രാജ്യത്തിന്റെ അഭിമാനം വാനോളം ഉയർത്തി ഗഗൻയാൻ പദ്ധതി, ഐ എസ് ആർ ഒയെ അഭിനന്ദിച്ച് ബഹിരാകാശ രംഗത്തെ പ്രമുഖൻ

ന്യൂ‌ഡൽഹി: ബഹിരാകാശത്തേക്ക് യാത്രികരെ അയയ്ക്കാനുള്ള ഇന്ത്യയുടെ ഗഗൻയാൻ പദ്ധതിക്ക് അഭിനന്ദനങ്ങളുമായി എയ്റോസ്പേസ് നിർമാണ രംഗത്തെ ഭീമൻ എലോൺ മസ്ക്. ബഹിരാകാശ യാത്രികരെ കൊണ്ടുപോകുന്ന വികാസ് എഞ്ചിന്റെ മൂന്നാമത്തെ ദീർഘമായ ഹോട്ട് ടെസ്റ്റ് വിജയകരമായി പൂർത്തിയാക്കിയ വേളയിലാണ് എലോൺ മസ്ക് ഐ എസ് ആർ ഒയ്ക്ക് അഭിനന്ദനങ്ങൾ അറിയിച്ചത്. ഐ എസ് ആർ ഒയുടെ ട്വിറ്റർ പേജിലാണ് എലോൺ മസ്കിന്റെ സന്ദേശം വന്നത്.

Congratulations! 🇮🇳

— Elon Musk (@elonmusk) July 14, 2021

ഗഗൻയാൻ പദ്ധതിക്കു വേണ്ട യോഗ്യതകൾ പുതിയ എഞ്ചിൻ കൈവരിച്ചിട്ടുണ്ടോ എന്നറിയുന്നതിനു വേണ്ടി കൂടിയാണ് ഐ എസ് ആർ ഒ എഞ്ചിൻ പരീക്ഷണം നടത്തിയത്. തമിഴ്നാട്ടിലുള്ള മഹേന്ദ്രഗിരിയിലെ ഐ എസ് ആ‌ർ ഒ കേന്ദ്രത്തിൽ വച്ച് നടത്തിയ പരീക്ഷണത്തിൽ ഏകദേശം 240 സെക്കൻഡുകളോളം എഞ്ചിൻ പ്രവർത്തിപ്പിച്ചു. പരീക്ഷണം വിജയകരമായിരുന്നുവെന്നും മുൻകൂട്ടി കണക്കാക്കിയിരുന്ന ലക്ഷ്യങ്ങളെല്ലാം എഞ്ചിൻ പ്രവർത്തനത്തിൽ കൈവരിച്ചുവെന്നും ഐ എസ് ആർ ഒ പത്രകുറിപ്പിൽ അറിയിച്ചു. നാല് ഇന്ത്യൻ സഞ്ചാരികളെ അഞ്ച് മുതൽ ഏഴു ദിവസം വരെ ബഹിരാകാശത്ത് കൊണ്ടു പോയി തിരിച്ച് സുരക്ഷിതമായി ഭൂമിയിൽ എത്തിക്കുക എന്നതാണ് ഗഗൻയാൻ പദ്ധതിയുടെ ലക്ഷ്യം. 10,000 കോടി രൂപയാണ് ഈ പദ്ധതിക്ക് ചിലവ് പ്രതീക്ഷിക്കുന്നത്.