മുഖ്യമന്ത്രി വി ഡി സതീശനും കുടുംബത്തിനുമെതിരെ കൊലവിളി നടത്തിയയാൾ അറസ്റ്റിൽ

തിരുവനന്തപുരം: മുഖ്യമന്ത്രി വി ഡി സതീശനും കുടുംബത്തിനുമെതിരെ വധഭീഷണി നടത്തിയയാൾ അറസ്റ്റിൽ. ചിറയിൻകീഴ് സ്വദേശിയായ ടോണിയാണ് അറസ്റ്റിലായത്. ഇയാൾക്ക് മാനസിക പ്രശ്നമുള്ളതായി പൊലീസ് സംശയിക്കുന്നു. തിരുവനന്തപുരം സിറ്റി പൊലീസ് കമാൻഡിംഗ് സെന്ററിലെ ഔദ്യോഗിക ഫോൺ നമ്പറിലേക്കാണ് ഫോൺ കോൾ എത്തിയത്.

ഇന്നലെ വൈകിട്ടായിരുന്നു സംഭവം. 6238168522 എന്ന നമ്പറിൽ നിന്നാണ് വിളിയെത്തിയത്. പല തവണ വിളിച്ച് കൊലവിളി നടത്തുകയായിരുന്നു. മുഖ്യമന്ത്രിയെയും കുടുംബത്തെയും കൊലപ്പെടുത്തി തനിക്ക് പ്രശസ്തനാകണമെന്നാണ് ടോണി ഫോൺ വിളിച്ചുകൊണ്ട് പറഞ്ഞത്. വി ഡി സതീശനെ തനിക്ക് ഇഷ്ടമല്ലെന്ന് പറഞ്ഞ പ്രതി മുഖ്യമന്ത്രിക്ക് ഇപ്പോൾ നൽകുന്ന സുരക്ഷ മതിയോയെന്നും പൊലീസിനോട് ചോദിച്ചു.

സംഭവത്തിൽ കന്റോൺമെന്റ് പൊലീസ് ആണ് കേസെടുത്ത് അന്വേഷണം നടത്തിയത്. സിറ്റി പൊലീസ് കമാൻഡിംഗ് സെന്റർ ഡ്യൂട്ടി ഓഫീസർ സുരേഷ് കുമാർ നൽകിയ പരാതിയുടെ അടിസ്ഥാനത്തിൽ കന്റോൺമെന്റ് പൊലീസ് എഫ് ഐ ആർ രജിസ്റ്റ‌ർ ചെയ്തിട്ടുണ്ട്. പ്രതിക്കെതിരെ വിവിധ വകുപ്പുകൾ ചുമത്തിയിട്ടുണ്ട്.