വിഴിഞ്ഞത്തെ ഓഹരി കൈമാറ്റവും നിയമവശവും

വിഴിഞ്ഞം അന്താരാഷ്ട്ര തുറമുഖത്തിന്റെ നിർമ്മാണവും നടത്തിപ്പും കൈകാര്യം ചെയ്യുന്ന 'അദാനി വിഴിഞ്ഞം പോർട്ട് പ്രൈവറ്റ് ലിമിറ്റഡ്' കമ്പനിയുടെ 49 ശതമാനം ഓഹരികൾ ലോകത്തിലെ ഏറ്റവും വലിയ കപ്പൽച്ചാൽ കമ്പനിയായ മെഡിറ്ററേനിയൻ ഷിപ്പിംഗ് കമ്പനിയുടെ അനുബന്ധ സ്ഥാപനമായ 'ടെർമിനൽ ഇൻവെസ്റ്റ്‌മെന്റ് ലിമിറ്റഡിന്' വിൽക്കാൻ അദാനി ഗ്രൂപ്പ് തീരുമാനിച്ച വാർത്ത വലിയ ചർച്ചകൾക്കാണ് വഴിതുറന്നിരിക്കുന്നത്. ഏകദേശം 13,220 കോടി രൂപയുടേതാണ് ഇടപാട്. പദ്ധതിയുടെ യഥാർത്ഥ ഉടമസ്ഥരായ സംസ്ഥാന സർക്കാരിന്റെ മുൻകൂർ അനുമതിയില്ലാതെ വൻകിട ഇടപാട് പ്രഖ്യാപിക്കപ്പെട്ടത് ഒട്ടനവധി ചോദ്യങ്ങളുയർത്തുന്നു.

എന്തുകൊണ്ട് അദാനി ഓഹരികൾ വിറ്റു?

ആഗോള ട്രാൻസ്ഷിപ്പ്‌മെന്റ് തുറമുഖം വിജയകരമായി മുന്നോട്ട് കൊണ്ടുപോകാൻ രാജ്യാന്തര വാണിജ്യബന്ധങ്ങൾ അത്യാവശ്യമാണ്. ഓഹരിക്കൈമാറ്റത്തിന് പിന്നിൽ തന്ത്രപരമായ കാരണങ്ങളുണ്ട്:
* ലോകത്തിലെ ഏറ്റവും വലിയ കണ്ടെയ്നർ ഷിപ്പിങ് കമ്പനിയാണ് സ്വിറ്റ്സർലൻഡ് ആസ്ഥാനമായുള്ള എം.എസ്.സി. ഓഹരി പങ്കാളിത്തം നൽകുന്നതിലൂടെ അവരുടെ ഭൂരിഭാഗം മദർഷിപ്പുകളും സ്ഥിരമായി വിഴിഞ്ഞത്തേക്ക് അടുപ്പിക്കുമെന്ന് അദാനി ഉറപ്പാക്കുന്നു.

* രണ്ടാം ഘട്ട വികസനത്തിന് അദാനി ഗ്രൂപ്പ് ഏകദേശം 16,000 കോടി രൂപ മുടക്കേണ്ടതുണ്ട്. ഈ തുക കണ്ടെത്താനും ആഗോള നിക്ഷേപം ആകർഷിക്കാനുമാണ് നീക്കം.
* അദാനിയുടെ വാദം: തങ്ങളുടെ പക്കലുള്ള ഓഹരികളാണ് വിറ്റഴിച്ചതെന്നും കരാറിലെ വ്യവസ്ഥകൾ പാലിച്ച് കമ്പനിയുടെ നിയന്ത്രണം ഇപ്പോഴും അദാനിയുടെ പക്കൽ തന്നെയാണെന്നുമാണ് വിശദീകരണം. വിവരങ്ങൾ സെബിയെ അറിയിച്ചിട്ടുണ്ടെന്നും കേന്ദ്ര-സംസ്ഥാന സർക്കാരുകളെ ഔദ്യോഗികമായി അറിയിക്കുമെന്നും അവർ വ്യക്തമാക്കുന്നു.

കൺസഷൻ കരാറിലെ കുരുക്കുകൾ

1.വ്യവസ്ഥ 5.3

വിഴിഞ്ഞം പോർട്ടിനായി സംസ്ഥാന സർക്കാരും അദാനി ഗ്രൂപ്പും ഒപ്പുവച്ച 'കൺസഷൻ കരാറിലെ' വ്യവസ്ഥ 5.3 അനുസരിച്ച്, തുറമുഖത്തിന്റെ ഉടമസ്ഥാവകാശത്തിൽ എന്തെങ്കിലും മാറ്റം വരുത്തണമെങ്കിൽ പദ്ധതിയുടെ അധിപരായ കേരള സർക്കാരിന്റെ മുൻകൂർ അനുമതി വാങ്ങിയിരിക്കണം. സർക്കാരിനെ അറിയിക്കാതെയുള്ള നീക്കം സാങ്കേതികമായി കരാർ ലംഘനത്തിന്റെ പരിധിയിൽ വരാൻ സാദ്ധ്യതയുണ്ട്.

2.കമ്പനി നിയമവും ഉടമസ്ഥാവകാശ മാറ്റവും

സാധാരണ കമ്പനി നിയമപ്രകാരം 75 ശതമാനത്തിലധികം ഓഹരികൾ കൈമാറുമ്പോഴാണ് പൂർണമായ ഉടമസ്ഥാവകാശ മാറ്റം വരുന്നത്. എന്നാൽ വിഴിഞ്ഞം കരാറിലെ പ്രത്യേക വ്യവസ്ഥകൾ പ്രകാരം 25 ശതമാനമോ അതിൽ കൂടുതലോ ഓഹരികൾ കൈമാറ്റം ചെയ്യപ്പെടുന്നത് ഉടമസ്ഥാവകാശത്തിലെ വലിയൊരു മാറ്റമായി കണക്കാക്കാം. വിഴിഞ്ഞം അന്താരാഷ്ട്ര ട്രാൻസ്ഷിപ്പ്‌മെന്റ് തുറമുഖവും രാജ്യത്തിന്റെ തന്ത്രപ്രധാനമായ അടിസ്ഥാന സൗകര്യവുമാണ്. അതിനാൽ വിദേശ കമ്പനിക്ക് ഓഹരി നൽകുമ്പോൾ കേന്ദ്ര ആഭ്യന്തര മന്ത്രാലയത്തിന്റെയും ഷിപ്പിംഗ് മന്ത്രാലയത്തിന്റെയും പ്രത്യേക സുരക്ഷാ അനുമതികൾ അനിവാര്യമാണ്.

തുറമുഖ നഗര നിർമ്മാണത്തെ ബാധിക്കുമോ?

തുറമുഖത്തോടനുബന്ധിച്ച് തിരുവനന്തപുരം നഗരത്തെയും പരിസര പ്രദേശങ്ങളെയും ഉൾപ്പെടുത്തിയുള്ള 'പോർട്ട് സിറ്റി' പ്രൊജക്ടിനെ ഈ ഓഹരി വില്പന രണ്ട് രീതിയിൽ സ്വാധീനിച്ചേക്കാം:

അനുകൂല വശങ്ങൾ

വിഴിഞ്ഞത്തെത്തുന്ന കണ്ടെയ്നറുകളുടെ എണ്ണം കുത്തനെ ഉയരും. ഇത് തുറമുഖത്തിന് ചുറ്റുമുള്ള ലോജിസ്റ്റിക്സ് പാർക്കുകൾ,വെയർഹൗസുകൾ,അനുബന്ധ വ്യവസായങ്ങൾ എന്നിവയുടെ നിർമ്മാണത്തിന് വേഗത കൂട്ടും. ലോകോത്തര കമ്പനികൾ നിക്ഷേപം നടത്താൻ താത്പര്യം കാണിക്കുന്നതുവഴി രാജ്യാന്തര ബിസിനസ് ഭൂപടത്തിൽ വിഴിഞ്ഞം പോർട്ട് സിറ്റിയുടെ മൂല്യം വർദ്ധിക്കും.

ആശങ്കാജനകമായ വശങ്ങൾ

ഒരു പ്രത്യേക ഷിപ്പിങ് കമ്പനി തുറമുഖത്തിന്റെ വലിയൊരു പങ്ക് ഓഹരി സ്വന്തമാക്കുമ്പോൾ ചെറുതും വലുതുമായ കപ്പൽ കമ്പനികൾക്ക് തുറമുഖം ഉപയോഗിക്കുന്നതിൽ വിവേചനം നേരിടേണ്ടി വരുമോ എന്ന ആശങ്കയുണ്ട്. എം.എസ്.സിക്ക് കുത്തക ലഭിച്ചാൽ അവർ നിശ്ചയിക്കുന്ന വാടകയും നിബന്ധനകളും അനുസരിക്കാൻ മറ്റുള്ളവർ നിർബന്ധിതരാകും. ഇത് മറ്റ് വ്യവസായ സംരംഭങ്ങളെ പ്രതികൂലമായി ബാധിക്കാം.

സർക്കാരിന്റെ ജാഗ്രതയും മുന്നോട്ടുള്ള വഴിയും

അദാനി ഗ്രൂപ്പ് ഔദ്യോഗികമായി അപേക്ഷ സമർപ്പിക്കുമ്പോൾ താഴെ പറയുന്ന പ്രധാന കാര്യങ്ങൾ

പരിശോധിച്ച് മാത്രമേ അനുമതി നൽകൂ എന്ന് മുഖ്യമന്ത്രി വ്യക്തമാക്കിയിട്ടുണ്ട്:

*വിദേശ കമ്പനിയുടെ നിക്ഷേപം രാജ്യത്തിന്റെ സുരക്ഷയെ ബാധിക്കില്ലെന്ന് ഉറപ്പുവരുത്തുക.
*കേരളത്തിന്റെ വരുമാന വിഹിതത്തെയോ സംസ്ഥാന താത്പര്യങ്ങളെയോ ഇടപാട് ഹനിക്കുന്നില്ലെന്ന് ഉറപ്പാക്കുക.
*തുറമുഖം കുത്തകയായി മാറാതിരിക്കാനും എല്ലാ കപ്പലുകൾക്കും തുല്യമായ അവസരം നൽകുന്ന 'കോമൺ യൂസർ ഫെസിലിറ്റി' ആയി തുടരുന്നുവെന്ന് ഉറപ്പാക്കാനും കടുത്ത വ്യവസ്ഥകൾ വയ്ക്കുക.

ചുരുക്കത്തിൽ,അദാനി ഗ്രൂപ്പ് കൊണ്ടുവന്ന വിദേശ നിക്ഷേപം തുറമുഖത്തിന്റെ വാണിജ്യ സാദ്ധ്യതകളെയും അനുബന്ധ പോർട്ട് സിറ്റി വികസനത്തെയും ഉത്തേജിപ്പിക്കാൻ പോന്നതാണ്. എങ്കിലും സർക്കാരിനെ മറികടന്നുള്ള കോർപ്പറേറ്റ് നീക്കങ്ങൾ പ്രോത്സാഹിപ്പിക്കപ്പെടേണ്ടതല്ല. നിയമപരമായ ചട്ടങ്ങൾ പാലിച്ച്,സംസ്ഥാനത്തിന്റെ ദീർഘകാല സാമ്പത്തിക താത്പര്യങ്ങളും സുരക്ഷയും സംരക്ഷിച്ചുകൊണ്ട് മാത്രമേ ഈ ഓഹരി കൈമാറ്റത്തിന് അന്തിമ അനുമതി നൽകാവൂ. ഈ വലിയ നിക്ഷേപത്തെ കേരളത്തിന്റെ സമഗ്ര വികസനത്തിനായി ഉപയോഗിക്കാൻ സർക്കാരിന് സാധിക്കട്ടെ