നെടുമ്പാശേരിയിൽ  ഹോട്ടലിൽ  വൻ തീപിടിത്തം: ഗ്രാൻഡ് മലബാർ ഹോട്ടൽ പൂർണമായും കത്തിനശിച്ചു

കൊച്ചി: നെടുമ്പാശേരിയിലെ ഹോട്ടലിൽ വൻ തീപിടിത്തം. ഗ്രാൻഡ് മലബാർ ഹോട്ടലിലാണ് തീപിടിത്തമുണ്ടായത്. ഹോട്ടൽ പൂർണമായും കത്തിനശിച്ചു. മൂന്ന് ഫയർഫോഴ്‌സ് യൂണിറ്റുകൾ അരമണിക്കൂറോളം ശ്രമിച്ചാണ് തീ നിയന്ത്രണവിധേയമാക്കിയത്.

ഇന്ന് ഉച്ചയ്ക്ക് 12 ഓടെയായിരുന്നു തീപിടിത്തമുണ്ടായത്. ആളുകൾ ഭക്ഷണം കഴിച്ചുകൊണ്ടിരിക്കെയാണ് തീപടർന്നതെന്നാണ് വിവരം. ഇവരെ ഉടൻതന്നെ സുരക്ഷിതമായി ഒഴിപ്പിച്ചെന്ന് അധികൃതർ അറിയിച്ചു. ഹോട്ടലിന്റെ മുന്നിലെ ചായക്കടയിൽ നിന്നാണ് തീപടർന്നതെന്നാണ് വിവരം. തുടർന്ന് തീ ഹോട്ടലിലേയ്ക്ക് പടരുകയായിരുന്നു.