ടാറും മെറ്റലും ഇളകി തിട്ടയിൽമുക്ക് -നാലുതട്ട് വിള റോഡ്

മുടപുരം: ടാറും മെറ്റലുമിളകി തകർന്നുകിടക്കുന്ന തിട്ടയിൽമുക്ക് -നാലുതട്ട് വിള റോഡ് റീ ടാർ ചെയ്ത് ഗതാഗത യോഗ്യമാക്കണമെന്ന നാട്ടുകാരുടെ ആവശ്യം ശക്തമാകുന്നു. കിഴുവിലം ഗ്രാമ പഞ്ചായത്തിലെ 19-ാം വാർഡിൽ ഉൾപ്പെട്ടതാണ് ഈ റോഡ്. തിട്ടയിൽ മുക്കിൽ നിന്ന് ആരംഭിച്ച് നാടകാചാര്യൻ പ്രൊഫ.ജി. ശങ്കരപ്പിള്ളയുടെ വീടിനുമുന്നിൽ അവസാനിക്കുന്ന റോഡ് പൂർണമായും തകർന്നുകിടക്കുകയാണ്. വലിയ വളവും തിരിവുമുള്ള ഈ റോഡിലെ ടാറും മെറ്റലും ഇളകി കുണ്ടും കുഴിയുമായി കിടക്കുന്നതിനാൽ വാഹന യാത്രക്ക് പുറമെ കാൽനട യാത്രയും ദുഷ്കരമാണ്. ഒപ്പം അപകട സാദ്ധ്യതയും ഏറെയുണ്ട്.

 നൂറോളം കുടുംബങ്ങൾ യാത്രക്ക് ആശ്രയിക്കുന്ന ഈ റോഡ് ടാർചെയ്‌തിട്ട് അഞ്ചുവർഷത്തിലേറെയായി  കാലപ്പഴക്കംകൊണ്ട് ടാറിളകിയ റോഡ് റീ ടാർ ചെയ്യാൻ അധികൃതർ തയ്യാറായിട്ടില്ലെന്ന് പരാതി

 നടപടി വേണം

ഇരുചക്ര വാഹന യാത്രക്കാർ പലപ്പോഴും രാത്രികാലങ്ങളിൽ ഈ കുഴിയിൽ വീണ് അപകടം സംഭവിക്കുന്നത് നിത്യസംഭവമാണ്. രാത്രികാലങ്ങളിൽ നടക്കുന്ന അപകടങ്ങൾ സമീപവാസികൾ അറിയാതെ പോകുന്നതും പതിവാണ്. അപകടങ്ങൾ പതിവാകുന്ന സാഹചര്യത്തിൽ റോഡ് എത്രയും വേഗം റീ ടാർചെയ്യാൻ അടിയന്തര നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു.