ഫോസ്റ്റർ കെയർ പദ്ധതി, ചേർത്ത് പിടിക്കാം കുഞ്ഞുമക്കളെ

പത്തനംതിട്ട : സ്വന്തം വീട്ടിൽ വളരാൻ സാഹചര്യം ഇല്ലാത്തവരും അനാഥരാക്കപ്പെട്ടവരുമായ കുട്ടികളുടെ ആശ്രയമായി മാറുകയാണ് ഫോസ്റ്റർ കെയർ പദ്ധതി. ജില്ലാശിശുസംരക്ഷണ യൂണിറ്റും ചൈൽഡ് വെൽഫയർ കമ്മിറ്റിയും ചേർന്ന് നടപ്പാക്കുന്ന ഫോസ്റ്റർ കെയർ പദ്ധതി പകരുന്നത് വലിയ പ്രതീക്ഷയാണ്. ആറ് വയസ് മുതലുള്ള കുട്ടികൾ ഇതിൽപ്പെടും. ശിശുസംരക്ഷണ സ്ഥാപനങ്ങളിലെ കുട്ടികൾക്ക് കുടുംബാന്തരീക്ഷത്തിൽ ജീവിക്കാൻ അവസരമൊരുക്കുകയാണ് പദ്ധതിയുടെ ലക്ഷ്യം. 23 ശിശു സംരക്ഷണ സ്ഥാപനങ്ങളിലായി 366 കുട്ടികൾ സംസ്ഥാനത്തുണ്ട്. സാമ്പത്തിക ഭദ്രതയുളള 35 വയസ് പൂർത്തീകരിച്ച വ്യക്തികൾക്കോ ദമ്പതികൾക്കോ അപേക്ഷ നൽകാം. അപേക്ഷയോടൊപ്പം തിരിച്ചറിയൽരേഖ, കുടുംബ ഫോട്ടോ, വരുമാന സർട്ടിഫിക്കറ്റ്, വിവാഹ സർട്ടിഫിക്കറ്റ്, മെഡിക്കൽ സർട്ടിഫിക്കറ്റ്, പൊലീസ് ക്ലിയറെൻസ് സർട്ടിഫിക്കറ്റ് എന്നിവ ലഭ്യമാക്കണം. മിഷൻ വാത്സല്യ വെബ്‌സൈറ്റിലും രജിസ്റ്റർചെയ്യാം.

കിൻഷിപ്പ് ഫോസ്റ്റർ കെയർ

ബാലനീതി നിയമപ്രകാരം രജിസ്റ്റർ ചെയ്ത സ്ഥാപനങ്ങളിലുളള മിക്ക കുട്ടികൾക്കും ബന്ധുക്കളുടെ കൂടെ നിൽക്കണമെന്നാണ് ആഗ്രഹം. എന്നാൽ സാമ്പത്തികമായി പരിതാപകരമായ അവസ്ഥയിലായിരിക്കും ബന്ധുക്കൾ പലരും. ഈ സാഹചര്യത്തിലാണ് കിൻഷിപ്പ് ഫോസ്റ്റർ കെയർ പദ്ധതിക്ക് സർക്കാർ രൂപം നൽകിയത്. അടുത്ത ബന്ധുക്കളായ മുത്തശ്ശി മുത്തശ്ശൻമാർ, അമ്മാവൻമാർ, അമ്മായിമാർ അല്ലെങ്കിൽ കുട്ടികൾ ഇല്ലാത്ത മറ്റുളളവർ എന്നിവർക്ക് പദ്ധതിയിലൂടെ കുട്ടികളെ ഏറ്റുവാങ്ങാം. താൽപര്യമുള്ളവർക്ക് വനിതാശിശു വികസന വകുപ്പിന്റെ കീഴിലുളള ജില്ലാ ചൈൽഡ് പ്രൊട്ടക്ഷൻ യൂണിറ്റ് വഴി അപേക്ഷിക്കാം. അപേക്ഷയിലുള്ള റിപ്പോർട്ട് പ്രകാരം ചൈൽഡ് വെൽഫെയർ കമ്മിറ്റി പരിശോധിച്ച് ഉചിതമായ കുടുംബങ്ങളിലേക്ക് കുട്ടികളെ അയയ്ക്കും.

ജില്ലയിൽ ഫോസ്റ്റർ കെയറിൽ

അംഗങ്ങളായിട്ടുള്ള കുട്ടികൾ : 22

വിവരങ്ങൾക്ക് :

ജില്ലാചൈൽഡ് പ്രൊട്ടക്ഷൻ ഓഫീസർ, ജില്ലാചൈൽഡ് പ്രൊട്ടക്ഷൻ യൂണിറ്റ്, മൂന്നാം നില, മിനിസിവിൽ സ്റ്റേഷൻ, ആറൻമുള, പത്തനംതിട്ട 689533.

ഫോൺ : 04682319998, 7012374037.

ഒരു കുട്ടിയെ വളർത്താൻ മനസുണ്ടെങ്കിൽ ഫോസ്റ്റർ കെയർ പദ്ധതിയിൽ പങ്കുചേരാം. സാമ്പത്തിക ഭദ്രത അനിവാര്യമാണ്. കുഞ്ഞുബാല്യങ്ങൾക്ക് ഇതൊരു ആശ്വാസ പദ്ധതിയാണ്.

ഫോസ്റ്റർ കെയർ അധികൃതർ