ശബരിമല നട തുറന്നു

ശബരിമല: കന്നിമാസ പൂജകൾക്കായി ശബരിമല നട തുറന്നു. ഇന്നലെ വൈകിട്ട് അ‌ഞ്ചിന് തന്ത്രി കണ്ഠരര് ബ്രഹ്മദത്തന്റെ സാന്നിദ്ധ്യത്തിൽ മേൽശാന്തി ഇ.ഡി.പ്രസാദ് നമ്പൂതിരി നടതുറന്ന് ശ്രീലകത്ത് ദീപം തെളിച്ചു. മേൽശാന്തി പതിനെട്ടാം പടിയിറങ്ങി തിരുമുറ്റത്തെ ഹോമകുണ്ഡത്തിൽ അഗ്നി തെളിച്ചു. ഇതിനുശേഷമാണ് ഭക്തരെ പതിനെട്ടാംപടി ചവിട്ടാൻ അനുവദിച്ചത്. ഇന്നലെ പ്രത്യേക പൂജകളില്ലായിരുന്നു. കന്നിമാസ പൂജകൾ പൂർത്തിയാക്കി 21ന് രാത്രി 10ന് നടയടയ്ക്കും. ഭക്തർക്ക് www.sabarimalaonline.orgൽ വെർച്വൽ ക്യൂ വഴിയും പമ്പയിൽ സ്‌പോട്ട് ബുക്കു ചെയ്തും ദർശനം നടത്താം.