3 മണിക്കൂറിനകം ഉള്ളടക്കം നീക്കാൻ ബുദ്ധിമുട്ട്: മെറ്റ

ന്യൂഡൽഹി: അടിയന്തര സ്വഭാവത്തോടെ ചില പോസ്റ്റുകൾ നീക്കണമെന്ന് കേന്ദ്ര സർക്കാർ ആവശ്യപ്പട്ടാൽ മൂന്നു മണിക്കൂറിനകം സമൂഹ മാദ്ധ്യമ പ്ലാറ്റ്ഫോമുകൾ നടപടിയെടുക്കണമെന്ന പുതിയ ഐ.ടി ചട്ടങ്ങളിലെ വ്യവസ്ഥ പ്രായോഗിക തലത്തിൽ ബുദ്ധിമുട്ടാണെന്ന് മെറ്റ.

നേരത്തെ ഇത് 36 മണിക്കൂറായിരുന്നു. പുതിയ വ്യവസ്ഥയോട് തത്വശാസ്ത്രപരമായി യോജിക്കുന്നുവെങ്കിലും പോസ്റ്റുകൾ നീക്കാൻ മൂന്നു മണിക്കൂർ സമയപരിധി കമ്പനിക്ക് വലിയ വെല്ലുവിളിയായി മാറുമെന്ന് എ.ഐ ഉച്ചകോടിയിൽ മെറ്ര വൈസ് പ്രസിഡന്റ് റോബ് ഷെർമാൻ പറഞ്ഞു. ഓരോ സർക്കാർ അപേക്ഷയിലും അന്വേഷിച്ചു തീരുമാനമെടുക്കാൻ ഈ സമയ പരിധിയിൽ സാദ്ധ്യമല്ല. ഈ മേഖലയിലുള്ളവരുമായി കൂടുതൽ കൂടിയാലോചന കേന്ദ്രസർക്കാർ നടത്തിയിരുന്നെങ്കിൽ ഇത്തരം പ്രശ്‌നങ്ങൾ പരിഹരിക്കാൻ കഴിയുമായിരുന്നുവെന്നും പറഞ്ഞു.