10, 12 ക്ലാസ് യോഗ്യതയുണ്ടോ? റെയിൽവേയിൽ വമ്പൻ അവസരം; 1,688 ഒഴിവുകളിലേക്ക് അപേക്ഷിക്കാം

1 MIN READ | AUTHOR : Web Desk
PUBLISHED: SEPTEMBER 29, 2026 04:10 PM IST

railway-recruitment — പ്രതീകാത്മക ചിത്രം

ന്യൂഡൽഹി: റെയിൽവേ റിക്രൂട്‌മെന്റ് ബോർഡ് (ആർആ‌ർബി) വിവിധ തസ്‌തികകളിലേക്ക് അപേക്ഷ ക്ഷണിച്ചു. നോൺ- ടെ‌ക്‌നിക്കൽ പോപ്പുലർ കാറ്റഗറീസ് അണ്ടർ ഗ്രാജുവേറ്റ് വിഭാഗത്തിലെ വിവിധ തസ്‌തികകളിലേക്കാണ് അപേക്ഷ ക്ഷണിച്ചത്. ട്രെയിനിലെ ക്ലർക്ക്, കൊമേഷ്യൽ കം ടിക്കറ്റ് ക്ലർക്ക്, അക്കൗണ്ട്‌സ് ക്ലർക്ക് കം ടൈപ്പിസ്റ്റ്, ജൂനിയർ ക്ലർക്ക് കം ടൈപിസ്റ്റ് എന്നീ തസ്‌തികകളിലായി ആകെ 1,688 ഒഴിവുകളാണ് റിപ്പോർട്ട് ചെയ്‌തിരിക്കുന്നത്.

പത്താം ക്ലാസ്, പ്ലസ്‌ടു യോഗ്യതയുള്ളവർക്ക് വിവിധ തസ്‌തികകളിലേക്ക് അപേക്ഷിക്കാം. ഒക്‌ടോബർ 15 മുതൽ അപേക്ഷ സമർപ്പിക്കാം. നവംബർ 13 ആണ് അവസാന തീയതി. അപേക്ഷകൾ ഓൺലൈനായി മാത്രമേ സ്വീകരിക്കുകയുള്ളു. തിരഞ്ഞെടുക്കപ്പെടുന്നവർക്ക് 19,900 രൂപ മുതൽ 21,700 രൂപവരെ ശമ്പളം ലഭിക്കും. രാജ്യത്തിന്റെ വിവിധ ഭാഗങ്ങളിലായിട്ടാകും നിയമനം.

പ്രായപരിധി

18നും 30നും ഇടയിൽ പ്രായമുള്ളവർക്കാണ് അപേക്ഷിക്കാനാകുക. സംവരണ വിഭാഗത്തിലുള്ളവർക്ക് നിലവിലുള്ള ചട്ടങ്ങൾ പ്രകാരമുള്ള പ്രായപരിധിയിലെ ഇളവുകൾ ബാധകമായിരിക്കും.

അപേക്ഷാ ഫീസ്

ജനറൽ വിഭാഗത്തിലെ ഉദ്യോഗാർത്ഥികൾക്ക് 500 രൂപയാണ് അപേക്ഷാ ഫീസ്. സംവരണ വിഭാഗത്തിൽപ്പെടുന്ന ഉദ്യോഗാർത്ഥികൾക്ക് 250 രൂപ നൽകിയാൽ മതിയാകും.

നടപടിക്രമം

രണ്ട് ഘട്ടങ്ങളിലായി നടത്തുന്ന കമ്പ്യൂട്ടർ അധിഷ്‌ഠിത പരീക്ഷകൾക്ക് ശേഷം സർട്ടിഫിക്കറ്റുകൾ പരിശോധിച്ചാണ് അർഹരായവരെ തിരഞ്ഞെടുക്കുന്നത്. ഓൺലൈനായി അപേക്ഷ സമർപ്പിക്കുമ്പോൾതന്നെ ആധാർ വേരിഫിക്കേഷൻ നടത്തേണ്ടിവരും.

വിശദമായ വിവരങ്ങൾ വെബ്‌സൈറ്റിൽ

നിയമനവുമായി ബന്ധപ്പെട്ട എല്ലാ നിബന്ധനകളും യോഗ്യതാ മാനദണ്ഡങ്ങളും നടപടിക്രമങ്ങളും ആർആർബി പുറത്തിറക്കിയ വിജ്ഞാപനത്തിൽ വിശദമായി നൽകിയിട്ടുണ്ട്. ആർആർബിയുടെ ഔദ്യോഗിക വെബ്‌സൈറ്റായ rrb.indianrailways.gov.in-ൽ വിശദമായ വിജ്ഞാപനം പ്രസിദ്ധീകരിച്ചിട്ടുണ്ട്.