ഗോളിന് നോർവിച്ച് സിറ്റിയെ കീഴടക്കി. 78-ാം മിനിട്ടിൽ സാഡിയോ മാനേയാണ് ലിവർപൂളിന്റെ വിജയഗോൾ നേടിയത്. പ്രിമിയർ ലീഗിൽ മാനേയുടെ 100-ാമത് ഗോളായിരുന്നു നോർവിച്ച് സിറ്റിക്കെതിരെ നേടിയത്.

ഈ വിജയത്തോടെ ലിവർപൂളിന് 26 മത്സരങ്ങളിൽ നിന്ന് 76 പോയിന്റായി. രണ്ടാം സ്ഥാനക്കാരായ മാഞ്ചസ്റ്റർ സിറ്റിക്ക് 25 മത്സരങ്ങളിൽ നിന്ന് 51 പോയിന്റേ നേടാനായിട്ടുള്ളൂ.

ലീഗിൽ ലിവർപൂളിന്റെ 17-ാമത്തെ തുടർ വിജയമാണിത്. ഈ സീസണിൽ ഒറ്റക്കളിപോലും തോൽക്കാതെയാണ് ലിവറിന്റെ കുതിപ്പ്. ഒരു കളിയിൽ മാത്രമാണ് സമനിലയിൽ പിരിയേണ്ടി വന്നത്.

ഗോളില്ലാതെ മെസി, ബാഴ്സയ്ക്ക് ജയം

മാഡ്രിഡ് : സ്പാനിഷ് ലാലിഗയിൽ കഴിഞ്ഞ രാത്രി നടന്ന മത്സരത്തിൽ ബാഴ്സലോണ 2-1 ന് ഗെറ്റാഫെയെ കീഴടക്കി. 33-ാന മിനിട്ടി അന്റോയിൽ ഗ്രീസ്‌മാനും 39-ാം മിനിട്ടിൽ സെർജി റോബർട്ടോയുമാണ് ബാഴ്സയ്ക്കുവേണ്ടി സ്കോർ ചെയ്തത്. 66-ാം മിനിട്ടിൽ ഏയ്ഞ്ചൽ ഗെറ്റാഫെയുടെ ആശ്വാസ ഗോൾ നേടി.

തുടർച്ചയായ നാലാം മത്സരത്തിലാണ് ബാഴ്സയുടെ സൂപ്പർ താരം മെസി ഗോളടിക്കാതെയിരിക്കുന്നത്. 2014 ന് ശേഷം ആദ്യമാണ് മെസിക്ക് സ്കോറിംഗിന് ഇത്ര വലിയ ഇടവേള വരുന്നത്. എന്നാൽ കഴിഞ്ഞ മത്സരങ്ങളിലെല്ലാം സഹതാരങ്ങൾക്ക് അവസരമൊരുക്കിയത് മെസിയാണ്.