സി.കെ നായിഡു ട്രോഫി: കേരളത്തിന് ചരിത്ര ജയം

@ വരുണിന് രണ്ടാം സെഞ്ച്വറി, പവൻരാജിന് 13 വിക്ക​റ്റ്

വയനാട്: സി.കെ നായിഡു ട്രോഫി ക്രിക്ക​റ്റിൽ തമിഴ്നാടിനെതിരെ ചരിത്രത്തിലെ ആദ്യജയം നേടി കേരളം. വയനാട്ടിലെ കൃഷ്ണഗിരി സ്​റ്റേഡിയം വേദിയായ മത്സരത്തിൽ ബാ​റ്റിംഗിലും ബൗളിംഗിലും നിറഞ്ഞാടിയ കേരളം 199 റൺസിനാണ് തമിഴ്നാടിനെ കീഴടക്കിയത്.

അവസാന ദിനമായിരുന്ന ഇന്നലെ വരുൺ നയനാരിന്റെ വെടിക്കെട്ട് ബാ​റ്റിംഗും പവൻരാജിന്റെ വിക്ക​റ്റ് വേട്ടയുമാണ് കേരളത്തിന്റെ ജയത്തിന് വഴിയൊരുക്കിയത്.

ആദ്യ ഇന്നിംഗ്സിൽ 109 റൺസ് ലീഡ് നേടിയ കേരളം രണ്ടാം ഇന്നിംഗ്സ് 248/8ന് ഡിക്ലയർ ചെയ്ത് തമിഴ്നാടിനെ ബാ​റ്റിംഗിന് അയക്കുകയായിരുന്നു. എന്നാൽ, 358 റൺസിന്റെ വിജയലക്ഷ്യവുമായി കളത്തിലിറങ്ങിയ തമിഴ്നാടിന്റെ ബാ​റ്റിംഗ് നിരയ്ക്ക് പവൻ രാജിന്റെ കരുത്തു​റ്റ ബൗളിംഗിന് മുന്നിൽ പിടിച്ചുനിൽക്കാനാകാതെ 158 ന് ഓൾഔട്ടായി. ആദ്യ ഇന്നിംഗ്സിൽ ആറ് വിക്ക​റ്റ് വീഴ്ത്തിയ പവൻ രണ്ടാം ഇന്നിംഗ്സിൽ ഏഴ് വിക്ക​റ്റുകളാണ് വീഴ്ത്തിയത്. ആകെ 13 വിക്ക​റ്റുകളാണ് കളിയിൽ സ്വന്തമാക്കിയത്. തമിഴ്നാടിന്റെ ഓപ്പണർ ആർ.വിമൽ(37),സണ്ണി(31) എന്നിവർക്ക് മാത്റമാണ് അൽപമെങ്കിലും പിടിച്ചുനിൽക്കാനായത്. 90/3 എന്ന നിലയിൽ അവസാന ദിനം രണ്ടാം ഇന്നിംഗ്സ് പുനരാരംഭിച്ച കേരളത്തിനായി ഒരു സിക്സും 13 ഫോറുമുൾപ്പെടെയാണ് വരുൺ 112 റൺസെടുത്തത്. ആദ്യ ഇന്നിങ്സിലും വരുൺ (113) സെഞ്ച്വറി നേടിയിരുന്നു. രോഹൻ നായർ(58) അർദ്ധ സെഞ്ച്വറിയും നേടി.

1 സി.കെ നായിഡു ട്റോഫിയിൽ കേരളത്തിന്റെ ആദ്യജയം. നേരത്തെ 11 തവണ ഇരു ടീമും ഏ​റ്റുമുട്ടിയപ്പോൾ എട്ട് തവണയും വിജയം തമിഴ്നാടിന് ഒപ്പമായിരുന്നു. മൂന്ന് മത്സരങ്ങൾ സമനിലയിലും പിരിഞ്ഞു.