വയറിളക്ക രോഗം പടരുന്നു ,​ ചികിത്സ തേടിയത് 1780 പേർ

ആലപ്പുഴ: ജില്ലയിൽ ആശങ്കയായി വയറിളക്കരോഗം പടരുന്നു. കഴിഞ്ഞ പന്ത്രണ്ട് ദിവസത്തിനിടെ ജില്ലയിൽ 1780 പേരാണ് വയറിളക്ക രോഗത്തിന് ചികിത്സ തേടിയത്. ജൂൺ ഒന്ന്​ മുതൽ വെള്ളിയാഴ്ചവരെ സർക്കാർ ആശുപത്രിയി​ലെ കണക്കാണിത്​. സ്വകാര്യആശുപത്രിയിലെ കണക്കുകൂടി

കൂട്ടിയാൽ രോഗബാധിതരുടെ എണ്ണം ഇരട്ടിയാകും. വെള്ളത്തിൽ നിന്നാണ്​ ഭൂരിഭാഗം പേർക്കും രോഗബാധയെന്നാണ്​ നിഗമനം.

ജില്ലയിൽ ഇതു​വരെ കുട്ടികളടക്കം ഏഴുപേർക്കാണ്​ ഷിഗെല്ല പിടിപെട്ടത്​. ഇതിൽ ആറുപേർ ആറാട്ടുപുഴയിലും ഒരാൾ കോടംതുരുത്തിലുമാണ്​.

ആറാട്ടുപുഴ പ്രദേശത്ത് കുട്ടികൾക്ക് മാരകമായ ബാക്ടീരിയൽ അണുബാധയായ ഷിഗെല്ല രോഗലക്ഷണമാണ്​ കണ്ടെത്തിയത്​. മോശം ഭക്ഷണം, കുടിവെള്ളം എന്നിവയിൽ നിന്നാണ് രോഗവ്യാപനമുണ്ടായത്​. ജല അതോറിട്ടിയുടെ കുടിവെള്ള സാമ്പിളുകൾ പരിശോധിച്ചപ്പോൾ കോളിഫോം ബാക്ടീരിയയുടെ സാന്നിദ്ധ്യം കണ്ടെത്തിയിട്ടുണ്ട്.എന്നാൽ, അതുതന്നെയാണ് രോഗവ്യാപനത്തിന് കാരണമെന്ന് വ്യക്തമല്ല.

ശക്തമായ പനി, വയറുവേദന, ഛർദ്ദി, വയറിളക്കം എന്നിവ രോഗലക്ഷണമുള്ളവരെ ആരോഗ്യപ്രവർത്തകർ നിരീക്ഷിക്കുന്നുണ്ട്​. ഡെങ്കിപ്പനി ബാധിച്ച്​ വയോധികൻ മരിച്ചതിന്​ പിന്നാലെ വള്ളികുന്നം പഞ്ചായത്തിൽ നാലുപേർക്കുകൂടി കഴിഞ്ഞദിവസം രോഗം സ്ഥിരീകരിച്ചു. വെള്ളിയാഴ്ച പാലമേലിൽ നാലും അരൂക്കുറ്റി, എടത്വ, അരൂർ എന്നിവിടങ്ങളിൽ ഓരോരുത്തർക്കും രോഗംപിടിപെട്ടു. രണ്ടുപേർ ഡെങ്കിപ്പനി ലക്ഷണത്തോടെയും ചികിത്സ തേടി. ഇൻഫ്ലുവൻസ വൈറസ് സാന്നിദ്ധ്യവും ജില്ലയിൽ കൂടുകയാണ്.