മിന്നൽ പ്രളയം : കെ.എസ്.ഇ.ബിക്ക് നഷ്ടം 65 ലക്ഷം

പത്തനംതിട്ട : മിന്നൽ പ്രളയത്തിൽ ജി​ല്ലയി​ൽ കെ.എസ്.ഇ.ബിക്ക് നഷ്ടം 65 ലക്ഷം രൂപ. 1.50 ലക്ഷം ഉപഭോക്താക്കളുടെ വൈദ്യുതി വിതരണമാണ് അഞ്ചുദി​വസം കൊണ്ടുനിലച്ചത്. അപകട സാദ്ധ്യത കണക്കിലെടുത്ത് 700 ട്രാൻസ്ഫോമറുകൾ ഓഫാക്കിയപ്പോൾ പത്ത് എണ്ണം നശിച്ചുപോയി. നിരവധി സ്ഥലങ്ങളിൽ ലൈൻ പൊട്ടിവീണിരുന്നു. സബ് സ്റ്റേഷനുകളിൽ നിന്ന് വിവിധ ഫീഡറുകളിലേക്കുള്ള വൈദ്യുതി വിതരണം പുന:സ്ഥാപിച്ച് കൊണ്ടിരിക്കുകയാണ്. വ്യക്തിഗത തകരാറുകൾ ഭൂരിഭാഗവും പരിഹരിക്കാനായി​. വെള്ളം ഇറങ്ങാത്ത പ്രദേശങ്ങളിലെ വൈദ്യുതി വിതരണമാണ് ഇപ്പോൾ തടസപ്പെട്ടിരിക്കുന്നത്. വൈദ്യുതി ആഘാതമേറ്റ് തിരുവല്ലയിൽ ഒരാൾ മരണപ്പെട്ടു. ഇത്തരത്തിലുള്ള അപകടങ്ങൾ ഒഴിവാക്കാനാണ് ആദ്യം തന്നെ വൈദ്യുതി വിച്ഛേദിക്കുന്നത്. എന്നാൽ ഇത് വലിയ പരാതികൾക്ക് ഇടയാക്കാറുണ്ടെന്നും കെ.എസ്.ഇ.ബി അധികൃതർ പറഞ്ഞു.

വള്ളത്തി​ലെത്തി​ തകരാർ പരി​ഹരി​ച്ചു

ഉരുൾപൊട്ടലും വേഗത്തിലുള്ള വെള്ളംവരവും കെ.എസ്.ഇ.ബിക്ക് വലി​യ നഷ്ടംവരുത്തി​. ചില പോസ്റ്റുകൾ വെള്ളത്തിനടിയിലായതും ട്രാൻസ്ഫോമറുകളിൽ വെള്ളം കയറിയതും കെ.എസ്.ഇ.ബി ഉദ്യോഗസ്ഥരെ വലച്ചു. രക്ഷാപ്രവർത്തകരുടെ ബോട്ടിലും ചെറുവള്ളങ്ങളിലുമെത്തിയാണ് പ്രളയബാധി​ത മേഖലയി​ൽ തകരാറുകൾ ജീവനക്കാർ പരിഹരിച്ചത്.

തകർന്നത്

ലോ ടെൻഷൻ പോസ്റ്റുകൾ : 333

ട്രാൻസ്ഫോമറുകൾ : 10

റാന്നി, ആറൻമുള, മണിപ്പുഴ, തോട്ടഭാഗം, തിരുവല്ല

ഭാഗങ്ങളിലാണ് കൂടുതൽ നാശനഷ്ടം.

ഭൂരിഭാഗം പ്രദേശത്തും വൈദ്യുതി വിതരണം പുനസ്ഥാപിച്ചിട്ടുണ്ട്. മറ്റ് ജോലികൾ നടക്കുന്നുമുണ്ട്. വെള്ളമിറങ്ങാത്ത സ്ഥലങ്ങളിലെ പ്രശ്നമേ ഇപ്പോഴുള്ളു. ഉടൻ തന്നെ എല്ലാം പരിഹരിക്കും.

കെ.എസ്.ഇ.ബി അധികൃതർ